Luuka 14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso toro Seeri Lanaso ka etoo samaacha

¹ Maantoo Yeesso a irte Seeri Lanaso ka minki etoo weene Farissaayee kagolossate, mujjume lafiiriche.

² Etoo luhlo ichoow dahano dakkhan yombobeen laka intaas a kijire.

³ Yeesso la wihi us Farissaayo ichoow tagaammeti amurre worsate, “Amurre ichoow eti Seeri Lanaso ka lasamaacho a israahaan bal ma israahaan?”

⁴ Iꞌdaasenyi gammadicheen. Ulla chirraakka et khabte, samaache, laabe.

⁵ Ulla ꞌdeerka wihi us icho worsate, “Etiinkoh maanta chirri inankiis ommos heeriiskoo Seeri Lanaso ka wor kadihe, chirraas on isobihin?”

⁶ Icho la toro walah icho soolaabeen mele gammadicheen.

Wori ꞌdooꞌdi martee miinsan

⁷ Chirri us ꞌdooꞌdi marteenye min goyaka inti ꞌdooꞌdi weyti liinkaanyito orronti yowti arge ka, mammahta toro ibahche wihi us ꞌdooꞌd iyidah,

⁸ “Chirri sukuukuhoo ka lakiwahe inti ꞌdooꞌdi weyti liinkaanyito orronti a isikhaban, iꞌdi tahe kolossoo etoo ati kaaween laka sukuukuhaas ka a lawahe.

⁹ Chirri iꞌdaas tahe la, eti sukuuku lehe lammatiin atin wahe wihi us kiyadeeh, ‘Eta kombortaah sii.’ At la ꞌdeerka lakhaanyo kikhaatatta harra koorromatta.

¹⁰ Iꞌdaasenyi chirra lakiwahe, harra koorrommo, ꞌdee eti sukuuku leh la a yamiite wihi us kiyadeeh, ‘Aalaaw, kaale inta deefto orrommo.’ At la ꞌdee ꞌdooꞌdi addan goyaka a lakiinkaanyita.

¹¹ Iꞌdi tahe eti tuummane isweynaacho a lanuglaacha, eti isnuglaacho la a laweynaacha.”

¹² Yeesso la wihi us eti min leh iyidah, “Chirri at sukuukuhoo bihisso, aalassaah ichoow walaalinyetaah ichoow ꞌdooꞌdiin ichoow ollokkaahki kamure awahin, chirri ati icho wahte, icho laka maantoo a kiwahaane wihi goorat at iyeesse ka kigutaan.

¹³ Iꞌdaasenyi chirri at sukuuku bihisso, ꞌdooꞌdi miskiine ichoow ki maꞌdee, iꞌdi maanta ki luhlo laa ichoow ki indo laa wah.

¹⁴ At la ꞌdee Waakh a kimaala. ꞌDooꞌda walah us khabo us kisoolaabo mele. Eheetteey laka maanti ꞌdooꞌdi fiffissan omoot lakasookahcho, Waakh kalaꞌde kisoolaaba wihi at yeesse ka.”

Mammahti eti sukuukuhi buure bahche

¹⁵ Chirri etoo kootte Yeesso leefiddiyo waha daage ka wihi us Yeesso iyidah, “ꞌDooꞌdi berri sukuukuhi goobi Waakh kagolossati hamaadoo geeddohenye khaba!”

¹⁶ Yeesso wihi us ilaabe, “Etoo sukuukuhoo buurenye bahche, ꞌdooꞌdi buure wahe.

¹⁷ Chirri sahaꞌddi lagolossati titah ka, ilbooyiis ergate ꞌdooꞌdi lawahe mehe iyadeeh ya, ‘Kaaleya, a mehe walah dakkhan kola a latannabichee.’

¹⁸ “Iꞌdaasenyi icho tuumman geeyo dowteene, ki oraat wihi us yidah, ‘Ibeennetane gosoo soogadde, gosaase irda sooyeya. Iꞌdiicha on.’

¹⁹ “Koo la wihi us yidah, ‘Heerassoo tomonenye soogadde, heerassane kaja il kakhuta, sukuuku emeet ma ꞌhelo iꞌdiicha on.’

²⁰ “Koo addan la wihi us yidah, ‘Ibeennetane min disde, sag an iamiit mele.’

²¹ “Ilbooy soonokhte kamuriis wihi liiyidah icheeke. Eti min leh hollowe ilbooyiis amur ibahche wihi us iyidah, ‘Nyaam dowwa, jitassi juukhe ichoow wihi babballaaddane ilkerengeeteet kasossoho, miskiino ichoow ꞌdooꞌdi luhlo laa ichoow ki indo laa ichoow ki sohot iubaaꞌdan soowah.’

²² “Ilbooy wihi us ilaabe, ‘Eti ween wihi at tidah a yeele, iꞌdaasenyi min uliba ma buuhsamin.’

²³ “Eti kamure wihi us ilbooyiis iyidah, ‘Nyaam jitassi babballaaddan ichoow jitassi juukhe iro, ꞌdooꞌd hawwaasso ꞌdee minkeey a buuhsamo.

²⁴ Wihi an atin iadeeh, eti dakkhane goorat lawahe emeet ꞌdiiꞌde golola af ma kaꞌdaaro!’ ”

Yeessohi laraaho wihi ꞌdabakhe mee

²⁵ Maantoo ururoo buure Yeesso sooraahe ulla urur iurgiye wihi us iyidah,

²⁶ “Chirri etoo isooraaho ulla toro aabbahiis ichoow abartiis ichoow makhaabassiis ichoow nyaakhutiis ichoow walaalinyetiis ichoow albehi leedesse iꞌdiiꞌdine, jirotiis laka iꞌdiiꞌdin, etaas abattiteey itaahan ma yabuuꞌd.

²⁷ Eti tuummane massalaabatiis isiꞌdine, sina iumhane ani isooraahin, abattiteey itaahan ma yabuuꞌd.

²⁸ “Eemba etiinkoo minkoo buurenye disin ꞌdoona. Etaas koloo a orronta, chilimmeti minkaas tuumman disso rerreega, usu khabo ichoow usuhuus yeya menya?

²⁹ Iꞌdi tahe chirri us daddaabohi ilaat dise, us minkaas massin waaye, ꞌdooꞌdi argo la weyti usu kachaarta.

³⁰ Wihi icho yadeehiin, ‘Eta goorat minka a dise toro massin agaafte.’

³¹ “Ommos eemba karnatoo koo addane dowwanoha ka diho kiirta. Koloo ma orronti iskarti eluf tomone ka usú karnati isoosohti iskarti eluf tomon lammee khabo dihin yabuuꞌd ma yeyo?

³² Chirri us ituddubin, geeddi ki addan foga jiro iche saamo ergata karnati addan iirta nebey daaha.

³³ Saggaas on u etiinki tuummane wihi us khabo tuumman iꞌdiin, abattiteey itaahan ma yabuuꞌd.

Magaaꞌddi gimba laa

³⁴ “Magaaꞌde a haaggantahe. Iꞌdaasenyi chiꞌiche gimbatiche waayte, saggoh toro liigimbaacha?

³⁵ Harra ommos laag laka ma iroon gone, a lakhuba on. “Eti dogo khabo, a daago giꞌde.”