Ibiraaniya 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Nasmeti rummaate ꞌdooꞌdi Waakh naso

¹ Waakh uliba laka a inno iayyicha nasmetiis a inno siicha. Maantaka taba a isyaakhinno, uus ꞌdee eteenkoo kalday laka meessa nasme eleelin waayin giꞌde.

² Saggi aacchinyeteen hidaad goyaka Wori Haaggane nasmeti Waakh miinsan idaagtuu, inno laka a daagne. Icho woraas a daageene, iꞌdaasenyi walah us ibahe mele. A mehe chiꞌicho daageen laka, icho Waakh ma kakhuufin.

³ Innohi Waakh rummeysanne kaldache nasmetaas Waakh ayyiche ꞌhella, a mehe wihi Waakh aacchinyeteenti usu irummeysan miinsane us yidah kallaayo. “Ani la holeey ka a daadde, ‘ꞌDooꞌda ili an kanascho, yombuu tuumman ma gelo.’ ” Ulla iꞌdaase yidah chirri us hiliiski us harra soouume meessiisti nasme kijirtaayi us orey on massiche laka.

⁴ A mehe Chiirnaanneti Waakh intoo ka wihi ibeenki teebannaatteet miinsane kachiiran kallaayo, “Ibeenki teebannaatteete uumacchoti harra tuumman ka, Waakh walah Us haaggiche mele, a nase.”

⁵ Ayta nasme la inti kootte oraat ka a lakaayyeede, wihi liidah, “ꞌDooꞌda ili an kanascho, yombuu tuumman ma gelo.”

⁶ Uliba laka nasmeti Waakh ꞌdooꞌdoo usu kakhuufo nascho a jirta. Iꞌdaasenyi ꞌdooꞌdi oraate Wori Haaggane meessaas nasme miinsan daage la meessaas ma gelin. Iꞌdi tahe ayti Waakh a daagiwwaayeen.

⁷ Maantaka Waakh toro ibeenkoo addane nasmetiis laꞌhelo yeele, ibeenkaas la Maalinkane layadeeh. Inkoo geeddi deer lafiddiye ka, wihi Waakh Dawuud ka yidahye kootte orey lakahawwooche a mehe ya, “Maalinka, chirri atin wihi Waakh essi daagteen, matah amiigeysanna.”

⁸ A mehe chirri goorat Yoochuwa woynaanki us ꞌdooꞌd ili Kaanan iwoyo ka, nasmeti Waakh ꞌdooꞌd iayyiche nasche, Waakh toro ibeenkoo addane nasmetiis laꞌhelo ma kaayyeedo gon.

⁹ ꞌDeerka nasmeti khummane ꞌdooꞌdi Waakh uliba sugto a jirta.

¹⁰ A mehe eti tuummane nasmetaas khummane Waakh ꞌdooꞌd iayyiche naso, ullaka hiliis ka a nasa saggi Waakh hiliiski uumaccho ka inasuu.

¹¹ Maantaka, tirriinsanni giꞌde, ꞌdee nasmetaas Waakh a nasno. A mehe eti tuummane ayti Waakh daagiwwaaye iꞌdi goorat yaafohi Issiraayel yeeleen u, ullaka nasmetaas ma naso.

¹² Wihi Waakh yidah a iꞌdi wihi jiro khabo, miig laka khabo. Afi Yeedi Waakh leeyahiin la afi birlab laka a kutaane, rubey ichoow uur laka seley a goocha, toro la inti hubno ichoow duh kijiraan seley a goocha. Yeedi Waakh wihi suuje ichoow wihi haaggane uureen kijiro a tusa, mali enenyet ichoow wihi enenyet ꞌdoono dagsan laka mujjume fiiricha.

¹³ Wohoo rucchule lasoouume Waakh lakadagcho ma jiraan, Waakh ortiis ka walah tuumman a nyiikhsanyahiin one, iꞌdaanu arga. Waha a Waakkhi berri wihi inno yeelle tuumman inno worsati.

Yeesso a kuhaaniheenki weyti ween

¹⁴ Maantaka kuhaanihi weyti weene goobi Waakh irte a khabna. Waha la a Yeessohi Weeli Waakhe. Taba giꞌde kakhuufnaanki inno Waakh kakhuufno inno cheekanni ka, mujjum a tolossanni.

¹⁵ Kuhaaniheenka weyti ween la ꞌdabakkheen tuumman a isoonaha. Iꞌdi tahe sagag tuumman ka saggi kajmeti uskeel inno kaluguꞌddo inno liikakajo on usu laka liikaje, iꞌdaasenyi uskeeloo rucchul laka ma gelin.

¹⁶ Maantaka Waakkheenki haaggiiski buure inno tusti roorro laan kombortiisti antoot ortiis iranni giꞌde. Intaas ka maambaaw inno gargaar ꞌdoonno, us uure inno isoonugleesta toro haaggiiski buure inno siicha.