Luuka 10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso reeri tomon teebee ergata

¹ Saahka toro Kamur reeroo addane tomon teeba ichoow lammee soobahche, et lallamma ka iskaꞌdare, ilkerengeeto ichoow meessi tuummane us dowwanoha ka sooirti iergate.

² Wihi us iyidah, “Gurnaan a buure, iꞌdaasenyi ꞌdooꞌdi hil haaggicho a koo rucchul. Maantaka Kamuri gurnaan leh daaha, ꞌdee ꞌdooꞌdi ittaawenye gurnaan soogoocho a sooergo.

³ Nyaama! An saggi makhassi iiyyaate yaay goya liifahe, iche atin ierga.

⁴ Chilimme ommos urgo ommos kobohoo addan akhaatanna. Eti atin jit kaꞌhesseen tuumman la abariitinna.

⁵ “Chirra atin minkoo gessaan, koloo weesda, wihi atin tadeehiin, ‘Waakh ba minka nebey kakaala.’

⁶ Chirri etoo nebey ꞌdoono intaas kajiro, Waakh minkaas a imaala. Chirri iche iꞌdaas ieheynan la, Waakh minkaas nebey ma kakaalo.

⁷ Minkaas on fiddiya, walahbaaw icho atin siichaan amha toro dama. Iꞌdi tahe eti hil haaggicho hili us haaggicho ka a laguta. Kolba la minkoo akabahina koo agelina.

⁸ “Chirri atin ilkerengeettoo gesseene ꞌdooꞌdi ilkerengeettaas atin martiiste la, wihi atin lasiiche on amha.

⁹ ꞌDooꞌdi khakkhannane ilkerengeettaas kajiro samaacha, wihi atin itadeehiin, ‘Dakhi Waakh kola a atin isoodowwaate.’

¹⁰ Iꞌdaasenyi chirra atin ilkerengeettoo gesseene atin liimartiisan, jitassi ilkerengeeteet ibaha, wihi atin tadeehiin,

¹¹ ‘Ebeeri ilkerengeettiinna luhlo nah kaangago laka atin on atin isahna, waha la saggi Waakh sina atin ituso iche tusaan. Iꞌdaasenyi waha abda, dakhi Waakh a soodowwaate.’

¹² Wihi an atin icheeko, ibeenki Waakh ꞌdooꞌd hukkumo, sinati Waakh ꞌdooꞌdi ilkerengeetti Soodom yiil tuse deefta sinati Waakh ilkerengeettaas tuso ka.

Yeesso ilkerengeetohi us girmohi ittaawe kayeele ka ꞌdooꞌd leejaakha

¹³ “Atinhi ilkerengeetti Choorasin taalliin sinati atin sugto eenna a buure! Atinhi ilkerengeetti Bessaayda taalliin sinati atin sugto eenna a buure! Iꞌdi tahe chirri wihi ittaawenye weeli enenyet yeelin iubaaꞌdane goytiin ka layeele goorat ilkerengeetti Tiiro ichoow ti Siidon ka layeele, ꞌdooꞌdaas uskeelicho a kasoonokhte, ꞌdeerka ingaꞌdaaꞌdiyyo gessate, bombey koorronte.

¹⁴ Iꞌdaasenyi ibeenki Waakh ꞌdooꞌd hukkumo, sinati Waakh ꞌdooꞌdi ilkerengeetti Tiiro yiil ichoow ꞌdooꞌdi ilkerengeetti Siidon yiil tuse iche deefta sinati Waakh atin tuso ka.

¹⁵ Atinhi ilkerengeetti Kafarnaaꞌhum taalliin la, kol serey atin liiokkhicho koogtahiin? Mele, meessi ꞌdooꞌdi tuume kijiro iche ikhubattaan!”

¹⁶ “Eti nabah atin isudo, ani nabah isuda. Eti atin ꞌdiiꞌdo la ani iꞌdiiꞌda. Iꞌdaasenyi eti ani iꞌdiiꞌdo, eti isooergate ꞌdiiꞌda.”

Reeri tomon teeba ichoow lammee soonokhta

¹⁷ Reeri tomon teeba ichoow et lammee usuhi hamaado soonokhte, wihi us yidah, “Kamur, ginnayyo laka chirri nah magahaah on wahne, yeedeenyo a raahaan!”

¹⁸ Yeesso wihi us ilaabe, “Aa, a rum! Ani Seytaanki iꞌdi bakkaal u serey kasoodihe a arge.

¹⁹ An antohi atin toofaf ichoow arraaro kayabattaan a atin siiche, toro la miigti atin miigti chiiytan kasoorissaan a atin siiche. Walah atin gaameero mele.

²⁰ Iꞌdaasenyi ginnayyohi afiin ikutin iihamaadina, iꞌdaasenyi jeenteti magahenyetiin buuggi goobi Waakh goya liikachiire ihamaada.”

Yeesso Waakh kalaꞌd ilaaba

²¹ Yeesso chirraakka usuhi Rubeyti Munyee hamaadi buure ka rubeytiis buuhisse, wihi us yidah, “Aabbahaaw, Kamuri serey ichoow harra ba iween, a kikoolicha. Iꞌdi tahe at wahanyeyyoha ꞌdooꞌdi kharayyeenye toro la weyti soome a kadagisse, ꞌdooꞌdi iꞌdi nyaakhutenye wohoo igaran la tusse. Aa! Aabbahaaw, wihi kaahamaadicho gon wahaase.

