Luuka 22 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Ogoossi Yeesso layagiis dagsi ka larerreega

¹ Daawti Makaateti Liikhasine daawti Baasakka layadeeh a soodowwaatte.

² Kuhaaniyyohi wewween ichoow tagaammeti amurre jitoo iche Yeesso katagiise yowatta, a mehe enenyete karooraan.

Yuuda usuhi Yeesso ꞌdub goocho ayyicha

³ Seytaan la Yuudahi Iskaariyoot layadeehe abatti Yeessoti tomon ichoow lammee kichekoowe gele.

⁴ Yuuda la kuhaaniyyohi wewween ichoow ꞌdooꞌdi iskarti minki Waakhe buure yaakhisso itoollo iirte, saggi us Yeesso ꞌdub igoocho kaleehawwooche.

⁵ Icho la weyti hamaadeene chilimmeti icho siichaan goocheen.

⁶ Yuuda la ayye yidahye, inti leemujjumenye us Yeesso inti urur ikajirin ka dahanohicho kagesso yowte.

Yeesso gololi daawti Baasakka abattitiis leeyaham

⁷ Ibeenki Daawti Makaateti Liikhasine heleenki daawti Baasakka lasoorriyoocho yitah.

⁸ Yeesso Beetero ichoow Yoohana ergate wihi us iyidah, “Nyaama inti inno gololi daawti Baasakka kanaham inno ihaaggicha.”

⁹ Icho la wihi icho worsateen, “Intoh ꞌdoonta, katannabanna?”

¹⁰ Wihi us ilaabe, “Chirra atin ilkerengeet gessaan, etoo ꞌdirihi biccheet siꞌdo afiin a kayamiit. Raaha minki us gelo leegela.

¹¹ Wihi atin ooyohi min leh itadeehiin, ‘Eti Ween mehe kiyidah ya, min goyaka meessi marti ani ichoow abattiteey gololi daawti Baasakka kanaham meeke?’

¹² Meessoo buurenye minkiis sartiisenye meeh tuumman khabto iche atin tusa. Intaas ka golol haaggicha.”

¹³ Abatti bahte, walah dakkhan ba iꞌdi kootte us iyidah on iꞌheleen. ꞌDeerka gololi daawti Baasakka haaggisse.

Gololi Kamur

¹⁴ Chirri sahaꞌde titah ka, Yeesso ichoow ergaanotiis komborti ballaaddane lakagolossati garabiche ka dikkille kareeyeen.

¹⁵ Ulla wihi us iyidah, “Ani weyti anihi golola Baasakka geeddi sina liikawaarin atin leeaham imoone.

¹⁶ Iꞌdi tahe wihi an atin isoocheeko, toro ma atin leeahame ichoowka wihi goorat liidah goobi Waakh ka labuuhicha.”

¹⁷ Chirraakka kokkooboo farsoti sabiib kajirto okkhiche Waakh kalaꞌd ilaabe wihi us abatti iyidah, “Waha khaata ebba a anguunti.

¹⁸ A mehe wihi an atin isoocheeko, an farsoti sabiib toro ma damo, ichoowka dakhi Waakh yamiit.”

¹⁹ Makaate khaate Waakh kalaꞌd ilaabe, jejjebche abatti ididdiibe wihi us yidah, “Waha a sarteeyti atin liisoobahche, amha ꞌdee ikasooꞌhela.”

²⁰ Saggaas on u, inkoo icho gololi gelebeet yumheen ka, kokkoob khaate wihi us yidah, “Kooba a ayyinti husube Waakh enenyet diiggeey ka igoocho, a diiggi iroonotiin liikhubo.

²¹ Iꞌdaasenyi dahanti eti ꞌdub isoogoocho dahantaaya komborta ballaaddan kaleejirta.

²² Ínam Aadam iꞌdi goorat Chiirnaanneti Waakh lakachiiruu, a yamuute, iꞌdaasenyi eti usu ꞌdub goocho sinati sugto eenna a buure.”

²³ Abatti eti waha sooyeelo isworsatte.

Abatti eti goycho ka ween isworsatta

²⁴ Iche la toro eti goycho ka eti weyti ween liiekkaacho isleeiriirte.

²⁵ Yeesso la wihi us icho iyidah, “Karnatohi ꞌdooꞌdi Waakh igaran saggi suujenye ꞌdooꞌd idakhtaane, icho la ꞌdooꞌd, ‘Nah a aalassiinna,’ idowaan.

²⁶ Iꞌdaasenyi atin iꞌdaas iitaahana. Eti goytiin ka weyti ween, iꞌdi eti weyti rucchul a yitaahe, eti enenyet dakhti la iꞌdi falfa a yitaahe.

