Luuka 9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso ergaanoti tomon ichoow lammee ergata

¹ Yeesso chirri us ergaanotiisti tomon ichoow lammee isiwahe ka, miig ichoow antohi icho ginnayyo tuumman kabahchaane toro icho sugeerre kasamaachaan siiche.

² Ulla ergaano ili kharaat ierge, ꞌdee wori dakhi Waakh miinsan cheekta, ꞌdooꞌdi khakkhannan laka samaassa.

³ Wihi us iyidah, “Chirri atin irattaan la, wohoo rucchul laka asiꞌdanna. Wul ommos urgo ommos golol ommos chilimme ommos ubbaaroo deere addan laka asiꞌdanna.

⁴ Mimbaaw atin gesseen on fiddiya ichoowka ilkerengeettaas kabaha.

⁵ Chirri enenyet atin imartiisan, ebeeri luhlo atin fuulo sahda geedda atin ilkerengeetticho kabahtaan. Waha a garti icho cheekatti.”

⁶ Ergaano ꞌdeerka kolba gooboo iratte Wori Haaggan cheekte, ꞌdooꞌdi khakkhannan laka meelal tuumman ka samaasse.

ꞌHerood eti Yeesso yahe kamalala

⁷ Chirri ꞌHeroodhi boroofenhi Gaalilaaya iween wihi yitah tuumman daage ka, mal waaye. Iꞌdi tahe ꞌdooꞌd gaasoo Yoohanahi Enenyet Baattissiyo iche omoot lakasookahche, iche essa.

⁸ Gaasoo la Eliiya soobahe essaane, gaasoo la, etoo goorat Waákh íyeyyeedo iche sookahe iche essaan.

⁹ Iꞌdaasenyi ꞌHerood wihi us yidah, “Ani goorat Yoohana matah gooche. Eta toro wahanyeyyoha iꞌdee yeelo an daago a ayyo?” ꞌHerood la jiti us Yeesso kaargo yowte.

Yeesso mejeli eluf chane goollicha

¹⁰ Chirri ergaano soonokhatte ka, wihi iche yeesse Yeesso icheekte. Yeesso ꞌdeerka ergaano khaatte ilkerengeettoo Bessaayda layadeeh ka intoo khaawwan irteen.

¹¹ Iꞌdaasenyi ururre kasse, ꞌdubiis leetimiy. Ulla soodowweeste toro wori dakhi Waakh miinsan icheeke, ꞌdooꞌdi khakkhannan laka samaache.

¹² Chirri orrahe soodihto ka, ergaanoti tomon ichoow lammee itimiyye wihi iche itidah, “Urur laabe ꞌdee goobassi soodow ichoow gosasha soodow ka golol ichoow bari a yowti. A mehe inta a yibe.”

¹³ Wihi us ilaabe, “Atin rubeytiin wohoo icho yamhiin siicha.” Wihi iche ilaabte, “Wihi nah khabno a makaate chan ichoow bahag lamma kalday on. Chiꞌ nah iranni nah ꞌdooꞌda tuumman golol isooganno on menye.”

¹⁴ Mejeli intaas kajire a geeddi alif chan. Iꞌdaasenyi wihi us abattitiis iyidah, “Bal koobbinohi geeddi tomon chacchane koorromicha.”

¹⁵ Abatti iꞌdaas yeesse, enenyet tuumman la orronte.

¹⁶ Makaateyyohi chane ichoow bahaggi lammee khaate, serey yeye, Waakh kalaꞌd ilaabe, jejjebche. ꞌDeerka abatti idiibe ꞌdee ꞌdooꞌd a gisso.

¹⁷ Enenyet tuumman golossate, darge. Abatti la enjel tomon ichoow lamma gololi laajjebche lasoowaache buuhaan soosuunte.

Beetero eti Yeesso yahe cheeka

¹⁸ Maantoo chirra Yeesso keley Waakh wahti abattitiis la a leejirta, wihi us icho worsate, “Ururre an a ayyo elatta?”

¹⁹ Wihi iche ilaabte, “Gaasoo ati a Yoohanahi Enenyet Baattissiyo essa, gaasoo a Eliiya essa, gaasoo laka at a etoo goorat Waákh íyeyyeedo omoot ka sookahe essa.”

²⁰ “Iꞌdaasenyi atin la? An a ayyo tadeehiin?” worsate. Beetero wihi us ilaabe, “At a Ki Lasubhe, a ki Waakh.”

