Luuka 23 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso Bilaato liigeecha

¹ Jaldaabti Ween tuumman ꞌdeerka kahte Yeesso woyte Bilaato igeesse.

² Chirraas on usu cheekteene wihi icho yidaaheen, “Eta usuhi yaafteen baabiicho khabanne. Karnati ili Rooma kooddihi liiguto ꞌdiiꞌda, Ki Lasubhe karnatenye iskawaha.”

³ Bilaato la wihi us Yeesso worsate, “Karnati Yaꞌhuud a ati?” Yeesso wihi us ilaabe, “A rum, a iꞌdaas at elatti on.”

⁴ Bilaato la wihi us kuhaaniyyohi wewween ichoow urur ba iyidah, “An eta walah lakacheekti an argo mele.”

⁵ Iꞌdaasenyi weyti tirriinsateene wihi icho yidaaheen, “Ili Yaꞌhuudiya tuumman ka ꞌdooꞌde walah abcha, ichoowka enenyet seley fida. Wihi us ꞌdooꞌd abcho la boroofenhi Gaalilaaya kasookhabte ichoowka toolla inta yimiy.”

Bilaato Yeesso karnati ꞌHerood layadeeh ierga

⁶ Chirri Bilaato waha daage ka usu eta ꞌdooꞌdi Gaalilaaya yahe worsate.

⁷ Chirri us saggi Yeesso ili ꞌHerood itoollo ikayimiy kase ka, Yeesso ꞌHerood ierge. ꞌHerood rubeytiis la geedda ka ilkerengeetti weene Yeerusaleeme kajira.

⁸ ꞌHerood la chirri us Yeesso arge ka hamaade, iꞌdi tahe geeddi deere yeed Yeesso daage, ulla geeddi deere usuhi Yeesso argo ꞌdoone. Ulla Yeessohi wihi weeli enenyet yeelin iubaaꞌdan yeelo khajjeela.

⁹ Ulla Yeesso wihi buure worsate, iꞌdaasenyi Yeesso walah us ilaabe mele.

¹⁰ Kuhaaniyyohi wewween ichoow tagaammeti amurre intaase toollaane, weyti riireene Yeesso cheekteen.

¹¹ ꞌHerood ichoow iskartiis ba Yeesso lakhaanyo kadoweene kachaarteen. Darfohi karnat gesseene, khaateene Bilaato ilaabeen.

¹² Maalinkaas goya, ꞌHerood ichoow Bilaato ba aal yitaaheen, goorat ꞌhor la a isichiiy.

Yeesso omoot liigoocha

¹³ Bilaato kuhaaniyyohi wewween ichoow ꞌdooꞌdi wewween ichoow ꞌdooꞌdi addan ba isiwahe,

¹⁴ wihi us iyidah, “Atin eta ani ikeenteene, ꞌdooꞌde baabiicha sirgaal ꞌdiiꞌda idowa tidaaheen. Ani la ortiin ka wihi nool worsade wohoo kaldaye atin kacheekatteen la an ma kaargin.

¹⁵ ꞌHerood laka walah suujenye eta yeele us arge mele, jeentetaase toro inno ikasoolaabe. Eta walah us yeele omoot liigoocho mele.

¹⁶ Maantaka laajja on ka a ladoocho ꞌdee a laꞌdiicho a irti.”

¹⁸ Urur dakkhamba hooyoo kalday ka riire, “Eta agiise, Barraba nah isoofur!”

¹⁹ Barraba la goorat wihi jeela lakagesse, ilkerengeetti weene Yeerusaleem ka, ꞌdooꞌdoo sirgaal ꞌdiiꞌdo goya kijire, toro la enenyet laka yigis.

²⁰ Bilaato usuhi Yeesso ꞌdiicho ꞌdoona, toro urur inokhte.

²¹ Iꞌdaasenyi urur riire “Massalaaba kakaah! Massalaaba kakaah!” esse.

²² Bilaato toro koli seyyahnaatteet icho leeyeede, “A iꞌdoh? Eta suujoonkoh yeele? An wihi eta yeele omoot liikagoocho ma argo. Maantaka a lajaha one ꞌdee laꞌdiicha.”

²³ Iꞌdaasenyi weyti riireene katirriinsateene, usu massalaaba a lakakaaho, ichoowka Bilaato jeenteti riirit u ꞌdooꞌd agaafte.

²⁴ Bilaato ꞌdeerka wihi icho daaheen siin gooche.

²⁵ Eti icho daahenee goorat sirgaal ꞌdiiꞌdo toro la enenyet yigisye jeela kijire soofure. Yeesso la dahanticho gesse ꞌdee wihi icho ꞌdoonaan a yeeleen.

Yeesso massalaaba lakakaaha

²⁶ Chirra icho woyaan ka, etoo ilkerengeetti Kureene Siimon layadeehe gosiis kayimiy khabteene, massalaaba korcheene ihosseene ulla Yeesso ꞌdubiis leeraahe.

²⁷ Ururi buure la Yeesso ꞌdubiis leeyimiy. Urur goyaka la deyyehotoo jeente Yeessuu ooyto uuwwisso a jirta.

²⁸ Yeesso la wihi us deyyehota iyidah, “Deyyehoti ilkerengeetti weene Yeerusaleem, ani iooyina, atin on isooya, toro la nyaakhutiin ooya.

