Ibiraaniya 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Kuhaanihi weyti ween tuumman ꞌdooꞌd goya lakasoobahcha. Hilicho la, a ki icho wihi Waakh miinsan ka, meessi enenyet ka Waakh ifalaane, siimo ichoow soorriyoyyohi uskeel bahcho Waakh ibahchaan.

² Kuhaanihi ween ullaka ꞌdabakkhi weeli enenyet a khaba gone, ꞌdooꞌdi jeenteti us jiti mujjume igaran u uskeel gelo, inahin a yabuuꞌd.

³ Ullaka a etoo ꞌdabakhe gone, jeenteti uskeeliis u ichoow toro uskeeli ꞌdooꞌdi addan u Waakh soorriyo a ibahcha.

⁴ Et keley on isweynaacho, kuhaanihi weyti ween iskayeelo mele. Eti tuummane kuhaanihi weyti ween yateeh, Waakh kalday on waha, iꞌdi goorat Haruun Waakh iwahuu.

⁵ Kiriisto laka ꞌdeerka ma isweynaanne kuhaanihi weyti ween ma iskayeelin. Iꞌdaasenyi Waakhe usu soobahsate wihi us iyidah, “At a Weelaaya, maalinka an Aabbahaahha itah.”

⁶ Chiirnaanneti Waakh goyaka intoo ka Waakh mehe Kiriisto idowa ya, “At jirtuu tuumman a kuhaanihi uumman Melkisedeeke.”

⁷ Maanti Yeesso harrata kijire, us riirit ichoow oytim ka Waakkhi omoot karibo wahte. Jeenteti Us roorro ka Waakh afiis ikutin u, Waakh weysihiis a daage.

⁸ Chirri us rumanka Weeli Waakh yahe laka, sinayyohi lakawaariche wihi Waakh ꞌdoono mujjum a abcheen.

⁹ Inkoo tuum lakayeele ka, eti jirtuu tuumman ꞌdooꞌdi usú raaho ribo yitah.

¹⁰ Waakh la wihi us kawahe, a kuhaanihi weyti weene uumman Melkisedeeke.

ꞌDooꞌdi Yeedi Waakh goyaka hiiyyay bahche ateeha

¹¹ Wihi buurenye Yeessohi ullaka iꞌdi Melkisedeek u kuhaanee miinsane an idaahan ꞌdoono, a jiraan. Iꞌdaasenyi chirri an atin isoobabbakkaahicho weyti miigyahiin. A mehe walah dowwa ma atin gelaanee.

¹² Atin geeddi deere ꞌdooꞌd Kiriisto eheet. Kootte geeddee ka, atine ꞌdooꞌdi addan walah abissaan. Iꞌdaasenyi, atin laka toolla wihi Yeedi Waakh ka kolooraat lakasooumho, iche eti atin abcho ꞌdoontaan. Wihi Waakh miinsan ka, atin uliba a iꞌdi nyaakhuti gololi miige ohom iubaaꞌdane, haanu kalday on damo.

¹³ A mehe eti tuummane haanu kalday on damo a weeli nucchule, wihi fissane kootte liiꞌdoono us yeelo ma garti.

¹⁴ Iꞌdaasenyi gololi miige a ki ꞌdooꞌdi iiꞌdowe, kol tuumman Yeedi Waakh raaho, wihi haaggan ichoow wihi suuje seley saahnaan isabche.