Luuka 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso saggi liiweesti ꞌdooꞌd abcha

¹ Maantoo Yeesso intoo ka a weesta. Inkoo us weysi massiche ka etoo abattitiise wihi us iyidah, “Kamur saggi liiweesti nah abi iꞌdi goorat Yoohana laka abattitiis iabchuu.”

² Yeesso la wihi us icho iyidah, “Geedda atin weysattaan waha daha, “ ‘Aabbahaanyaaw, magahaahki munyee a liinkaanyito, at ba enenyet tuumman dakhatta.

³ Gololeenyoki maan dakkhan nah sii.

⁴ Uskeeleenyo nah ikakut, iꞌdi nah laka ꞌdooꞌdi uskeel nah iyeele uskeel ikakunnuu. Toro la kajmeti uskeel nah kaluguꞌddo nah kajeyi.’ ”

⁵ Wihi us icho iyidah, “Eemba etiinkoo maanta minki aaliiskoo naanokho irayye, ‘Aalaaw, etoo aaleeyenye sulhaal isohti toolla minkeey yimiyye,

⁶ gololi an siicho la ma khabo, makaate seyyahtoo an siicho isii,’ iyidah?

⁷ “Eemba eti min goya kijiro, ‘Nyaam, sina iikawaarinne, afaf a hidayyihiine, ani ichoow nyaakhuteey ba a uꞌdurra, sag an isookaho an walah kisiicho mele,’ kiyidah.

⁸ Wihi an atin icheeko, chirri eta isookahine jeenteti us aaliis iyahuu golol isiin laka, jeenteti us kansi isiinne us daah ikaꞌharin u, a geeddi us sookaho wihi us ꞌdoono siicho.

⁹ “ꞌDeerka wihi an atin iadeeh, Waakh wihi at ꞌdoonto daddaahe, a kisiicho. Wihi at ꞌdoonto Waakh kayoyyowo, a kaꞌhessaa. Waakh arit ifah idahe, ulla a kifaho.

¹⁰ Iꞌdi tahe eti tuummane walah daahe, Waakh wihi us daahe a siicha, ki walah yowti la, Waakh a kaꞌhela, ki ifaha yidah la, Waakh arit a ifaha.

¹¹ “Atinhi ooyenyee, etiinkoh chirri weeliis bahag daahe toof siicha?

¹² Ommos chirri weeliis ukkah daahe arraar siicha?

¹³ Chirri atinhi uskeel leh ba nyaakhutiin siinti haaggan siissaan, Aabbahiinki serey jiro la geeddoo meheenye ꞌdooꞌdi usu Rubeyti Munyee daahe siicha!”

Yeesso ichoow Seytaanki Beelsebuul lakawaho

¹⁴ Yeesso maantoo etoo ginnatoo af tirto, iche kabahche. Chirri ginna et kabahte ka, et yeyyeede urur la girmeeste.

¹⁵ Iꞌdaasenyi gaasichokoo mehe yidaaheen ya, “Miigti Beelsebuulhi karnati ginnayyootenye enenyet ginna kabahcha.”

¹⁶ Gaasoo wohoo miigti Waakh tuso goobi Waakh kayimiyye icho daaheen ka ichohi Yeesso angey geesso ꞌdoonaan.

¹⁷ Yeesso wihi icho kamassaan garte wihi us icho iyidah, “Yaafbaaw seley goote isdihto, a baabaata, minki seley gowe isdiho a baaba.

¹⁸ Chirri Seytaan seley goggowe isinokhte dakhiis saggoh orey ikasohta? Jeenteti an iꞌda iadeeh, a jeenteti atin an miig Beelsebuule ginnayyo kabahcha ielattaan.

¹⁹ Chirri maanta an miig Beelsebuul ka ginnayyo enenyet kabahcho, ꞌdooꞌdi atin raaho la miig eyya ginnayyo kabahcha? Icho ꞌdeerka atin hukkuma.

²⁰ Iꞌdaasenyi chirri an farri Waakh ka ginnayyo bahcho, waha saggi dakhi Waakh goytiin iyimiyye tusaan.”

²¹ “Chirri etoo miige birtiis dakkhan khaatte minkiis toorribo, meehiis et ꞌdaaro mele.