²⁷ A mehe, ayyo maanta ween, eti orronti golol karam liikachibo yaham a, bal eti karantaas golol kasoochibo? Rumanka eti ween a ki golol karam liikasoochibo yaham on menya? Iꞌdaasenyi an goytiin ka a iꞌdi eti golol karam atin ikachibo.

²⁸ Atin a ki maanti an sinayyohi ikajo ꞌhele ileejire.

²⁹ Saggi Aabbaheey dakh dahanteey isoogessuu, ani laka dakhaas dahantiinna gessa.

³⁰ Atin la ꞌdee goobeey ka ileegolossattaane, komborohi antoot koorromattaane, yaafoheenki Issiraayele tomon ichoow lammee anattaan.”

Yeesso Beeterohi sooꞌdiiꞌdo orey on cheeka

³¹ Yeesso toro wihi us yidah, “Siimon, Siimon, daganso! Seytaan saggi enenyet ꞌdargaayye ichoow chaafo seley ibahchuu, antohi us atin kakajo a daahe.

³² Iꞌdaasenyi Siimon, an a kisooweesde ꞌdee mujjum orey isohatta ani ikakhuufta. Chirri at isoonokhatte la ꞌdooꞌdi irummeeste uure miigoossa.”

³³ Iꞌdaasenyi wihi us ilaabe, “Kamur, an a geeddi an jeela kileegelo, toro kileeamuut laka.”

³⁴ Yeesso wihi us ilaabe, “Beetero wihi an kisoocheeko, ibeenka goya geeddi lukki iriirin, at kol seyyahe ꞌdiiꞌdda, ma igaratti tadeeh.”

Yeesso abattitiis waanicha

³⁵ Yeesso ꞌdeerka wihi us abattitiis worsate, “Maanti goorat chilimme ichoow ugar ichoow kobo laan an atin ergade atin wohoo a waayteen?” Wihi iche ilaabte, “Walahba.”

³⁶ Yeesso la wihi us toro iyidah, “Maantaka, eti chilimme khabo a khaatti, ki ugar khabo ugar a khaatti, ki birlab ikhabin la kabuuꞌdiis a ororicho birlab a gatti.

³⁷ A mehe wihi chiiran, ‘Usu ꞌdooꞌdi Waakh daagiwwaaye goya lagate.’ Wihi an atin iadeeh la, waha ani liikabuuhicha. Aa, wihi ani imiinsane chiiran inti lakabuuhicho a eleelaan.”

³⁸ Abatti la wihi iche tidah, “Kamur inta yey, birlab lamma a khabna!” Wihi us ilaabe, “Geeddaas a atin yaakhta.”

Yeesso Hali Geeyohi Oolif ka weesta

³⁹ Yeesso bahe, iꞌdi orrankateet u Hali Geeyohi Oolif irte, abattitiis la raahte.

⁴⁰ Chirri icho meel eleeleen ka, Yeesso wihi us abatti iyidah, “Waakh wahda ꞌdee kajmeti uskeel atin kaluguꞌddo akidihina.”

⁴¹ Abattitiis kelee kaseehe, geeddoor daakki laseyo eleelo ileeirte, jilbo il kaguꞌdde Waakh wahte, wihi us yidah,

⁴² “Aabbahaaw, chaꞌat ꞌdoonto kokkooba sinayyoot ikakhaat. Iꞌdaasenyi in an ꞌdoono menye, in at ꞌdoonto a titaahe.”

⁴³ Hertoo Waakh la goobi Waakh ka timiyye, isoobahte, miig siisse.

⁴⁴ Bolokkhi buure goyaka geeddi kootteet laka ꞌdirihiis Waakh wahte, iꞌdiꞌdi us ꞌhooricho harra kaaddibho la iꞌdi diiggi diddibho yitah.

⁴⁵ Chirri us weysi kasookahe us abatti inokhte ka, ichehi bolokh kurmiche uꞌdurto ꞌhele.

⁴⁶ Wihi us icho worsate, “A iꞌdoh iuꞌdurtaan? Kaha Waakh wahda ꞌdee kajmeti uskeel atin kaluguꞌddo akidihina.”

Yeesso lakhabta

⁴⁷ Yeesso yeyyeedaayi, ururoo yimiy. Eti Yuuda layadeehe abattiti tomon ichoow lammee kichekoowe iche soowoya. Ulla Yeesso iyimiy a dongataa.

⁴⁸ Iꞌdaasenyi Yeesso wihi us worsate, “Yuuda, at Ínam Aadame dongo ka ꞌdub goossa?”

