Luuka 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Etoo iskarti Rooma rabittoo iskareet iween Yeesso kakhuufa

¹ Chirri Yeesso waha dakkhan ꞌdooꞌd iyidahye us massiche ka, ilkerengeetti Kafarnaaꞌhum gele.

² Etoo koobbintoo iskareet itoollo la ilbooyiiskoo us weyti ꞌdoono weyti khannanyahe, a omoottanyahe.

³ Eta iskar itoollo chirri us Yeesso woriis daage ka, ewweenkoo Yaꞌhuud ergate, Yeesso a lasoowaho, a yimaate ilbooyiis a samaacho.

⁴ Chiꞌicho Yeesso iyimaateen ka hawwaasteene, wihi icho iyidaaheen, “A imasse chaꞌat eta waha iyeesso,

⁵ a mehe yaafteen a ꞌdoona, toro minkeenki weysiite Yaꞌhuud laka a inno idise.”

⁶ Yeesso ꞌdeerka ewween raahe. Chirri us minki eti koobbinti iskareet itoollo idowwaate ka, etaas aalassiiskoo Yeesso or kasoodowche, wihi us iyidah, “Kamur, sina iiskawaarin, a mehe minkeeyki at tamiit ma muꞌdan.

⁷ Jeentetaas u anihi kiamiit ma muꞌdane, iꞌdaasenyi sooyeed ilbooyeey la a samaataa.

⁸ Iꞌdi tahe ani rubeyteey laka a etoo iskarti addane ikawewween antohicho raaho, toro la iskarti addane an andi laka a jirta. Chirri an koo, ‘Kaale,’ iidah a yamiit. Chirri an koo, ‘Nyaam iro,’ iidah la a irta. Chirri an ilbooyeey, ‘Waha yeel,’ iidah la a yeela.”

⁹ Chirri Yeesso waha daage ka weyti girmeeste. Ururi usu sooraaho iurgiye, wihi us iyidah, “Wihi an atin iadeeh, an injire yaafohi Issiraayel goyaka laka eti geedda weyti Waakh kakhuufo ma ꞌhelin!”

¹⁰ ꞌDooꞌdi kootte lasooergate ꞌdeerka min inokhte, ilbooyi khannan usuhi samaate ꞌheleen.

Yeesso inanki makhaabassoo muunkhee omoot kasookahcha

¹¹ Yomboka Yeesso abattitiis ichoow ururi buure khabaayi ilkerengeetti Naayin irte.

¹² Chirri us aritti ilkerengeeteet sooeleele ka, inanki kaldaye makhaabassoo muunkhee leetehe usuhi buje hawwaal liisiꞌdo kasooyegeen. Ururi buurenye ilkerengeet kayimiy la iche a leejire.

¹³ Kamur chuꞌus makhaabál arge ka, uur isoonugleeste wihi us iyidah, “Ooyine chubbah!”

¹⁴ Ulla ꞌdeerka irte, lallaabohi inanki buje lakasiꞌdo ꞌdaare. ꞌDooꞌdi siꞌdo la tolossate. Yeesso la wihi us yidah, “Irka sookahe kidowa!”

¹⁵ Inanki buje soorronte, yeyyeede. Yeesso la inam abarti desse dahan gesse.

¹⁶ Icho tuumman roorro gesse, Waakh saaꞌdeene, “Etoo weene Waákh íyeyyeedo goyteen a yimiy. Waakh a yimiyye ꞌdooꞌdiis gargaara,” yidaaheen.

¹⁷ Yeessó woriis ili Yaꞌhuud ichoow ilassi addane isoodow tuumman kataaꞌhe, ladaage.

Yoohanahi Enenyet Baattissiyo usu Yeesso Ki Lasubhe yahe worsata

¹⁸ Abatti Yoohanahi Enenyet Baattissiyo wor Yeesso tuumman Yoohana siisse. Ulla chirraakka et lamma wahe,

¹⁹ Kamur iergate wihi us worsate, “At a Ki Lasubhe lasugo, bal etoo addane sugna?”