Yeesso sinati loomhicho ichoow omoottiis kaayyeeda

²¹ Yeesso la weyti abatti tootooche, uus iche waha etoo kalday laka icheekine.

²² Toro wihi us iyidah, “Ínam Aadam sinati buurenye latusa, ewweenki Yaꞌhuud ichoow kuhaaniyyohi wewween ichoow tagaammeti amurre usu ꞌdiiꞌdaane, layagiise ibeenki seyyahnaatteet ka omoot lakasookahcha.”

²³ ꞌDeerka wihi us icho tuumman iyidah, “Chirri etoo isooraahin ꞌdoono awtiis a ꞌdiiꞌdo toro la kol dakkhan massalaabatiis barbar a sookorsati a isooraaho.

²⁴ A mehe eti tuummane jirotiis ribin ꞌdoono, jiroti rummaat a waaya. Iꞌdaasenyi eti tuummane harrata ka jirotiis ani iwaayo jirotiisti rummaat a riba.

²⁵ Etoo maanta a chirri us wohoo ꞌhele, chirri us wihi harrata tuumman ꞌhele, iꞌdaasenyi awtiis waaye ommos baabe?

²⁶ Chirri etoo ani ikuuryaawo toro yeedeey kuuryaawo, Ínam Aadam maanti us ababnaankiis ichoow ababnaan Aabbahiis ichoow ki herti Waakhe munyee leesoonokhti usu a kuuryaawa.

²⁷ Rume atin icheeka, gaasiinkoo maanta inta kijiro, omoot ma argo geeddi icho dakhi Waakh iargin.”

Eliiya ichoow Muusa hal sartiis ka Yeesso leeyyeedaan

²⁸ Inkoo us yeeda yidahye geeddi ibeen siyyeete kutte ka, Yeesso Beetero ichoow Yoohana ichoow Yaakoobo khaatte, haloo leekore weeste.

²⁹ Weestaayi, fooliis urgiye, gaaddiis la urgiite weyti dakhnaatte.

³⁰ Reeroo lammee, a Muusa ichoow Eliiya,

³¹ ichohi weyti ababo soobaheene, Yeesso leeyyeedeen. Wihi icho Yeesso kaleehawwoocheen a omoottiisti us ꞌdee kola ibeenneta ilkerengeetti weene Yeerusaleem ka yamuut. Waha la a wihi goorat Waakh Yeesso igooche us dowwanoha ka soobuuhicho.

³² Beetero ichoow wahalhiis ba weyti yuufeen. Iꞌdaasenyi chirri icho sooneybaateen ka Yeessohi ullaka ababo argeene reeri lammeenye Yeesso leetoollo laka argeen.

³³ Chirra reer Yeesso katabo ka, Beetero wihi us Yeesso iyidah, “Kamur, a haaggantahe gon chiꞌ nah inta kijirro. Alley gaayim seyyah a disno, too a taahha, too a too Muusa, too la a too Eliiya.” Beetero la wihi us essi ma garti ba.

³⁴ Yeyyeedaayi, mirisoo soobahe icho tuumman ankube, abatti la chirri miris sarcho kore ka roorro gesse.

³⁵ Hooyoo la mirisaas goyaka sooyeede wihi us yidah, “Waha a Weeleeyki an soobahsade, usu nabah isuda!”

³⁶ Chirri hooy gammadiche ka, saggi Yeesso keley iyahe kaseen. Abatti waha leegammadisse, et iche wihi iche chirraas agarte icheekte mele.

Yeesso inanki ginna dakhatti samaacha

³⁷ Ibeenki kaas sooraaho, chirri icho hal kasookhubteen ka, ururi buure or kasoodowe.

³⁸ Etoo la urur goya kasooriire, wihi us yidah, “Eti ween a kihawwaasde, inankeey uur isoonugleyso. A mehe a inanki kaldaye an khabo.

³⁹ Ginna a khabatta, chirraas on riira, harmissa ꞌdombo af leekeena. Geeddi deer ma ꞌdiisso, weyti sina kawaarissa.

⁴⁰ Abattitaah a hawwaasde, ꞌdee ginna weel kibihissa, iꞌdaasenyi a agaafatte.”

⁴¹ Yeesso wihi us ilaabe, “ꞌDooꞌdi weyꞌdane uskeel lehe Waakh ikakhuufin! Geeddoh atin leefiddiyo? Geeddoh atin igarrahsadi? Inankaah inta keen!”

⁴² Inam soosohtaayi ginna toro il kaguꞌdubte weyti kaharmisse. Iꞌdaasenyi Yeesso ginna leejaakhe, inam samaache, ooyohi dele dahan gesse.

