Marko 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Enenyet Yeesso hamaad ka ilkerengeetti weene Yeerusaleem ka soodowwaacha

¹ Chirra icho ilkerengeetti weene Yeerusaleem isoodowwaateene, ilkerengeetti Beꞌdifaage ichoow Beꞌdaaniya Hali Geeyohi Oolif haggee yimaateen ka, Yeesso abattitiistoo lammee ergate,

² wihi usu icho iyidah, “Ilkerengeetti ortiin kijirto irda, uus atin gessaan la inkuraarruhoo injire liirarine hidan a ꞌhessaan. Soofura inta keena.

³ Chirri etoo, ‘A iꞌdoh iꞌda iyeessaan?’ atin worsate la, mehe itadeehiin ya, ‘Kamure ꞌdoona, inkoo dow on la inta isoolaaba.’ ”

⁴ Iratte, inkuraarruhi afafhi min kahidan ꞌhesse. Geedda iche furto,

⁵ ꞌdooꞌdoo intaas toollo, “Inkuraarruhaas atin furtaan, a iꞌdoh?” worsate.

⁶ Iche la wihi kootte Yeesso iyidah tidahye, ꞌdooꞌd la sooꞌdiiche.

⁷ Chirri icho inkuraarru Yeesso ikeeneene, kabuuꞌddeticho kagaadeen ka, Yeesso koorronte.

⁸ ꞌDooꞌdi ittaawe kabuuꞌddeticho jit kagolge, gaasoo la seytohi icho gosas goya kasoogoocheen, jit kagolge.

⁹ ꞌDooꞌdi Yeesso ortiis raaho ichoow ki ꞌdubiis raaho riire wihi us yidah, “Waakh koolinno!” “Waakh ki magahi Kamur kayamiit a imaale.”

¹⁰ “Waakh dakhi aacchiheenki Dawuud layadeehe yamiit a imaale!” “Waakkheenki inti weyti saraat kijiro koolinno!”

¹¹ Yeesso ilkerengeetti weene Yeerusaleem gele. Minki Waakhe buure gele, walah tuumman yeye. Il a sooibeennowe, abattitiisti tomon ichoow lammee khabaayi, ilkerengeetti Beꞌdaaniya irte.

Yeesso geeyoo fala

¹² Ibeenki kaas sooraaho chirri icho ilkerengeetti Beꞌdaaniya kasoobaheen ka, Yeesso ankaye.

¹³ Foga ka geeyoo fiig layadeehe seeb khabo arge, ibuje, usu gurnaan khabo yeyaa. Chuꞌus geey sooeleele ka, seeb on menye walah us kaꞌhele mele. A mehe maanti geey gurnaan bahcho mee gon.

¹⁴ ꞌDeerka geey fale wihi us iyidah, “Yombuu tuumman etoo kalday laka gurnaan ma kaayaham!” Abattitiis la a daagte.

Yeesso ꞌdooꞌdi minki Waakhe buure ka chilimme iskadooricho riha

¹⁵ Chirri icho ilkerengeetti weene Yeerusaleem yimaateen ka, Yeesso uranti minki Waakhe buure gele, ꞌdooꞌdi intaas ka walah gatti ichoow ki walah ororicho ba rihnaan sookhabte. Komborohi balballaaddane ꞌdooꞌdi chilimmeti ilassi addan iskadooricho leeyahe ichoow komborohi ꞌdooꞌdi kutukuurrug ororsati ba rerreeche.

¹⁶ Yeesso la eti tuummane meeh siꞌdo, uranti minki Waakhe buure dah kaleegoocho tirte.

¹⁷ Enenyet ayti Waakh abche, wihi us iyidah, “Wihi chiiran, “ ‘Minkeey mehe layadeeh ya, minki weysiite, ꞌdooꞌdi harra tuumman,’ Iꞌdaasenyi, ‘inti ꞌdooꞌdi hatto leh kadagti,’ kayeesseen.”

¹⁸ Kuhaaniyyohi wewween, ichoow tagaammeti amurre ba, yeedaas daagte. Jiti iche Yeesso katagiis yowatte. Jeenteti urur tuumman wihi us enenyet abcho ka weyti igirmeestuu, usu weyti karoorte.

¹⁹ Chirri il gelebnowe ka, Yeesso ichoow abattitiis ba ilkerengeet kabaheen.

Wihi abatti geeyi fiig kaabatte

²⁰ Chirdeer geeddi icho ꞌdulaan, geeyi cheletteete fiig usuhi hiiyyay kasookhabte tuum angage argeen.

²¹ Beetero wihi chele eheet kasooꞌhele wihi us Yeesso iyidah, “Eti ween bal yey! Geeyi fiige chele at fasse, a angage!”

²² Yeesso wihi us ilaabe, “Waakh kakhuufa!

²³ Rume atin icheeka, chiꞌ etoo hala, ‘Nyaam beyti buure goya iskaluguꞌd!’ iyidahye toro la uurlammaal ikhabine, wihi us yidah saggi icho iyateehiin rummeesti, etaas wahaas a liiyeela.

²⁴ Maantaka wihi an atin isoocheeko, walahbaaw atin weysi ka Waakh daahteen, saggi atin iꞌhesseen rummeesda, wahaas la a atin lasiichaa.

²⁵ Chirra atin tolossattaane weysattaane, etoo la wohoo ikhabtaan etaas wahaas ikakuta ꞌdee Aabbahiinki serey jiro uskeeliin a atin ikakuto.”

Anto Yeesso lakamalala

²⁷ Toro ilkerengeetti weene Yeerusaleem yimaateen. Geedda Yeesso uranti minki Waakhe buure goya raaho kuhaaniyyohi wewween ichoow tagaammeti amurre ichoow ewweenki Yaꞌhuud la Yeesso iyimaateen.

²⁸ Wihi icho worsateen, “Antohi at wahanyeyyoha kahaaggisso, a weheeyya? Antohi at wahanyeyyoha kahaaggisso ayyo kisiiche?”

²⁹ Yeesso wihi us ilaabe, “Wohoo kaldaye atin worsada. Isoolaaba, ani la antohi an khabo, an wahanyeyyoha dakkhan kahaaggicho, a weheeyya a atin isoocheeko.

³⁰ Yoohanahi Enenyet Baattissiyo, antohi us enenyet kabaattissiyo, Waakhe kayimaateen, bal enenyet? Isoocheeka!”

³¹ Iskaleehawwoocheene wihi icho isiyidaaheen, “Chiꞌinno, ‘Waakhe kayimaateen,’ nadeeh, mehe inno iyadeeh ya, ‘A iꞌdoh ꞌdeerka irummeysanna?’

³² Iꞌdaasenyi chiꞌinno, ‘Enenyete kayimaateen,’ nadeeh mehe soobaha?” A mehe ꞌdooꞌde karooraan jeenteti enenyet tuumman saggi Yoohana rumanka eti Waákh íyeyyeedo iekkaachuu.

³³ ꞌDeerka wihi icho Yeesso ilaabeen, “Nah ma garanni.” Yeesso la iiyeyye, “Ani laka antohi an wahanyeyyoha kahaaggicho ma atin isoocheeko gon.”