Luuka 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Deyyehotoo Yeesso ichoow abattitiis ba leejirte

¹ Waha ꞌdubicho ka, Yeesso goobab ichoow ilkerengeeto dah kagooche, Wori Haaggane dakhi Waakh miinsan icheeke. Abattitiisti tomon ichoow lammee laka usu a leejirte.

² Deyyehotoo goorat ginnayyo ichoow sugeerretoo addan ka lasamaache Yeesso a leejirte. Deyyehota, too a Maariyati ilkerengeetti Magdaala goorat Yeesso ginna teeba kabahche.

³ Too la a Yoowana makhaabál Chuusa. Chuusa la min ꞌHerood ka ilbooyye iweenyahe. Too la a Sussanna ichoow deyyehotoo addane ittaawe. Deyyehota hoolahichooda Yeesso ichoow abattitiis ba kagargaarte.

Mammahti eti ilmo harrati yeerare kichibo

⁴ Geedda ururi buure kuymo ꞌdooꞌd la goobassi ittaawe kayamiite usu dagansati, Yeesso mammahtane ibahche.

⁵ “Etoo gos khabo a irte, ilmo harra kachibaa. Ilmoha us taaꞌhicho, gaasoo jit goya kadiheene, layabte, chimbirohi saraat la yumheen.

⁶ Gaasoo harrati daddaab fuusso kadiheene, chiꞌicho soobaheen ka orrahe geeyohaas soobahe gubte, khuyyaame laayahiinee.

⁷ Gaasoo laka inti geeyohi rurrucchule kudah khabo kadiheen. Isleesoobaheene geeyohi soobahe afcheen.

⁸ Gaasoo la inti harrati haaggan khabto kadiheen. Soobaheene gurnaan deleen. Geey ba kol kudoo geeddi il lakachibe ꞌdirihiis dele.” Chirri us yeediis massiche ka, riire wihi us yidah, “Eti dogo khabo, a daago giꞌde!”

A iꞌdoh Yeesso mammah ikayeyyeeda?

⁹ Abattitiis wihi mammahta tahe usu worsatte.

¹⁰ Wihi us iyidah, “Waakh garanti wihi dagsane dakhi Waakh miinsan lagarti a atin siiche. Iꞌdaasenyi ꞌdooꞌdi addan a imammahda, “ ‘ꞌdee walah yeyaane, eheet a ma argaan, wihi an eldi daagaane, eheet a ma abtaan.’

Yeesso abattitiis wihi mammahtaas tahe icheeka

¹¹ “Wihi mammahe miinsantahe kallaayo. Ilmo a Yeedi Waakh.

¹² Ilmohi jit lakachibe a ꞌdooꞌdi Yeedi Waakh daago, Seytaan la yamiite yeedaas uuricho kabahcho, saggoo ꞌdee icho yeedaas irummeysanne, Waakh iribin yeelo.

¹³ Ilmohi daddaab sarche kadihe a ꞌdooꞌdi chuꞌus Yeedi Waakh daage hamaadi buure ka khaatti. Iꞌdaasenyi hiiyyay icho khabaan mele. Geeddoo rucchul on yeeda rummeestaane iꞌdaasenyi chirri kajmeti uskeel kaluguꞌddo timiy dowwa on soodihaan.

¹⁴ Ilmohi inti geeyohi kudah khabto goya kadihe mehe itoollaan ya, ꞌdooꞌdi Yeedi Waakh daago. Iꞌdaasenyi geedda icho orey isohtaan, waꞌdwaaꞌd ichoow kamurroon ichoow haaggi wihi harrata afchaane ma weynaataan.

¹⁵ Iꞌdaasenyi ilmohi harrati haaggan lakachibe a ꞌdooꞌdi hahhaaggane, uuri haaggan khabo Yeedi Waakh daago uuricho gessati, jeenteti us igarrahsatuu gurnaan delo.

Taahi bolkho intoh lagessa?

¹⁶ “Et taa bolkhicho baakhuul kaankubo ommos siriir iliche gesso mele. Taa a labolkhicha kombor lakorcha, ꞌdee ꞌdooꞌdi min soogelo il kaarga.

¹⁷ A mehe walah dagsane liisoobihin mala, ommos walah oboobsane enenyet liiabinne ommos ꞌdow liikasoobihin mala.