²² “Aabbaheey walah dakkhan dahantaaya soogesse. Aabbahaaya on menye et rumanka eti Weeliis yahe garti mele. Toro la Weeliis ichoow ꞌdooꞌdi Weeliis ibabbakkaahin ꞌdoono on menye, et rumanka eti Aabbaheey yahe garti mele.”

²³ ꞌDeerka abattitiis iurgiye, dagsi ka wihi us iyidah, “Waakh indohi waha atin agartaan argo a imaale.

²⁴ A mehe wihi an atin isoocheeko, ꞌdooꞌdi ittaawenye Waákh íyeyyeedo ichoow karnato ba ichohi waha toolla atin agartaan argo a ꞌdooneene iꞌdaasenyi ma argin. Wihi atin toolla daagtaan daagin a ꞌdooneene, iꞌdaasenyi ma daagin.”

Mammahti eti haaggane ili Saamariya

²⁵ Maantoo etoo tagaanki amurree, usuhi Yeesso kajo ꞌdoona, tolossate, wihi us worsate, “Eti ween, mehe yeelo ꞌdee jiroti jirtuu imassan ꞌhelo?”

²⁶ Yeesso wihi us ilaabe, “Amurre Muusa mehe kachiiran? At saggoh yeedaas ikhaatta?”

²⁷ Wihi us ilaabe, “ ‘Kamuri Waakkhaahe uuraah tuumman ka ichoow rubeytaah tuumman ka ichoow miigtaah tuumman ka ichoow malaah tuumman ka ꞌdoon.’ Ichoow, ‘Ollokkaah geeddi at isꞌdoonto ꞌdoon.’  ”

²⁸ Yeesso wihi us ilaabe, “At a eysiisse, tab giꞌde wahaas yeele, ꞌdee jiroti imassan ꞌhel.”

²⁹ Iꞌdaasenyi et saggi wihi us kootte worsate mujjum iyahiine tusa, wihi us Yeesso worsate, “Ollokkeey la a ayyo?”

³⁰ Yeesso la wihi us ilaabe, “Etoo ilkerengeetti weene Yeerusaleeme kabahe, ilkerengeetti Yeeriko ikhubte. Ildah raahaayi, chiftatoo isoobahte, jahte gaad kabihisse, usuhi rubeytoo rucchul khabo katabte.

³¹ Yomboka etoo kuhaanee baabul on jitaas leeyimiyye, chirri us eti lajahe arge ka, jit ꞌdossiis tabe, eti lajahé kakute.

³² Iꞌdaasu laka etoo goob Laaweenye kuhaaniyyo gargaaro chirri us meel yimiyye us et arge ka jit ꞌdossiis tabe kute.

³³ Iꞌdaasenyi etoo ili Saamariyeenye yeelan sulhaal kijiraayi, inti et kijiro yimiy. Chuꞌus eti lajahe arge ka, uur isoonugleeste.

³⁴ Et idowwaate, subakki geeyi oolif ichoow farsoti sabiib kadeye, toro jiissiis darfo kayuube, et eheliis korche, looj geeche, intaas ka gargaare.

³⁵ Ibeenki kaas sooraaho ka chilimmeti eti orrah lamma hil haaggiche laguto soobahche, eti looj iween idiibe toro wihi us iyidah, ‘Eta mujjum yaakhiche, maanti an soonokhde wihi us kagolossate ichoow wihiiski addan tuumman ani a kisooguto.’

³⁶ “Ati ka ꞌdooꞌda seyyahe goyaka, koh eti chifta jahte iꞌdi ollokkiiski sam iyitah?”

³⁷ Eta tagaanki amurree la wihi us ilaabe, “A eti eta uur isoonugleeste on gon.” Yeesso la wihi us iyidah, “Tab giꞌde, at laka iꞌdaas yeel.”

Yeesso Maarta ichoow Maariya goobicho irta

³⁸ Yeesso ichoow abattitiis la ꞌdulaani gooboo makhaabassoo Maarta layadeeh kajirto yimaateene, iche la martiisatte.

³⁹ Maarta la walaassichetoo Maariya layadeeh a jirta. Maariya la luhlo Kamur hagga fiddiita, yeed Yeesso dagansatta.

⁴⁰ Iꞌdaasenyi Maarta hili iche haaggisso weyti leebuuraate, waꞌdwaaꞌd gele, timiyye wihi iche Yeesso worsatte, “Kamur, ati ka maanta a haaggantahe chirri walaasseey hil tuumman ani on ileeꞌdiisso? Kaale igargaar idah!”

⁴¹ Kamur wihi us ilaabe, “Maarta, Maarta! At waꞌdwaaꞌdi holi at dowto matah kiyaham.

⁴² Iꞌdaasenyi wohoo kalday on laꞌdoona. Maariya la a eysiisse, wihi haaggane etoo kalday laka ikakhaatin yeesse.”