²⁹ Iꞌdi tahe ibeen a yamiit ki ‘Deyyehoti Waakh imaale, a ti mahanenye injire ideline, weel inuugsan,’ layadeeh.

³⁰ ꞌDeerka, “ ‘Halal mehe iyadeehiin ya, “Nah kasooreya!” Kuro la mehe iyadeehiin ya, “Nah dagcha!” ’

³¹ A mehe chirri ꞌdooꞌd anihi fissan sinati geeddee ituso, ꞌdooꞌdi suujoon yeele sinati weyti buurenye kawaarichaan.”

³² Reeroo addane lammeenye chiftee laka usu a laleekhaate, ꞌdee layagiis.

³³ Chirri icho meessi Lafohi Matahe Enenyet layadeeh sooeleeleen ka, Yeesso intaas ka massalaaba kakaaheen. Chiftati lammee laka leekaahte. Koo ankiiski miigeet kakaaheene, ki addan la ankiiski gurro kakaaheen.

³⁴ Yeesso wihi us yidah, “Aabba, ꞌdooꞌda uskeelicho ikakut! Iꞌdi tahe wihi icho haaggichaan ma gartaanee.” Kura guꞌddateene gaaddiis gisante.

³⁵ Urur a toolla ꞌdeyꞌdoocha, ewweenki Yaꞌhuud la Yeesso kachaarta. Wihi icho yidaaheen, “ꞌDooꞌdi addan a ribe, chirri us rumanka Ki Lasubhe Koo Waakhenye Ki Lasoobahsate yahe, bal a isribo!”

³⁶ Iskare laka timiyye usu kachaaratte, farsoti sabiibe birrakhe siisse.

³⁷ Wihi icho iyidaaheen, “Chirri at karnati Yaꞌhuud tahe isrib.”

³⁸ Matakkiis sartiis la wihi lakachiire a mehe ya, Waha a Karnati Yaꞌhuud.

³⁹ Chiftataas Yeesso laleekaahe koo Yeesso leeabaarrame wihi us iyidah, “At a Ki Lasubhe gone, isribe nah laka nah rib!”

⁴⁰ Iꞌdaasenyi ki addan leejaakhe wihi us iyidah, “At Waakh ma karoorto? At laka iꞌdiis u omoote lakigooche.

⁴¹ Lammateen jeenteti uskeeli inno yeelle on inno liiyagiis, iꞌdaasenyi us walah suujenye us yeele mele.”

⁴² ꞌDeerka wihi us yidah, “Yeesso maanti at karnati dakhaah titah ikasooꞌhel.”

⁴³ Yeesso wihi us ilaabe, “Rume kicheeka, at maalinka goobi Waakh ka a ileejirta.”

Yeesso rubey goocha

⁴⁴ Geedda ka il a geeddi sahaꞌd lihti maalimeet, il tuumman la mugꞌdi yitahye, ichoowka sahaꞌd saagaale eleesse,

⁴⁵ a mehe orrahe banay soobihin a ꞌdiisse. Dafarti weyti yobbeenye minki Waakhe buure seley goosso meel lamma seley igoote.

⁴⁶ Yeesso la hooyi buure ka riire, wihi us yidah, “Aabba, rubeyteey dahantaahha soogessa!” Chuꞌus yeeda massiche ka massate.

⁴⁷ Chirri eti koobbintoo iskareet itoollo wihi yitah arge ka, Waakh saaꞌde wihi us yidah, “Rumanka eta eti fissane eheet!”

⁴⁸ Chirri ꞌdooꞌdi tuummane kootte sookulme wihi yitah ꞌdeyꞌdooche wihi yitah arge ka, bolokh ka kacchach isguꞌddeene irteen.

⁴⁹ Iꞌdaasenyi ꞌdooꞌdi usu garti tuumman deyyehoti goorat boroofenhi Gaalilaaya kasooraahte khabaani foga tolossateene wahanyeyyoha ꞌdeyꞌdoocheen.

Yeesso lahawwaala

⁵⁰ Etoo Yuussuf layadeehe ilkerengeetti Arimaꞌdaaya ili Yaꞌhuudiya kajirto yaal la a jira. Ulla a etoo haaggane toro fissane toro dakhi Waakhe suga.

⁵¹ Ulla a etoo Jaldaabti Weene Yaꞌhuud goya kijiro, iꞌdaasenyi wihi icho goocheen ichoow wihi icho yeeleen ma leegoon.

⁵² Ulla Bilaato iirte sar Yeesso daahe.

⁵³ ꞌDeerka massalaaba kasooyagche, dafartoo kaayyuube goꞌddoo daddaab ka lakhute, injire enenyet liikahawwaalin goya kareeche.

⁵⁴ Waha la a Ibeenki Latannabti, Seeri Lanaso la a soodeylanta.

⁵⁵ Deyyehoti Yeesso ilkerengeetti Gaalilaaya ka sooraahte la Yuussuf raahte goꞌddi Yeesso lakahawwaale ichoow saggi sartiis goꞌddaas ka liireeche argeen.

⁵⁶ ꞌDeerka goob inokhteene miricchi ichoow geeyohi uyuuggee tuumman tannabicheen. Waha la a wihi icho sar Yeesso kadowaan. Iꞌdaasenyi Seeri Lanaso ka naseen iꞌdi amur iꞌdoonuu.