¹⁸ Maantaka wihi atin liidowo mujjum daaga giꞌde. Eti tuummane wihi dahan lagesse mujjum woywoye a liikakhaya. Iꞌdaasenyi eti wihi dahan lagesse mujjum iwoywoyin, wihi us kol us khabo koogyahe laka a lakakhaata.”

Abar Yeesso ichoow walaalinyetiissa

¹⁹ Maantoo abar Yeesso ichoow walaalinyetiis ba Yeesso argin yimaateen. Iꞌdaasenyi jeenteti urur buur iyahuu, saggi icho ileeyeedaan waayeen.

²⁰ Etoo wihi us Yeesso iyidah, “Abartaah ichoow walaalinyetaah ba khare toollaane, ichohi kaargo ꞌdoonaan.”

²¹ Wihi us ilaabe, “Abarteey ichoow walaalinyeteey a ꞌdooꞌdi Yeedi Waakh kayimiy daago toro la raaho.”

Yeesso hafari ir keene il ijeycha

²² Maantoo Yeesso abattitiis wihi us iyidah, “Beyta Gaalilaaya maahno aficheki ꞌdiri a iranni.” ꞌDeerka koobanhoo koreene irteen.

²³ Kooban sohtaani Yeesso urꞌdumme khaatte. Hafaroo buure la yimiyye bey guꞌdde, ichoowka bicche kooban goya isootabeene buuhin leheet.

²⁴ Abatti Yeesso iiratte, kihisse, wihi iche itidah, “Eti ween, eti ween, bicche a inno khaataan!” Ulla sookahe, hafar ichoow bicchehaas uskul ba leejaakhe, ire tolossatte, bicche laka haagsateen.

²⁵ Yeesso la wihi us abattitiis worsate, “Atin uliba ma ikakhuuftaan a?” Abatti roorro gesse toro girmeysatte, wihi iche isworsatte, “Eta a ayyo? Hafar ichoow bicche laka amur on ibahcha, icho la yeediis daagaan.”

Yeesso etoo ginnayyo dakhtaan samaacha

²⁶ Yeesso ichoow abattitiis ba kooban orey iwoyeen beyti Gaalilaaya aficheki ꞌdiri imaahaanee. Ilkerengeetti Geraasa isoodowwaateen.

²⁷ Chirri Yeesso kooban kasooyage ka, etoo ilkerengeettaase ginnayyo dakhtaan usu ꞌhele. Eta la geeddi deer gaad laan on sossohta, goob goya la ma fiddiyo, iꞌdaasenyi goꞌddassi enenyet lakahawwaalo fiddiya.

²⁸ Eta uus Yeesso arge ka uuwwiche, Yeesso ortiis ka il iskaguꞌdde, weyti riire wihi us yidah, “Yeesso, weeli Waakkhi weynaan tuumman tiis tahe, at mehe ikaꞌdoonta? A kihawwaasde, bolokh iitusin!”

²⁹ A mehe Yeesso ginna amuri iche etaas kabahto ibahche. Geeddi buure la ginna et a khabatte. Chirri dahano ichoow luhlo lahide, layaakhiche laka, us biingoyyohi lakahide a jejjebche, ginna la khaatta hidaad geessa.

³⁰ Yeesso la, “Magahaah a ayyo?” worsate. Wihi us ilaabe, “Magaheey a Ururi Iskareet.” Waha a jeenteti ginnayyohi ittaawe goytiis igeleen.

³¹ Ginnayyo la inonnokhteene Yeesso hawwaasteen, uus ankhari dahane ieleelin iergine.

³² Woyhoo buurenye golcha la intaas ka burroo tahariissa yaakha. Ginnayyo la Yeesso hawwaasteene, ichohi golchataas goya gelo daaheen. Yeesso la, amur siiche.

³³ Chiꞌ ginnayyo et kabaheen ka, golcha goya itabeene, woy tuumman bur kakhubte bey goya itabe, bicche khaateen.

³⁴ Chirri ꞌdooꞌdi golcha yaakhicho wihi yitah arge ka, orye woraas ilkerengeet ichoow ilaas dakkhan kataaꞌhiche.

³⁵ ꞌDooꞌd la bahe wihi yitahye sooyeyaa. Chirri icho Yeesso iyamiitiin, eti ginna goytiis kabahte usuhi sammacchaar Yeesso ortiis fiddiyo darfo mujjum gessate matah la haagsate ꞌheleen. Enenyet roorro gesse.

