Luuka 20 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Anto Yeesso lakamalala

¹ Maantoo geeddi Yeesso uranti minki Waakhe buure ka ꞌdooꞌd ayti Waakh abcho, Wori Haaggan la cheeko, kuhaaniyyohi wewween ichoow tagaammeti amurre ichoow ewweenki Yaꞌhuud ba Yeesso iyimaateen.

² Wihi icho iyidaaheen, “Bal nah isoocheek, antohi at wahanyeyyoha kahaaggisso a weheeyya? Antoha ayyo kisiiche?”

³ Wihi us ilaabe, “An laka wohoo atin worsada, bal isoolaaba.

⁴ Yoohanahi Enenyet Baattissiyo, antohi us enenyet kabaattissiyo, Waakhe kayimaateen, bal enenyet?”

⁵ Iskaleehawwoocheene wihi icho isiyidaaheen, “Chiꞌinno, ‘Waakhe kayimaateen,’ nadeeh, mehe inno iyadeeh ya, ‘A iꞌdoh irummeysanna?’

⁶ Iꞌdaasenyi chiꞌinno, ‘Enenyete kayimaateen,’ nadeeh, ꞌdooꞌd tuumman dagahe inno kachiba, iꞌdi tahe icho tuumman Yoohana eti Waákh íyeyyeedo iche ikhaataan.”

⁷ ꞌDeerka wihi icho ilaabeen, “Inti icho kayimaateen ma garanni.”

⁸ Yeesso la iiyeyye, “Ani laka antohi an wahanyeyyoha kahaaggicho ma atin isoocheeko gon.”

Mammahti ꞌdooꞌdi gos kireeste

⁹ Yeesso toro mammahta ꞌdooꞌd ibahche wihi us iyidah, “Etoo geeyohi sabiibe gosiis goyaka il gesse, gosiis lakireeste, ulla geeddi deer sulhaassoo irte.

¹⁰ Maanti gurnaan lagurti ka, eti gos leh ilbooyiiskoo ꞌdooꞌdi gos kireeste iergate, ꞌdee gisi gurnaankiiski sabiib wohoo a siicheen. Iꞌdaasenyi ꞌdooꞌdi gos kireeste ilbooy jahe dahano marah sooꞌdiiche.

¹¹ Ilbooyoo addan ergate, iꞌdaasenyi kaas laka jaheene, lakhaanyo kadoweene, dahano marah sooꞌdiicheen.

¹² Ki seyyahnaatteet toro ergate, kaas la gaameereene, gos khariis isayeen.

¹³ “Eti gosi sabiib leh ꞌdeerka wihi us yidah, ‘Mehe yeelo? Inankaaya erga, ki an weyti ꞌdoono. Kolossoo usu a inkaanyitta.’

¹⁴ “Iꞌdaasenyi chirri ꞌdooꞌdi gos kireeste usu arge ka, ayta iskaleehawwooche, mehe isiyidaaheen ya, ‘Ki dahal leh kalla. Nigaase ꞌdee dahalhiis weheen a yitaaheen.’

¹⁵ ꞌDeerka gosi sabiib khariis ijiiteene, yigaaseen. “Kamalda bal, eti gosi sabiib leh ꞌdeerka icho mehe yeela?

¹⁶ A yamiite, ꞌdooꞌdaas gos kireeste bakkicha ꞌdee gos ꞌdooꞌdoo addan gessa.” Chirri ꞌdooꞌd ayta daage ka wihi us yidah, “Waakh meesseen bujiiy!”

¹⁷ Yeesso ꞌdooꞌd indo katoolliche, wihi us worsate, “Chaꞌatin iꞌdaas elattaan, Chiirnaanka bal kamalda. “‘Daakki ꞌdooꞌdi minan diso ꞌdiiꞌde, iche tirrinki dagaheete min tiiro yitah.’

¹⁸ Eti tuummane daakkaas sartiis kakufe a jejjeba, iꞌdaasenyi chirri daakkaas etoo kasoodihe etaas a urkaha.”

Weynaanti Yaꞌhuud Yeesso angey gelin ꞌdoonta

¹⁹ Tagaammeti amurre ichoow kuhaaniyyohi wewween la jiti iche Yeesso chirraas on kakhabatti yowteen. A mehe saggi us mammahtaas ka woricho ikaayyeedo iche garteen. Iꞌdaasenyi ꞌdooꞌde karooraan.

²⁰ Weynaanti Yaꞌhuud weyti Yeesso fiirisse. ꞌDooꞌdoo ꞌdegeyenye ꞌdooꞌdi fiffissan iskaayyeelo ergateen, ichohi Yeesso yeediis ka angey gessaane ꞌdoonaane, ꞌdee miig ichoow antohi gaafana idiibaan.

²¹ ꞌDooꞌda ꞌdegeye wihi us Yeesso worsate, “Eti ween! Saggi at wihi rummaat ikaayyeeddo toro enenyet iabisso a garanna. Toro la enenyet seley ma sassaahto, iꞌdaasenyi jiti Waakhe at enenyet abisso ichoow runti Waakh a israahaan.