²⁰ Reeraas lammee chirri us Yeesso iirte, wihi us iyidah, “Yoohanahi Enenyet Baattissiyo nah sooergate, mehe worsata ya, Ki Lasubhe lasugo a ati, bal etoo addane sugna?”

²¹ Yeesso la chirraakka ꞌdooꞌdi ittaawenye khakkhannan ichoow ki bolokh khabo ichoow ki ginnayyo dakhtaan samaache. ꞌDooꞌdi ittaawenye indo laa la indo fure.

²² ꞌDeerka wihi us reeri lasooergate ilaabe, “Nyaama nokhda, Yoohana waha atin agarteen ichoow waha atin daagteen icheeka. ꞌDooꞌdi indo laa indo a bahcha, ki goorat luhlo ikhabin la luhlo a bahcha. ꞌDooꞌdi buꞌdayyo sar kakhabe a lasamaacha, ki dogo laa la dogo a bahcha. ꞌDooꞌdi tuume omoot a lakasookahcha, ꞌdooꞌdi wahanyeyyohi Waakh miinsan ka miskiine la Wori Haaggan a liicheeka.

²³ Eti Waakh imaalo a ki jeenteteey u kakhuufnaanki us ikakhuufo iꞌdiin.”

²⁴ Inkoo reeri kootte Yoohana sooergate nokhte ka, Yeesso Yoohana woriis urur kaleeyyeede, wihi us yidah, “Bal wihi atin hidaad ka iratteene sooagarteen kamalda. Etoo ꞌdabakhenye iꞌdi hoosi hafar sesseehicho mee iratteene agarteen.

²⁵ Bal wihi atin iratteene sooagarteen kamalda. A etoo gaaddi haaggan khabo? Mele! ꞌDooꞌdi gaaddi gato miige khabo jiroti wohoo liiwaayin jiro, a ꞌdooꞌdi minassi karnatoot fiddiyo.

²⁶ Iꞌdaasenyi mehe iratteene agarteen? Eti Waákh iyeyyeedo agarteen? Rumanka eti atin agarteen, eti Waákh íyeyyeedo laka a kussanyahe.

²⁷ Eti woriis Chiirnaanneti Waakh ka lachiire a kan. “ ‘Yeya, ergattiteey ortaahha erga, iche rubeyohi enenyete tannabissa.’

²⁸ Wihi an atin iadeeh weeli enenyet goyaka, eti Yoohana kaween ma jiro. Iꞌdaasenyi eti dakhi Waakh ka ꞌdaran laka, us Yoohana a kaweenyahe.”

²⁹ Enenyet tuumman, ꞌdooꞌdi kooddi goocho laka, chiꞌicho wihi Yeesso yidah daageen ka, saggi jiti Waakh ifissanyahe khaatteen, a mehe Yoohaná icho baattissiye.

³⁰ Iꞌdaasenyi Farissaayo ichoow tagaammeti amurre jeenteti Yoohana icho ibaattissiyin u, mali Waakh icho ikhabe a ꞌdiiꞌdeen.

³¹ “Kamalda bal, ꞌdooꞌdi weyꞌda ꞌdeerka mehe iokkanaacho? Icho mehe iyoogyahiin?

³² Icho a iꞌdi nyaakhuti sokko goyaka nyaakhutoo addan kariiro, “ ‘Nah a gurroonne, atin la gurro ma nah leeokkhin, nah geeyi maanti enenyet buje ladowo atin a isoodowne, atin la ma ooyin,’ isidowo.

³³ A mehe Yoohanahi Enenyet Baattissiyo maanti us yimiy farsotoo rucchule sabiib laka ma ubhaabane, toro la geeddi buure af hiite, atin la jeentetaas u wihi atin tidaaheen, ‘Usu alah ginna dakhatta!’

