Luuka 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso a Kamuri Seeri Lanaso

¹ Maalinkoo Seeri Lanasee Yeesso abattitiis khabaayi gosase goya raaha. Abattitiis la ilmohoo ꞌdargaayye guratte, dahanohicho ka butatte tuhum.

² Farissaayotoo la wihi iche worsatte, “Atin a iꞌdoh Seeri Lanaso ka wihi amurre ꞌdiiꞌddantahe iyeessaan?”

³ Yeesso wihi us icho ilaabe “Atin injire wihi Dawuud yeele maanti usu ichoow ꞌdooꞌdi us khabe ba raarahteen Yeedi Waakh ka ma soomin a?

⁴ Dawuud uranti minki Waakhe gele, makaateti Waakh liibahche khaate, yuhuyye, toro reeri leejire laka wohoo siiche. Amurreti laraaho ka la kuhaaniyyo kaldaye makaatetaas yaham.”

⁵ Yeesso la wihi us icho iyidah, “Ínam Aadam a Kamuri Seeri Lanaso.”

Yeesso etoo dahan laa samaacha

⁶ Maantoo addane Seeri Lanasee ka, Yeesso toro minki weysiite Yaꞌhuud gele, ꞌdooꞌd wori Waakh abche. Etoo dahanti miigeet hanjaawte la intaas a kijire.

⁷ Farissaayo ichoow tagaammeti amurre wohoo icho Yeesso kacheektaane yowtaane, ꞌdeerka usu Yeesso Seeri Lanaso ka etaas samaacho mujjum fiiricheen.

⁸ Iꞌdaasenyi Yeesso malicho a garta wihi us eti dahan laa iyidah, “Kah enenyet tuumman ortiis tolosso.” Et ꞌdeerka kahe intaas tolossate.

⁹ Yeesso ꞌdeerka wihi us icho iyidah, “Wihi an atin worsadi, wihi haaggane layeelo ichoow suujoonki layeelo koh amurreteen israahaan? Jiroti enenyete laribo israahaan bal jiroti enenyete labaabiicho?”

¹⁰ Yeesso icho tuumman indo leeraahe ꞌdeerka wihi us et iyidah, “Dahantaah fiti!” Et iꞌdaas yeele, dahane toro tuum haagsatte.

¹¹ Iꞌdaasenyi sirgoweene, iꞌdi icho Yeesso yadeehiin isworsan sookhabteen.

Yeesso ergaanotiisti tomon ichoow lammee soobahsata

¹² Ibeennetaas kichekoo Yeesso bahe burroo kore, ibeenki nool Waakh wahte.

¹³ Chirri il soobaryo ka abattitiis isiwahe, goyche ka et tomon ichoow lamma soobahche, ergaanotiis kayeesse.

¹⁴ ꞌDooꞌdaas us soobahsate a Siimonhi us magahoo addan ibahche Beetero yidah, walaaliiski Andereeya layadeeh, Yaakoobo, Yoohana, Fiilif, Barꞌdolomaayo,

¹⁵ Mattaayo, Toomas, Yaakoobohi inam Alfaayee, Siimonhi magahiis Yaaftiisꞌdoone layadeeh ichoow,

¹⁶ Yuuda inam Yaakoobo ichoow Yuuda Iskaariyoot ki yomboka Yeessó ꞌdub gooche.

Yeesso ꞌdooꞌd walah abcha toro samaacha

¹⁷ Ulla ergaanotiis khabaayi bur kasookhubte ꞌdowhoo tolossate. Ururi buurenye abattitiise ichoow ꞌdooꞌdi ittaawenye boroofenhi Yaꞌhuudiya ichoow ilkerengeetti weene Yeerusaleem ichoow ilkerengeetohi rurrucchule beyti buure afiche yaalle iꞌdi maanta Tiiro ichoow Siidon illehe laka, intaas a kijire.

¹⁸ ꞌDooꞌdaas tuumman la a yimiyye ꞌdee wihi Yeesso essi dagansata, toro sugeerreticho lakasamaacha. ꞌDooꞌdi ginnayyo dakhtaan laka lasamaache.

¹⁹ ꞌDooꞌd tuumman ebba Yeesso ꞌdaarin ꞌdoona, iꞌdi tahe miige usu kasoobahta icho tuumman samaassa.

Yeesso ꞌdooꞌdi Waakh imaalo ꞌdooꞌd icheeka

²⁰ Yeesso la abattitiis yeye, wihi us yidah, “ꞌDooꞌdi Waakh imaalo, a atinhi toolla miskiine, a mehe dakhi Waakh a kiinna.

²¹ ꞌDooꞌdi Waakh imaalo, a atinhi toolla raarah khabtaan, iꞌdi tahe a atin ladargichaa! ꞌDooꞌdi Waakh imaalo, a atinhi toolla ooytaan, iꞌdi tahe a atin lahamaadichaa.

²² Waakh a atin imaala maanti enenyet jeente Ínam Aadam u atin ꞌdiiꞌdo, atin riho, ommos atin abaaro, magahiin uskeeli nool kawaho.

²³ “Taba giꞌde chirri sina atin lakawaariche laka, weyti hamaada, girꞌdaama, iꞌdi tahe Waakh goobiis ka kalaꞌddi buurenye atin gutaa. A mehe ooyenyetiche saggaas on ꞌdooꞌdi Waákh íyeyyeedo sina ikawaaarisse.

²⁴ “Iꞌdaasenyi atinhi toolla kamurree sinati atin sugto eenna a buure! Iꞌdi tahe haaggi harrata orey on uur atin khobooche.

²⁵ Atinhi toolla dargan, sinati atin sugto eenna a buure! Iꞌdi tahe a raarahattaan. Atinhi toolla hamaaddaan sinati atin sugto eenna a buure! Iꞌdi tahe a uuwwissaane ooytaan.