²² Iꞌdaasenyi chirri etoo usú kamiige usu dihe usu kahataate la, etaas usú kamiige birti eti min leh kakhuufo ichoow meehiis a khaata, ꞌdooꞌd gisa.

²³ “Eti tuummane ani ileejirin, a itirrima. Eti igargaarine walah ileesooholin a ileefida.

Soonokhanti ginna enenyet isoonokhatti

²⁴ “Maanti ginna etoo goya kabahte, ginnata a iratta, ili daarenye bicche laa dah kagoossa. Fur yowatta, iꞌdaasenyi fur ma ꞌhesso. ꞌDeerka wihi iche tadeeh, ‘Fureeyki an kasootabe inokhda.’

²⁵ Maanti iche tamiit furi harane lamujjummooche ꞌhessa.

²⁶ Ginnataas ꞌdeerka a iratta, ginna teeba addane iche laka kasuuje sookhaatta etaas goya gelaane, fur yeessaan. Etaas la jirotiis, ti goorat oraat a kaꞌdarsatta.”

²⁷ Yeesso yeyyeedaayi, makhaabassoo urur goyaka sooyeedde wihi iche Yeesso itidah, “Waakh rumanka abarti kidesse toro kinuugsatte a imaale!”

²⁸ Yeesso wihi us ilaabe, “ꞌDooꞌdi rumanka Waakh imaalo, a ki Yeedi Waakh daago toro la raaho.”

ꞌDooꞌd wihi weeli enenyet yeelin iubaaꞌdan marma

²⁹ Geedda urur buuraati Yeesso wihi us yidah, “ꞌDooꞌdi iꞌdee a ꞌdooꞌdi uskeel leh! Icho wahanyeyyohi miigti Waakh tuso daahaan. Iꞌdaasenyi wihi goorat Waakh Yoona ka enenyet tuse on menye, walah addane lasiicho mele.

³⁰ A mehe Yoona goorat ilkerengeetti Ninaawi ka saggi Waakh isooergate iche ꞌdooꞌd tuse. Iꞌdaasu la Ínam Aadam laka wihi isoobaho saggi Waakh usu isooerge iche ꞌdooꞌdi iꞌdee tusaan.

³¹ Ibeenki Waakh ꞌdooꞌd hukkumo la makhaabassi karnatenye ili Cheeba a kahta ꞌdooꞌdi iꞌdee uskeel igoossa. A mehe iche goorat harra ginꞌdohicheeda katimiyye kharati karnati Soolomon layadeeh khabe dagansatte, toolla la etoo Soolomon laka kaween kallaay.

³² Ibeenki Waakh ꞌdooꞌd hukkumo, ꞌdooꞌdi ili Ninaawi a tolossata ꞌdooꞌdi iꞌdee cheekta. Iꞌdi tahe icho maanti Yoona Yeedi Waakh icheeke, uskeelicho a kasoonokhteene, toro la etoo Yoona kaween kalla atin leejira.

Yeesso wihi us ꞌdooꞌd abcho banay iokkanaacha

³³ “Et taa bolkhicho inti lakadagcho ommos baakhuul iliis gesso mele. Taa a labolkhicha kombor lakorcha, ꞌdee ꞌdooꞌdi min soogelo il kaarga.

³⁴ Issaah iꞌdi taa u sartaah banaye ikeenta. Chirri indohaah haagganyahiin, sartaah tuumman laka banaye buuha. Iꞌdaasenyi chirri indohaah suujyahiin, sartaah tuumman a mugꞌdi.

³⁵ Tab giꞌde banayhi at khabto uus icho mugꞌdi itaahan.

³⁶ Maantaka chirri sartaah tuumman banay buuhaane intoo rucchul laka mugꞌdi ikajirin, sartaah dakkhan a bildiikhta gon, iꞌdi chirra banayhi taa kabolkhaan u.”

Yeesso Farissaayo ichoow tagaammeti amurre cheekta

³⁷ Chirri Yeesso yeed massiche ka etoo Farissaayee minkiis ka golol iwahe. Yeesso ꞌdeerka min gele komborti ballaaddane lakagolossati garabiche ka dikkil kareeye.

