Ibiraaniya 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Isyuubsada, runti Yeedi Waakh abujina

¹ Maantaka, jeenteti wihi Waakh yeeluu, runta inno daagne weyti mujjum khabanni giꞌde, uus inno inti inno isoohanni bujine.

² A mehe farniinki goorat Waakh herti Waakh fare a larummaache. Eti tuummane iraahine ommos daagiwwaaye la, sina loomhiche.

³ Saggoh sina ikabahsanneey, chirri inno ribnaanki weyti haaggane Waakh inno ribo aw ikakhabin? Yeessohi Kamure rubeytiissa kolooraat ribnaanka cheeke, ꞌdooꞌdi usu daage la, saggi ribnaankaas rum iyahe inno isoocheeke.

⁴ Waakh rubeytiis la ribnaankaas rummaache. Saggi us irummaache la a iꞌda, wahanyeyyohi miigti Waakh tuso ichoow girmo ichoow wihi ittaawenye weeli enenyet yeelin iubaaꞌdane yeele, toro la saggi us iꞌdoono on u, siinti Rubeyti Munyee ꞌdooꞌd gise.

Yeesso kaldache enenyet riba

⁵ Waakh herti Waakh mee antohi jiroti harrati soosohatti, nah woriche kaayyeeno siiche.

⁶ Iꞌdaasenyi Chiirnaanneti Waakh goyaka intoo wihi lakachiire a mehe ya, “Okkhoow, weeli enenyet a mehe kasooꞌhessa, weeli enenyete khoroseebe a mehe yaakhissa?

⁷ At icho herti Waakh geeddoo nucchul on kasoonuglaasse, a iꞌdoo at ꞌduub korisse at saggi at iweynaasse toro la liinkaanyito at irummaasse,

⁸ toro la icho eti walah tuumman anti kayeesse.” Wihi yeeda yadeeh, Waakh weeli enenyet eti walah tuumman anti kayeele, walah us kalaabte mele. Iꞌdaasenyi toolla weeli enenyet usuhi walah tuumman itoollo ma agarro.

⁹ Iꞌdaasenyi wihi inno agarro a Yeessohi Waakh iꞌdaaru herti Waakh kasoonuglaache. Iꞌdaasenyi jeenteti sina ikawaarte us iyumuy u, Waakh toolla usu ꞌduub a korche, weynaache, a liinkaanyita. Iꞌda ka haaggi Waakhe buure ka, Kiriisto meessi weeli enenyet tuummane kayamuut.

¹⁰ Waakhe walah tuumman soouume, toro la jeentetiissa walah tuumman liihaaggiche. Waakh a eysiiche maanti us Yeesso massalaaba ka sinayyohi lakawaariche ka eti tuume kayeele, ꞌdee nyaakhuti ittaawe goobi Waakh keena. A mehe Yeesso enenyet jiti ribnaan lakeelo tusa.

¹¹ Yeessohi enenyet munyaacho ichoow ꞌdooꞌdi us munyaacho ba Aabbahicho a koo kaldache, a Waakh. Jeentetaas u Yeesso ma uryaawo chuꞌus ꞌdooꞌda a uuraaya yadeeh.

¹² Ulla wihi us Waakh iyidah, “An ꞌdooꞌdi uureeye wihi at yeesse a icheeka, chirri icho kulmaane weestaan la, an a kikoolicha.”

¹³ Wihi addane Yeesso yidah, “Ani Waakhe kakhuufa.” Toro la wihi us essi, “An kalla, nyaakhuti Waakh isiiche leejira.”

¹⁴ Nyaakhutaas iꞌdaas us yadeeh u, a weeli enenyete sar ichoow diig khabo gone, Yeesso laka uummanki weeli enenyete inno leegisme. Iꞌdaas ka omoottiis ka Seytaanki enenyet omoot ikeeno miigtiis tuumman bar a tire,

¹⁵ toro la ꞌdooꞌdi jiroticho tuumman iꞌdi falfa eheet jeenteti icho omoot ikarooraan u, fure.

¹⁶ Rumanka us herti Waakh mee gargaar yimiy. Iꞌdaasenyi nyaakhut nyaakhut Aburaahame gargaar yimiy.

¹⁷ Jeentetaas u sagag tuumman ka iꞌdi ꞌdooꞌdi uuriisenye yitahye, kuhaanihi weyti weene hili Waakh ka lakakhuufo toro uur nugul yitah. Ulla toro iꞌdane yeele, ꞌdee soorriyoti holi Waakh laabto bahcha, ꞌdee Waakh uskeeli weeli enenyet kakuta.

¹⁸ A mehe Yeesso rubeytiis kajmeyyohi uskeel kalugꞌdo ka sina a kawaarte gone, ꞌdooꞌdi kajmeyyohi uskeel kalugꞌdo ka lakajo gargaarin a yabuuꞌd.