³⁶ ꞌDooꞌdi kootte wihi yitah arge la, saggi eti ginnayyo dakhteen liisamaache ꞌdooꞌdi addan icheeke.

³⁷ ꞌDooꞌdi ilkerengeetti Geraasa isoodow tuumman Yeesso daahe, icho a katabo, a mehe weyti roorro gesse. Ulla ꞌdeerka kooban kore irte.

³⁸ Eti kootte ginnayyo lakabahche Yeesso hawwaaste, usuhi raaho daahe, iꞌdaasenyi Yeesso et laabe wihi us iyidah,

³⁹ “Goob inokho geeddi Waakh kiyeele cheek.” Et ꞌdeerka irte ilkerengeet tuumman dah kagooche, geeddi Yeesso iyeele cheeke.

Yeesso inanti bujje sookahcha, makhaabassi khannan samaacha

⁴⁰ Inkoo Yeesso nokhte ka, ururoo usu martiiste. Iꞌdi tahe ꞌdooꞌd kootte usu a suga.

⁴¹ Chirraakka etoo Yaayiro layadeehe ilkerengeettaas ka minki weysiite Yaꞌhuud iween yimiyye, Yeesso luhlohiis kakufe hawwaaste, usuhi Yeesso goobiis yamiite ꞌdoonaa.

⁴² Iꞌdi tahe inanti kaldaye us khabo, guꞌh tomon ichoow lamma khabto, iche omoottan. Geeddi Yeesso sohti la ꞌdooꞌd ꞌdollohiis tuumman ka a ishude.

⁴³ Ururaas goyaka la makhaabassoo guꞌh tomon ichoow lamma hugunkiche tolossawwaaye diig on ꞌdulo la a jirta. Iꞌdaasenyi et samaan yabuuꞌd mele.

⁴⁴ Yeesso ꞌdubiis leetimiyye, laddi kabuuꞌdiis ꞌdaarte, chirraas on diiggi ꞌdulo tolossate.

⁴⁵ Yeesso wihi us worsate, “Ayyo iꞌdaare?” Chiꞌicho tuumman ꞌdiiꞌdeen ka, Beetero wihi us yidah, “Eti ween, ꞌdooꞌd ꞌdollohaah tuumman ka a issootakha, ishude.”

⁴⁶ Iꞌdaasenyi Yeesso wihi us iyidah, “Etoo a iꞌdaare, saggi miige ani ikabahte a garda.”

⁴⁷ Makhaabale ꞌdeerka saggi liikase agarte, ichehi hamarto timiyye, Yeesso ortiis ka il guꞌdubte. ꞌDooꞌd ortiis ka jeenteti iche Yeesso iꞌdaarte ichoow saggi iche chirraas on isamaatte cheekte.

⁴⁸ Yeesso la wihi us iyidah, “Inantaay, kakhuufnaanki at ikakhuufte a kisamaache gone, tab giꞌde nebey leeiro.”

⁴⁹ Yeesso yeedaas af kakhabaayi, etoo goob Yaayirohi minki weysiite Yaꞌhuud itoollo kayimiyye wihi us yidah, “Weel a massate, eti ween immarah sina akawaarin.”

⁵⁰ Yeesso la chirri us waha daage ka, wihi us Yaayiro iyidah, “Roorro akhabine, ani on irummeyso, iche la a samaattaa.”

⁵¹ Chirri us min Yaayiro sooeleele ka Beetero ichoow Yaakoobo ichoow Yoohana ichoow aabbahi weel leh ichoow abarti weel leh kalday on menye, eti tuummane min leegelo tirte.

⁵² Geeddaas la enenyet tuumman jeentetichuu a uuwwicha ooya. Yeesso la wihi us yidah, “Uuwwinna! Weel ma umaatane iꞌdaasenyi a urꞌda!”

⁵³ Icho la saggi weel iyumuyye gartaan gone, usu kareyteen.

⁵⁴ Iꞌdaasenyi inám dahan sookhabte, “Inantaay sookah” iyidah.

⁵⁵ Weel rubeye isoonokhatte, chirraas on sootolossatte. Yeesso ꞌdeerka weel wohoo us yaham a lasiicho yidah.

⁵⁶ ꞌDooꞌdi weel dele girmeeste, iꞌdaasenyi Yeesso amur ibahche, iicho wihi yitah etoo kalday laka icheekine.