⁴³ Icho tuumman la miigti Waakh kagirmeesteen. ꞌDooꞌd tuumman wihi Yeesso yeele kagirmeestaayi, Yeesso wihi us abattitiis iyidah,

Yeesso toro omoottiis kaayyeeda

⁴⁴ “Taba waha an atin isooadeeh mujjum nabah isuda! Ínam Aadam dowwanoha ka ꞌdube lagoocha, dahanohi enenyet lagessa.”

⁴⁵ Iꞌdaasenyi waha wihicho ma aban. Iꞌdi tahe icho waha a lakadagche, uus ꞌdee icho wihi icho yahiin garanne. Icho la usu worsan karooreen.

Abatti eti ꞌdooꞌdi addan tuumman iween isworsatta

⁴⁶ Abatti goyaka iriirtoo soobahte, eti berri ꞌdooꞌd tuumman iween isleeiriirte.

⁴⁷ Yeesso la malicho a garta gone, weeloo rucchul khaate garabiis toolliche.

⁴⁸ Wihi us icho iyidah, “Eti tuummane jeenteti us abattiteey iyahuu weela rucchul martiisti, ani imartiista. Eti tuummane ani imartiisti la eti isooergate martiista. A mehe eti goytiin ka weyti rucchul usu weyti ween.”

Eti tuummane kiꞌdiiꞌdin ankaahha jira

⁴⁹ Yoohana la wihi us Yeesso iyidah, “Kamur, nah etoo antohi magahaah ka ginnayyo enenyet kabahcho a agarre, nah la usu toollin leheet, jeenteti us keen ieheynan u.”

⁵⁰ “Ajeyinna,” Yeesso yidah. “A mehe eti atin iꞌdiiꞌdin, a aaliinna.”

ꞌDooꞌdi ili Saamariya Yeesso ꞌdiiꞌda

⁵¹ Inkoo ibeenki Yeesso goobi Waakh lageecho soodowwaate ka, Yeesso saggi us ilkerengeetti weene Yeerusaleem iirti gooche, kahe irte.

⁵² Ulla ergattitoo orey iergate. Icho la a irtaane geeddi us ankhanyahe ilkerengeettoo ili Saamariya ka inti us baryo yowtaan.

⁵³ Iꞌdaasenyi ꞌdooꞌdi ilkerengeettaas Yeesso martiisan ꞌdiiꞌde jeenteti us ilkerengeetti weene Yeerusaleem ikasohti u.

⁵⁴ Chirri abattiti koo Yaakoobo yahe koo la Yoohana yahe saggi Yeesso liiꞌdiiꞌde argeen ka wihi icho Yeesso worsateen, “Kamur at nahi Waakh, ‘Serey ka ꞌdab keene, ꞌdooꞌda gub!’ inadeeh a ꞌdoonta?”

⁵⁵ Iꞌdaasenyi Yeesso abattitiis iurgiye, leejaakhe.

⁵⁶ Yeesso ichoow abattitiis ba ilkerengeettoo addan irteen.

Yeessohi laraaho ꞌdabakh mee

⁵⁷ Ildah raahaani, etoo wihi us Yeesso iyidah, “Meelbaaw at iratti ka an a kiraaha.”

⁵⁸ Yeesso wihi us ilaabe, “ꞌDowwohoyyo lumame khabaane, chimbirohi saraat la minchimbiroote khabaan. Iꞌdaasenyi Ínam Aadam inti us matah gesso laka ma khabo.”

⁵⁹ Etoo addan wihi us iyidah, “Kaale toolla isooraahe, abattiteey ateeh.” Iꞌdaasenyi et wihi us soolaabe, “Kamur, alley koloo a irdi, aabbaheey a laabo.”

⁶⁰ Yeesso wihi us iyidah, “ꞌDooꞌdi tuume lamaaꞌdo a hili ꞌdooꞌdi tuume. Iꞌdaasenyi at iro wori dakhi Waakh miinsan ꞌdooꞌd icheek.”

⁶¹ Etoo addan toro wihi us yidah, “Kamur, an kiraaha, iꞌdaasenyi alley koloo a irdi ꞌdooꞌdeey a ‘Waakh atin bariisti,’ iidaahe.”

⁶² Yeesso wihi us ilaabe, “Eti tuummane ani isooraaho, toro jirotiisti oraat ijiitti, indigir us hili dakhi Waakh ikhabo mele.”