³⁸ Iꞌdaasenyi eti Farissaayo chirri us Yeessohi geeddi us igolossan dahano idikhan arge ka weyti girmeeste.

³⁹ Kamur ꞌdeerka wihi us iyidah, “Atinha Farissaayo, kokkoob ichoow baakhuul khariissa dikhtaane, iꞌdaasenyi uuriin goya ꞌdamaam ichoow suujoone buuha.

⁴⁰ ꞌDalammeey! Waakkhi sartiinti addan haaggiche on menya goya laka haaggiche?

⁴¹ Iꞌdaasenyi gololi baakhuul goya kijiro miskiin siicha ꞌdee walah tuumman ka biꞌdir a bahtaanee.

⁴² “Atinhi Farissaayee sinati atin sugto eenna a buure! A mehe atin geeyohi golol haaggicho iꞌdi maanta nyaayka ichoow imboogayyohi fil ittaawe ka Kamur gisi tomonnaatteet a ibihissaan. Iꞌdaasenyi ꞌdooꞌdi jiti fissan ka lahukkumo ichoow ꞌdooninti Waakh a ꞌdiisseen. Wihi atin lakaꞌdoono a atinhi Kamur gisi tomonnaatteet ibihissaan, iꞌdaasenyi wahanyeyyohi weyti khumman aꞌdiinna.

⁴³ “Atinhi Farissaayee, sinati atin sugto eenna a buure. A mehe minassi weysiite Yaꞌhuud ka komborohi weynaaneete ꞌdoontaane, toro la atinhi sokkoyyo ka inkaanyit ka atin labariiticho ꞌdoontaan.

⁴⁴ “Sinati atin sugto eenna a buure. A mehe atin a iꞌdi hawwaalohi dagah ikhabine, enenyet igaranne sarchooda on yabti.”

⁴⁵ Tagaankoo amurree wihi us Yeesso ilaabe, “Eti ween, chirri at waha elatti at nah laka a nah leeabaarranta alah!”

⁴⁶ Yeesso wihi us ilaabe, “Atinhi tagaammeti amurree, sinati atin sugto eenna a buure! Atin huleesi enenyet iubaaꞌdane enenyet karartaane, atin rubeytiin la far ma okkhissaane enenyet ma leekhabattaan.

⁴⁷ “Sinati atin sugto eenna a buure, a mehe atine goꞌddassi enenyet lakahawwaalo ꞌdooꞌdi Waákh íyeyyeedo idissaan, aacchinyetiinna la ꞌdooꞌdi Waákh íyeyyeedo bakkisse.

⁴⁸ Atin ꞌdeerka aacchinyetiin wihi iche yeesse a ayyissaane gar a laabtaan. Icho ꞌdooꞌdi Waákh íyeyyeedo a bakkicheene, atin la hawwaalohicho disseen.

⁴⁹ Jeentetaas u wihi Waakh kharatiis ka essi kallaayo, ‘ꞌDooꞌdi Waákh íyeyyeedo ichoow ergaano a ierga, icho la gaasoo a yagiisiin, gaasoo laka sina omhichaan.’

⁵⁰ Maantaka Waakh ꞌdooꞌdi iꞌdee a hukkuma jeenteti diiggi ꞌdooꞌdi Waákh íyeyyeedo uꞌ goorat Waakh harra soouume lakhubuu.

⁵¹ Uus ogoos Aabel kasookhabatti ichoowka ogoos Sakkariiyahi chalagti hoola lakasoorriyoocho ichoow minki Waakhe buure dahcho lakayigis eleessa. ꞌDooꞌdi iꞌdee la wahaas tuummane lakahukkuma.

⁵² “Atinhi tagaammeti amurree, sinati atin sugto eenna a buure! Atin ꞌdooꞌd jiti us Waakh kaabti a kadagisseen. Atin rubeytiin jitaas ma raahtaane, ꞌdooꞌdi addan la usuhi jitaas tabo a jeyisseen.”

⁵³ Inkoo Yeesso intaas katabe ka tagaammeti amurre ichoow Farissaayo ba Yeesso weyti tirrimeene toro bolokh ka Yeesso wihi buure worsateen.

⁵⁴ Icho la saggoo icho Yeesso yeed ka iꞌhelaane icho ikhabtaane ꞌholaan.