Luuka 15 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Mammahti naffi adi baabe toro laꞌhele

¹ Maantoo makhaaballeti kooddi goosso ichoow ꞌdooꞌdoo ꞌdooꞌdi uskeel khabo liiekkaacho a yimiyye wihi Yeesso ꞌdooꞌd abcho dagansate.

² Iꞌdaasenyi Farissaayo ichoow tagaammeti amurre ba nyunnyuweene wihi icho yidaaheen, “Eta ꞌdooꞌdi uskeel lehe soodowweesta toro leegolossata!”

³ Yeesso la ꞌdeerka mammahta ibahche,

⁴ “Eemba etiinkoo iiyti kudoowenye khaba, koo la baabaa. Etaas, iiyti tomon saagaal ichoow saagaale inti iche yaakhto kataba, ki kaldaye baabe yowta ichoowka ꞌhela menya?

⁵ Chirri us ꞌhele ka weyti hamaada, naf adah sookorsata

⁶ goob keena. Ulla ꞌdeerka ollokkiis ichoow aalassiis dakkhamba waha wihi us iyadeeh, ‘Kaaleya a isleehamaano, iꞌdi tahe naffeeyki iiyyaate kootte baabe a ꞌhele.’

⁷ Wihi an atin iadeeh, saggaas on u, goobi Waakh ka hamaadi buurenye jira jeenteti etoo kaldaye uskeeliis kasoonokhtuu. Hamaadi eta khabo hamaadi et tomon saagaal ichoow et saagaal fiffissane uskeelicho ikasoonokhan weyti kussanyahe.

Hawweesi chilinki baabe

⁸ “Ommolla eemba makhaabassoo chilim tomon khabto, koo kalday a kabaabe. Makhaabassa taahiche a bolkhissa min harta chilinkiche mujjum yowatta ichoowka ꞌhessa menya?

⁹ Chirri iche ꞌhesse la deyyehoti aalassichee ichoow ti ollokkichee tuumman wahta wihi iche itadeeh, ‘Kaaleya a isleehamaano, iꞌdi tahe an chilinkeeyki baabe a ꞌhele!’

¹⁰ Wihi an atin icheeko, saggaase herti Waakh ihamaadda chirri etoo kalday uskeeliis kasoonokhte.”

Inanki baabe toro goob isoonokhte

¹¹ Yeesso yeed orey iwoye, “Makhaabaloo yeeletoo lammee khabo a jire.

¹² Inanki nugul kahe wihi us aabbahiis iyidah, ‘Aabba, dahalheeyki ani imiinsan isii!’ Makhaabal ꞌdeerka hoola yeele lammache gise.

¹³ “Inkoo geeddoo labarye ka, inanki nugul wihi lasiiche dakkhan ororiche, iloo fogaat irte, ilaas ka hoolahiis kagirꞌdaame.

¹⁴ Wihi goorat us khabe tuumman massiche. Saahka abaartoo uskul ilaas gesse raarahe ititah.

¹⁵ Ulla irte hili etoo ilaas gele, et la gosas ierge, ꞌdee golcha a yaakhicho.

¹⁶ Ulla gololi golcha taham ohom ꞌdoone. Iꞌdaasenyi et wihi us yaham siicho mele.

¹⁷ “Maanti matah soonokhte, masse wihi us uuriis goyaka yidah, ‘ꞌDooꞌdi aabbaheey kireeste gololi yaakho us yahame ichoowka us soowaacho a khaba, ani la kalla inta ka raarahe ikhaatta!

¹⁸ A kaha aabbaheey inokhda wihi an iadeeh, “Aabba an Waakh ortiis ka ichoow ortaah ka uskeel a yeele.

¹⁹ Kola ma imalin chirri weelaahha liiyadeeh, iꞌdi etoo at kireysatte ikayeelo.” ’

²⁰ ꞌDeerka kahe anki aabbahiis jiro fool siiche. “Iꞌdaasenyi geeddi us goobicho isooeleelin on fogaka aabbahiis usu arge, uur isoonugleeste inyaame sorboobte dongate.

²¹ “Inam la wihi us yidah, ‘Aabba an Waakh ortiis ka ichoow ortaah ka uskeel a yeele. Ma imalin chirri kola weelaahha liiyadeeh!’

²² “Iꞌdaasenyi aabbahiis ilbooyyetiis wahe wihi us iyidah, ‘Nyaama dafarti weyti haaggan sookhaata inam gessa. Lahaagti far sookhaata far gessa. Kobo laka sookhaata gessa.

²³ ꞌDee irda maari weyti ruusan sookhaata khala sukuuku a gello, a hamaano!

²⁴ Iꞌdi tahe inankeeyka a iꞌdoo goorat us yumuyye toolla la a sookahe, goorat a baabe toollaka a soonokhte!’ Sukuuku ꞌdeerka labahche.

²⁵ “Geeddaas dakkhan la inanki teyyane gose khuta. Chirri us goob yimiyye us min isoodowwaate ka, kowdoti ꞌdooꞌdi girꞌdaamo daage.

²⁶ Ilbooyoo wahe wihi us worsate, ‘Mehe jira?’

²⁷ Wihi us ilaabe, ‘Walaalaahki goorat baabe iche soonokhte, aabbahaah la heeri ruusan ikhale. Iꞌdi tahe usuhi nebey khabo toro la haaggane yimiy.’

²⁸ “Inanki ween hollowe min gelin ꞌdiiꞌde. Aabbahiis ꞌdeerka bahe hawwaaste, mine soogessaa.

²⁹ Iꞌdaasenyi wihi us aabbahiis ilaabe, ‘Aabba an guꞌhassi ittaawenye iꞌdi bowꞌdataah u hil kihaaggiche. Anna injire amurretaah ma kutin. At mehe injire isiisse? Weeli makhaleete an aalasseey leeꞌdubdi laka ma siin!

³⁰ Iꞌdaasenyi inankaahka hoolahaah tuumman malaayayyo on kamassiche. Maanti us soonokhte ka, at la kahte heeri weyti ruusan ikhasse!’

³¹ “ Aabbahiis la wihi us iyidah, ‘Inankaaw at orran dakkhan a ileejirta, wihi an khabo tuumman la a wahaahha.

³² Iꞌdaasenyi a imasse chiꞌinno sukuuku bihinno hamaano, a mehe walaalaahka goorat a iꞌdi eti yumuyye toolla la a jira, goorat a baabe toolla la a soonokhte.’ ”