²² Kaaysarhi weene inno kooddi igunno a mujjum a bal mujjum mee?”

²³ Yeesso la dowwa on luhticho kase wihi us iyidah,

²⁴ “Bal chilinkoo Rooma itusa. Foola ichoow magaha kachiiran a keyya?”

²⁵ Wihi icho ilaabeen “A koo Kaaysar.” Wihi us iyidah, “ꞌDeerka Kaaysar wihi wihiise iguta, Waakh la wihi wihiise iguta.”

²⁶ Saggi icho ꞌdooꞌd ortiis ka wihi us yidah ka angey igessaan waayeen. Wihi us soolaabe kagirmeesteene, gammadicheen.

Maanti ꞌdooꞌdi tuume lasookahcho

²⁷ ꞌDooꞌdoo Sadukaayo Yeesso iyimiyye wohoo worsate. ꞌDooꞌda la ꞌdooꞌdi tuume berri ma sookaho iche essa.

²⁸ “Eti ween, Muusa goorat mehe inno ichiire ya, ‘Chiꞌ etoo walaaliis yumuyye, makhaabál katabe iꞌdaasenyi nyaakhut ikhabin, etaas makhaabassaas a disti, walaaliis nyaakhut a idelo.’

²⁹ Reeroo teebeenye isleedesse a jire. Ki ween min diste, nyaakhut laan buje.

³⁰ Ki lammaatteet ichoow,

³¹ ki seyyahnaatteet makhaabassaas disteene, saggaas on u teebaccho ba disteene, yumaateen, nyaakhut icho katabeen mele.

³² ꞌDaꞌddaboka makhaabale laka bujje.

³³ ꞌDeerka maanti ꞌdooꞌdi tuume lasookahcho, etichekoh makhaabassiis tateeh teebaccho la a disteenee?”

³⁴ Yeesso wihi us ilaabe, “ꞌDooꞌdi harrata min a dista toro mindischo ka laka ladiiba.

³⁵ Iꞌdaasenyi ꞌdooꞌdi Waakh ꞌdooꞌdi fiffissan iekkaacho omoot lakasookahcho goobi Waakh furti, min ma disti ommos mindischo ka ma ladiibo.

³⁶ ꞌDooꞌda omootti us yamuut ma yabuuꞌd, a mehe icho a iꞌdi herti Waakh. Omoote lakasookahche gone, icho a nyaakhuti Waakh.

³⁷ Iꞌdaasenyi chiirnaanki geeyi hidaad kagubti ka, Muusa laka saggi ꞌdooꞌdi tuume omoot ikasookaho a tuse. A mehe us Kamur mehe kawahe ya, ‘Waakh Aburaaham, Waakh Isakh, Waakh Yaakoobo.’

³⁸ Usu Waakkhi ꞌdooꞌdi tuume mee, iꞌdaasenyi a Waakkhi ꞌdooꞌdi jiro. A mehe usu ka enenyet tuumman a noolyahe.”

³⁹ Tagaammetoo amurre wihi icho yidaaheen, “Eti ween rumanka wahaas a ayti haaggan.”

⁴⁰ Et usu wohoo addan worsan iggo la mele.

Kiriisto a inam eyyo?

⁴¹ Yeesso ꞌdeerka wihi us icho iyidah, “A iꞌdoh tagaammeti amurre Ki Lasubhe a hiiy Dawuud ielatta?

⁴² Dawuud rubeytiis Buuggi Sabuur ka mehe cheeka ya, “ ‘Waakkhi Kamure wihi us Kamureey iyidah, “Dabankeeyki miigeete antoot orrommo,

⁴³ ichoowka chiiytaah tuum dahanohaah a soogesso.” ’

⁴⁴ Dawuud rubeytiis usu Kamure kawaha, saggoh ꞌdeerka Ki Lasubhe hiiy Dawuud iyahe?”

Yeesso abattitiis tagaammeti amurre yuubsada iyadeeh

⁴⁵ Geeddi urur dagansati Yeesso wihi us abattitiis iyidah,

⁴⁶ “Tagaammeti amurre yuubsada! Wihi icho weyti ꞌdoonaan a ichohi darfohi hahhaaggane derdeer leesohti, toro la sokkoyyo ka weyti inkaanyit ka labariiticho. Toro la chiꞌ minki weysiite Yaꞌhuud ommos sukuukuyyo lagele, wihi icho weyti ꞌdoonaan a ichohi meessi weyti lakiinkaanyito orronti.

⁴⁷ ꞌDooꞌda muunkhoyyo ekkeesta, hoolahicho kakhaataan. Chiꞌiche weysatti la, enenyeti haaggane iskaayyeessa, weysi derdeeraassa. ꞌDooꞌda Waakh sinati weyti kutto igoocha.”