Luuka 21 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Sadakhati aranti muunkhee bihisse

¹ Chirra Yeesso minki Waakhe buure ka serey yeyo, ꞌdooꞌdi kamurreenye sadakhaticho saanduukhi chilimme lakalugꞌdo kichibo arge.

² Toro la makhaabassoo muunkheenye miskiinenye chilim lamma meel kaluguꞌdde arge.

³ Ulla wihi us yidah, “Rume atin icheeka, muunkhota miskiine iche ꞌdooꞌdi addan ꞌdirihiis wihi buure meel kaluguꞌdde.

⁴ ꞌDooꞌda tuumman kamurroonkicho ka sadakhatoore bahche, iꞌdaasenyi iche, miskiinkiche ka wihi iche kanoossahe tuummane bihisse.”

Yeesso saggi minki Waakhe buure liisuujaacho cheeka

⁵ Abattitiis gaasoo minki Waakhe buurenye woriis kahawwoossa. Daddaabohi hahhaaggane lakadise ichoow wihi noole ꞌdooꞌd Waakh ibahche minkaas lakeeykode woricho kaayyeedeen. Iꞌdaasenyi Yeesso wihi us yidah,

⁶ “Waha atin inta ka agartaan la, berri daddaabtoo kaldaye ti addan fuusso lakatabo ma jirto, icho tuumman a lasookhuba.”

Sina ichoow ogoossi enenyet labakkicho

⁷ Icho la wihi icho worsateen, “Eti ween, wahanyeyyoha maantoh yateehiin? Mehe yateehe ꞌdee saggi waha dowwanoha ka isooyateehiin tusa?”

⁸ Wihi us ilaabe, “Yuubsada, uus atin leekkeysan. A mehe ꞌdooꞌdi ittaawenye ani iskaayyeelo yamiite, ‘Ani a Ki Lasubhe,’ essi toro ‘Ibeen a soodowwaate,’ essi a agartaan. Icho araahina.

⁹ Maanti atin yaafohi isdiho ichoow ꞌdooꞌdi il baabiicho daagteen anahina. Wahanyeyyohane koloo yateehe, iꞌdaasenyi ibeenki yomboot chirraas on ma yateeh.”

¹⁰ Yeesso toro wihi us icho iyidah, “Sirgaalle a isdihta, karnato laka isdihaan.

¹¹ Ilassoo ka harra weyti sesseehta, ilassoo ka laka nabhayye ichoow sugeerreti ittaawe tamiit. Wahanyeyyohi buurenye enenyet kanahcho ichoow wahanyeyyohi miigti Waakh tuso serey ka a soobahaan.

¹² “Iꞌdaasenyi geeddi waha tuumman iitaahan a atin khabtaane, sina atin omhichaan. Minassi weysiite Yaꞌhuud ka atin lahukkuma toro jeelayyo atin lageecha. Karnatte ichoow gaafanayyo atin liigeecha, waha tuumman la a jeenteti atin abattiteey itahiin.

¹³ Waha ka la garti Wori Haaggan iche tateehiin.

¹⁴ Iꞌdaasenyi uurassiin goyaka goocha, orey on saggi atin isikaayyeeddaan ka awaꞌdwaaꞌdina.

¹⁵ A mehe an yeedi atin tadeehiin ichoow khara a atin siicha, ꞌdee chiiytiin tuumman goyaka koo atin tirrimin yabuuꞌd mele ommos et runti atin cheekteen ꞌdiiꞌdo mele.

¹⁶ ꞌDooꞌdi atin dele ichoow walaalinyetiin ichoow goobiin ichoow aalassiin laka ꞌdube atin goochaane, gaasiinkoo laka yagiisiin.

¹⁷ Enenyet tuumman a atin ꞌdiiꞌda jeenteti atin abattiteey itahiin u.

¹⁸ Iꞌdaasenyi tintiintoo kaldaye matahe baabaato laka ma jirto.