²⁶ Atinhi toolla ꞌdooꞌd tuumman atin koolicho, sinati atin sugto eenna a buure. Iꞌdi tahe aacchinyetiin laka goorat saggaas on ꞌdooꞌdi ꞌdooꞌdi Waákh íyeyyeedo iskaayyeelo ikoolisse.

ꞌDooninti chiiy laꞌdoono

²⁷ “Atinhi idagansattaan wihi an atin iadeeh, chiiytiin ꞌdoona, ꞌdooꞌdi atin ꞌdiiꞌdo la haag on tusa,

²⁸ ꞌdooꞌdi atin falo imaala, ki atin leeabaarramo la Waakh iwaha.

²⁹ Chirri etoo fodooroo kiguꞌdde, fodoori addan laka siiche a kiguꞌddo. Chirri etoo kabuuꞌdaah kaakhaate, ubbaaraahki deere us khaato laka atiran.

³⁰ Eti tuummane walah kidaahe siiche, chiꞌ etoo wohoo wahaahe khaate la, aleemarmine a kasookhaatin.

³¹ Wihi kootte incheenka atinhi atin liiyeelo ꞌdoontaan, ꞌdooꞌdi addan iyeela.

³² “Chirri atin ꞌdooꞌdi atin ꞌdoono kalday on ꞌdoontaan, walah iche atin ibahto mele. ꞌDooꞌdi uskeel leh laka, ꞌdooꞌdi icho ꞌdoono a ꞌdoonaan!

³³ Chirri atin ꞌdooꞌdi haag atin iyeelo kalday on atin laka haag iyeessaan la walah iche atin ibahto mele. ꞌDooꞌdi uskeel leh laka iꞌdaas a yeela on.

³⁴ Chirri atin ꞌdooꞌdi mog atin kagele ꞌdee atin mogtaas kasugtaan kaldach on mog siissaan la mehe atin ibahta? ꞌDooꞌdi uskeel leh laka, ꞌdooꞌdi addane uskeel lehe ꞌdee mog sooguto mog a siicha on!

³⁵ Iꞌdaasenyi taba chiiytiin ꞌdoona, haag iyeela, mog siicha ichohi atin isooguto asugina. ꞌDeerka kalaꞌddiin la a buuraatta, toro nyaakhuti Waakkhi Weyti Weene tateehiin. A mehe us ꞌdooꞌdi kalaꞌd ikhabin ichoow ki sussuuje uur a iꞌdabakhyahe.

³⁶ Saggi Aabbahiin uur inugulyahe u, atin laka ꞌdooꞌdi addan uur inugleesda.

Wihi at enenyet igoosso iche ati laka lakigoocha

³⁷ “Taba uurassiin goyaka enenyet ahukkumina uus Waakh atin hukkumine. Taba enenyet uskeele yeesseen iidowina, uus atin laka uskeele yeesseen atin liidaahane. Taba enenyet uskeel ikakuta, ꞌdee uskeeliin a atin liikakuto.

³⁸ Enenyet walah siicha, atin la walah a atin lasiichaa. Wihi buurenye, meel liijahe, laruhe ichoowka khubti iche sabho lakaachiba. A mehe geeddi atin ꞌdooꞌdi addan iyeessaan, geeddaase atin liiyeela.”

³⁹ Mammahta laka ꞌdooꞌd ibahche. “Etoo indo laa, koo indo laa a angaamicha? Lammache ankhar ma iskaleedihto?

⁴⁰ Eti walah laabcho, eti walah abcho ma kaween. Iꞌdaasenyi eti tuummane walah mujjum laabche, iꞌdi eti walah abche yateeh.

⁴¹ “A iꞌdoh urufti il walaalaah kijirto iagarta, gurtunki issaah goya kijiro la iargin?

⁴² At saggoh walaalaah, ‘Walaalaaw, alley uruftaas il kaajirto a kaabahcho,’ ikatadeeh ati rubeytaah la gurtunki issaah goya kijiro ma agarto? Iskaayyeessooy koloo gurtunki issaah goya kajiro bihiche, ꞌdee urufti il walaalaah goya kajirto mujjum agare, bihi.

Wihi uur kaajiro on soobaha

⁴³ “Geey haaggane gurnaanki suuje bahcho mele, geey suujenye gurnaanki haaggan bahcho mele.

⁴⁴ Geeyba gurnaanki us bahcho lakaabta. Iyookkoka geeyi bilhil dommog ma kaguratti ommos geeyi khasah medeer ma kaguratti.

⁴⁵ Eti haaggan uuriis laka a haagganyahe gone, haaggaas on dela. Eti suuje la uuriis a suuj gone suujoonkaas on dela. A mehe wihi afiis kasoobaho, a wihi uuriis goya buuho.

Eti min diso kharee ichoow ki min diso ꞌdalame

⁴⁶ “A iꞌdoh ani, ‘Kamur, Kamur,’ ikadowtaane wihi an atin idowo la iyeelina?

⁴⁷ Eti ani iyamiite wihi an idowo daago toro la raaho, wihi us iyoogyahe a atin tusa.

⁴⁸ Etaas a iꞌdi eti min diso, weyti il khute, inti ngꞌaajjee ka daddaabohi ilaat dise. ꞌDuley yimiyye, bicchehi buure minkaas guꞌddeene, iꞌdaasenyi ma sesseehin, iꞌdi tahe mujjume disanyahee.

⁴⁹ Iꞌdaasenyi eti yeedeey daago toro iraahin a iꞌdi eti min dise min la daddaabohi ilaat ikhabin. Uus hafari miige sookahe minkaas guꞌdde, min tuumman reye, bar waaye.”