Kolossaay 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti Waakh kahamaado jira

¹ Maanti Waakh Kiriisto omoot kasookahche, anki Waakh ka atin laka omoot a atin laleesookahche. Maantaka wahanyeyyohi saraate inti Kiriisto komborti antoote Waakh miigtiise kafiddiyo ꞌdondoona giꞌde.

² Taba wahanyeyyohi harrata menye, wahanyeyyohi intaas saraat kijiro kol dakkhan orey isohda kamalda.

³ Iꞌdi tahe atin a tuunteene, toolla la jirotiin ichoow Kiriisto ba Waakh goya kadagsanyahiin.

⁴ Maanti Kiriistohi jiroteenti rummaat khuccho harra tuumman isoobaho atin laka a leesoobahtaane, iꞌdiis u ababtaan.

⁵ Maantaka sartiinti harratane uskeel ꞌdoonto wahanyeyyohi iꞌdee ka agiisa. ꞌDooꞌdi isidisanne isleeurꞌdo ichoow wihi biꞌdire ichoow ꞌdooꞌdi eti icho argaan ichohi leeurꞌdo ꞌdoono ichoow uskeeli liimoono ichoow ꞌdamaam ꞌdiicha. ꞌDamaam la a iꞌdi iyookkoyyohi waakkhakh lakayeessi.

⁶ Jeenteti waha u, holi Waakhe kuleele ꞌdooꞌda yeediis iraahin a iyamiit.

⁷ Atin rubeytiin laka jirotiinti raagan ka wahanyeyyoha a kaassahatteen.

⁸ Iꞌdaasenyi toolla wahanyeyyoha iꞌdee laka ꞌdiicha, hol ichoow isinyannyaamin ichoow ꞌdiiꞌddo ichoow ham ichoow afi ꞌdaran.

⁹ Been iisigoonna a mehe jirotiinti oraate suuje ichoow fataliche a kasootabteene.

¹⁰ Toro la jiroti husube gessatteene, jirotaas ka la kol dakkhan Waakhe atin husubnaacha, ꞌdee usu rumanka abattaane, iyookkoti Waakkhi atin soouume raahtaan.

¹¹ Jirota husub ka enenyet seley ma gaan, iꞌdi maanta Yaꞌhuud ichoow yaafohi Yaꞌhuud ieheynan, ꞌdooꞌdi khandiiti ichoow ki ikhandiyan, ꞌdooꞌdi isoomin ichoow ki lakarooro, ki ilbooyyee ichoow ki furan seley ma gaan. Iꞌdaasenyi eti khumman a Kiriisto, inno ichoow us la a wohoo kalday.

¹² Waakh a atin soobahsate, ꞌdooꞌdiiski munyeenye us weyti ꞌdoono, atin kayeesse. Maantaka, taba giꞌde waha yeela, ꞌdooꞌdi uur nugul ateeha, ꞌdooꞌdi uur ꞌdabakhe ateeha, isnuglaacha, ꞌdooꞌdi samacchaare ateeha, ꞌdooꞌdi garrahsi khabo la ateeha.

¹³ Taba giꞌde chiꞌ etoo atin kaholloocho laka igarrahsada on. Chirri etoo ki addan wohoo kakhabo laka, etaas a ikakuto. Saggi Kamur uskeel atin ikakutuu, saggaas on u atin laka ꞌdooꞌdi addan uskeel ikakuta.

¹⁴ Haaggaas tuumman ꞌdirihicho la ꞌdooꞌdi isꞌdoono ateeha. ꞌDooninti islaꞌdoono la, ꞌdooꞌd Kiriisto tuum wohoo kaldaye kayeessa.

¹⁵ Nebey Kiriisto uurassiin a dakhatti. Iꞌdi tahe iꞌdi ꞌdooꞌdi sartoo kalday u, nebeytane Waakh atin iwahe. Waakh la kalaꞌd ilaaba.

¹⁶ Walah tuumman ka wori Kiriisto miinsan mujjum nabah isuda, jirotiin ka tuum raaha. Khara tuumman ka, wora isabcha, toro la wora on ka issoohossa. Sabuuri Yeedi Waakh goya kayimiy ichoow geeyohi Waakh lakasaaꞌdo ichoow geeyohi Rubeyti Munyee atin siisso, Waakh idowa. Kol dakkhan Waakh kalaꞌd ilaaba, geeyo idowa. Geeddaas tuumman la rubeyohiin ka Waakh kalaꞌd ilaaba.

¹⁷ Walahbaaw atin yeessaan ka, harrabiin ommos wihi atin haaggissaan eheetteey ka ba, jeenteti atin koo Yeessohi Kamure itahiin iyeela, toro la Yeesso ka Waakkhi Aabbaheene kalaꞌd ilaaba.

Saggi ꞌdooꞌd Kiriisto urmohicho ka isileefiddiyo

¹⁸ Deyyeho, iꞌdi ꞌdooꞌdi Kamur kakhuufo imassuu, taba giꞌde makhaaballetiin aficho akutina.

¹⁹ Makhaaballe, taba deyyehotiin ꞌdoona, saggi suuje la iiwoyina.

²⁰ Nyaakhut, taba atin laka wihi atin yeessaan tuumman ka, wihi ꞌdooꞌdi atin dele atin idowo raaha. A mehe waha a wihi Kamúr kahamaadicho.

²¹ Ooyenye, taba nyaakhutiin aꞌdaꞌddaaranna, uus rubeye jebine.

²² Ilbooyye, taba wihi kamurretiinti harrata atin idowto tuumman raaha. Jeenteti atin Kamur ikaroortaan u, chirri icho atin ꞌdeyꞌdoochaan kaldach on menye, kol tuumman uuri haaggan ka icho kahamaadicha.

²³ Walahbaaw atin haaggissaan ka, rubeytiin tuumman kahaaggicha, iꞌdoo atin weeli enenyet menye iꞌdoo atin Kamur ikahaaggissaan iyeela.

²⁴ A mehe saggi atin igarattaan u, Kamur wihi atin muꞌdan iꞌdi kalaꞌdeet u a atin guta. Kiriistohi Kamure ihila.

²⁵ Eti khuf yeelo kalaꞌddi khufaas a igunnanta. Waakh la enenyet tuumman ekka yeya.