³⁴ Ínam Aadam la a yimiyye golossate, farsoti sabiib laka dame, atin la mehe tidaaheen ya, ‘ꞌDamaanki toro meleefeenye ꞌdooꞌdi kooddi goocho ichoow ki uskeel leh aal kabahsati kalla.’

³⁵ Iꞌdaasenyi kharati Waakh runtiche jiroti ꞌdooꞌdi raaho tuummane lakaarga.”

Yeesso makhaabassoo fatal ꞌdaran uskeeliche ikakuta

³⁶ Etoo Farissaayee maantoo Yeesso golol iwahe, Yeesso la ꞌdeerka minki etaas irte, komborti ballaaddane lakagolossati garabiche ka dikkil kareeye.

³⁷ Makhaabassoo ilkerengeettaas ka uskeel kaassohatte chiꞌiche saggi Yeesso minki etaas Farissaayee ikagolossati daagte ka, kurunkoo daakki alabaasta lakahaaggiche, miricchi kijiro sookhaatte.

³⁸ Yeessohi dikkil kajiifo adahtiis tolossatte ooyte, ilmohiche ka luhlohiis khuyyaamisse. ꞌDeerka tinticheti matah ka hiyyaayte, luhlohiis doddongatte, miricchi ka subahte.

³⁹ Eti Farissaayo Yeesso golol iwahe chirri us waha arge ka, wihi us uuriis goyaka yidah, “Chirri kootte rumanka eta eti Waákh íyeyyeedo yahe, makhaabassa ꞌdaꞌddaarto eti iche tahe a garta, saggi iche uskeel ikaassohatte a garta!”

⁴⁰ Yeesso wihi us ilaabe, “Siimon an wohoo an kisoocheeko a khaba.” Ulla wihi us yidah, “Eti ween isoocheek.”

⁴¹ Yeesso la wihi us iyidah, “Reeroo lammee etoo kamurenye mog kakhabe. Etoo chilimmeti eti orrah kud chan hil haaggiche laguto iche kakhabe, ki addan la chilimmeti eti orrah tomon chan hil haaggiche laguto iche kakhabe.

⁴² Inkoo reera lammatiis ba mog gunnaan agaafte ka, eti goorat chilimme leh, lammache ba mog leeꞌdiiche. Kichokoh ꞌdeerka eti mog leh weyti ꞌdoona?”

⁴³ Siimon wihi us ilaabe, “Ani ka, ki chilimmeti buure laleeꞌdiiche.” Yeesso la “Mujjume goosse,” iyidah.

⁴⁴ Yeesso ꞌdeerka makhaabál iurgiye wihi us Siimon iyidah, “Siimon bal makhaabassa yey! At uus an kootte minkaah imiy bicchehi an luhlo kadikhdi laka ma isiinne, iꞌdaasenyi iche ilmohiche ka luhlo a ikhuyyaamisse, tintiche ka la a ihiyyaayte.

⁴⁵ At dongo ka ma isoodowwaanne, iꞌdaasenyi makhaabassa uus kootte an imiy luhloheey dongo ma kagoon.

⁴⁶ At subakki geeyi oolif ka matah ma isubhine, iꞌdaasenyi iche luhloheey miricchi ka a subahte.

⁴⁷ Maantaka wihi an kiadeeh, makhaabassa uskeelicheki ittaawe a liikakute. A mehe ꞌdooninti buurenye itusatte. Iꞌdaasenyi eti uskeeloo rucchul liikakute ꞌdoonintoo rucchul on Waákh tusta.”

⁴⁸ Yeesso la wihi us makhaabál iyidah, “Uskeelaah a liikaakute.”

⁴⁹ Martiti kootte golossatti wihi iche isitidah, “Eta uskeel laka ꞌdooꞌd ikakuto a ayyo?”

⁵⁰ Yeesso wihi us makhaabál iyidah, “Kakhuufnaanki at ikakhuufte a kiribe, tab nebey leeiro!”