¹⁹ Inkoo atin garrahsatteen ka jiroti rummaat ꞌhessaan.”

Yeesso saggi ilkerengeetti weene Yeerusaleem liibaabiicho orey on cheeka

²⁰ “Chirri atin ilkerengeetti weene Yeerusaleeme iskare marisse agarteen la, saggi ilkerengeettaas inkoo dow liibaabiicho a abattaan.

²¹ ꞌDeerka ꞌdooꞌdi ili Yaꞌhuudiya fiddiyo tuumman halal a ifirdo, ꞌdooꞌdi ilkerengeetti ween goya kajiro a baho, ꞌdooꞌdi ilkerengeetti ween khariche kajiro la uus ilkerengeet goya gelin.

²² Iꞌdi tahe wahaas a ibeenneti Waakh enenyet jeenteti uskeeli us yeeluu sina tuso, wihi goorat Chiirnaanneti Waakh kachiiran labuuhicho.

²³ Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure. Wihi sussuujenye buurenye soobaha, holi Waakh la ꞌdooꞌda isoobaha.

²⁴ ꞌDooꞌd gaasoo birlabbe lakabakkicha, gaasoo laka lakhabta harra tuumman liibooliya. Ilkerengeetti weene Yeerusaleem la ꞌdooꞌdi Waakh igaran yabta, uskulaacha ichoowka ibeenneti ꞌdooꞌdi Waakh igaran labuuhicha.

Wihi maanti Ínam Aadam soonokhti yateeh

²⁵ “Orrah ichoow yeyyah ichoow yiyyihimo ba wihi ittaawenye saggi ibeenki ꞌdaꞌddaboot iyitah tuso kasoobahaan. Harra ka, ꞌdooꞌdi harra tuumman bicchehi yeedo ichoow irti biccheete kanaha.

²⁶ ꞌDooꞌd la wihi harrata isoosohti icho roorro ka sugaan ka a suuha. A mehe miigti saraat a lakorkokicha.

²⁷ Geeddaakka Ínam Aadam usuhi miris goyaka yamiite, miig ichoow antohi buure khabo argaan.

²⁸ Maanti wahanyeyyoha yateehiin tolossada, matahenyetiin kahcha, iꞌdi tahe ibeenki Waakh ribnaanki ꞌdaꞌddaboot atin ribo a soodowwaatee.”

Wihi geeyi fiig inno abcho

²⁹ ꞌDooꞌd mammahta ibahche, “Bal geeyi fiig ichoow geeyohi addan yeya.

³⁰ Maanti icho seeb bahcheen, a isiagartaane, saggi ꞌdaato isoodowwaatte a garattaan.

³¹ Saggaas on u maanti atin wahanyeyyoha ibeenki ꞌdaꞌddaboot tuso agarteen, saggi dakhi Waakh isoodowwaate a garattaan.

³² “Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin.

³³ Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.

Ibeenki yomboot doglaane enenyet soogela

³⁴ “Weyti isyuubsada uus meleefu ichoow wahanyeyyohi sussuujenye ꞌdooꞌdi meleefee yeelo ichoow waꞌdwaaꞌdi jirota uurassiin miigoonne ꞌdee ibeenkaas iꞌdi angey u doglaan atin geline.

³⁵ Iꞌdi tahe ibeenkaas ꞌdooꞌdi harra tuumman maalinkoo kalday on isleearga.

³⁶ Kol dakkhan isyaakhicha. Weesda la ꞌdee Waakh waha tuummane dowwanoha ka sooyateeh a atin kakhaduudicho, miigti atin Ínam Aadam ortiis katolossattaan a atin siicho.”

³⁷ Yeesso maalim dakkhan minki Waakhe buure ka ꞌdooꞌd wori Waakh abche, geleb dakkhan la irte Hali Geeyohi Oolif barye.

³⁸ Chirdeer tuumman la ꞌdooꞌd minki Waakhe buurenye irta, wihi Yeesso essi dagansata.