⁴⁹ Chirri abattiti addane kootte Yeesso leejirte wihi sooyateeh kasse ka wihi iche tidah, “Kamur birlabbeteen ka icho ma dihno?”

⁵⁰ Kichokoo la falfati kuhaanihi weyti ween guꞌdde, nabahti miigeet ngꞌure.

⁵¹ Iꞌdaasenyi Yeesso wihi us ilaabe, “ꞌDii a geeddaas one.” Yeesso la et nabah ꞌdaare, samaache.

⁵² Yeesso kuhaaniyyohi wewween ichoow ꞌdooꞌdi ꞌdooꞌdi minki Waakhe buure yaakhicho itoollo ichoow ewweenki Yaꞌhuude usu iyimiy wihi us iyidah, “Chaꞌatin khokkhoomme ichoow birlabbe leetimaateene, ikhabattaan, an a etoo enenyet walah saro?

⁵³ Maan tuumman ani uranti minki Waakhe buure ka a atin leejire, atin la ma ikhaban. Iꞌdaasenyi waha a sahaꞌddiinna, a sahaꞌddi Seytaanki karnati mugꞌdee atin anti.”

Beetero Yeesso ma gardi yadeeh

⁵⁴ Icho la ꞌdeerka Yeesso khabteene, khaateene minki kuhaanihi weyti ween geecheen. Beetero fogaka ꞌdooꞌd ꞌdubiis sooraahe.

⁵⁵ Iꞌdaasenyi inkoo icho uram dahche ka ꞌdaboo bolkhicheene icho isleeorronteen ka, Beetero laka leeorronte.

⁵⁶ Inantoo falfee, banayhi ꞌdab ka usuhi intaas fiddiyo agarte, fiirisse wihi iche tidah, “Eta usu a leejire.”

⁵⁷ Iꞌdaasenyi leeꞌdiiꞌde wihi us iyidah, “Irta an usu ma gardi.”

⁵⁸ Inkoo geeddoo lafiddiye ka etoo addan usú arge, wihi us iyidah, “At laka a kichekoo.” Beetero wihi us ilaabe, “Eta, ani kichokoo mee!”

⁵⁹ Inkoo geeddi sahaꞌddoo lafiddiye ka etoo addan Beetero arge toro wihi us yidah, “Rumanka reenka laka usú a leejire a mehe ullaka a ꞌdooꞌdi Gaalilaaya.”

⁶⁰ Beetero wihi us ilaabe, “Eta, an wihi at kaayyeeddo ma gardi!” Beetero yeyyeedaayi lukki riire.

⁶¹ Kamur la urgiye Beetero indo kakhabte. Beetero ꞌdeerka yeedi Kamur iyidah kasooꞌhele, “Maalinka geeddi lukki iriirin, at kol seyyah, ‘Ma kigardi!’ tadeeh.”

⁶² Ulla khar ibahe, bolokh ka ooye.

Iskare Yeesso jahta toro kachaaratta

⁶³ Reeri kootte Yeesso yuubicho Yeesso kachaarnaan ichoow jahnaan sookhabte.

⁶⁴ Indo hideene, “Eti Waákh íyeyyeedoow, eti kiguꞌdde nah isoocheek,” idoween.

⁶⁵ Usu leeabaarrameene, wahanyeyyohoo addane ittaawenye sussuuje laka idoween.

Yeesso Bilaato ichoow ꞌHerood ortiis lageecha

⁶⁶ Uun il barye ka, Jaldaabti Weene Yaꞌhuude kuhaaniyyohi wewween ichoow tagaammeti amurre kijiraan ba kulmeene, Yeesso la orcho lakeene.

⁶⁷ Icho tuumman la wihi icho worsateen, “Nah isoocheek chaꞌat Ki Lasubhe tahe.” Yeesso wihi us ilaabe, “Chaꞌan atin isoocheeke, ma irummeysattaan.

⁶⁸ Chaꞌan wohoo atin worsade la, ma isoolaabtaan.

⁶⁹ Iꞌdaasenyi uus toolla kakhabatti, Ínam Aadam Waakkhi miig leh anki dahantiisti miigeete orronta.”

⁷⁰ Icho dakkhan la wihi icho worsateen, “Ati ꞌdeerka Weeli Waakhe?” Wihi us ilaabe, “Atine iꞌdaas tidaaheen.”

⁷¹ Icho la wihi icho yidaaheen, “A iꞌdoh ꞌdooꞌdoo addane gar laabo iyowanna? Afiis ka wihi us yidah a daagne.”