Hilassi Ergaano 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Barnaba ichoow Saawulo lasoobahcha leergata

¹ Urur Kiriistoki ilkerengeetti Antiyookhiya kijiro ꞌdooꞌdoo Waákh íyeyyeedo ichoow ꞌdooꞌdoo Yeedi Waakh ꞌdooꞌd abcho goya a kijire. Icho la a Barnaba ichoow Siimiyonhi Nigeer layadeeh ichoow Luukiyohi ili Kureene kayimiy ichoow Manaayenhi gaafanahi ꞌHerood Antiiba layadeeh weyneeste ichoow Saawulo.

² Geedda icho Kamur wahtaane icho af hiitaan, Rubeyti Munyee wihi iche itidah, “Barnaba ichoow Saawulo ba hili an icho iwahe isoobahcha.”

³ ꞌDeerka inkoo icho af hiiteene Waakh wahteen ka, dahano korcheene iweesteene ergeen.

Barnaba ichoow Saawulo kurti bicche dahcho kijirto Kuuburo layadeeh gelaan

⁴ Lammache ichehi Rubeyti Munyee ergatte, irteene ilkerengeetti Seluukiya ikhubteene, intaas ka kooban geleene kurti bicche dahcho kajirto Kuuburo layadeeh irteen.

⁵ Chirri icho ilkerengeetti Salaamis eleeleen ka, minassi weysiite Yaꞌhuud ka Yeedi Waakh cheekeen. Yoohanahi magahiiskoo Marko layadeeh laka a leejire, gargaare.

⁶ Kurtetaas tuumman dah kagoocheene Wori Haaggan cheekeene ichoowka ilkerengeetti Baabos eleeleen. Intaas ka etoo Yaꞌhuude moreenye eti Waákh íyeyyeedo iskaayyeelo Bar Yeesso layadeeh ꞌheleen.

⁷ Ulla eti kurtetaas iweene Sergiyo Baawulo layadeehe kharee iche aaliis yahe. Etaas ween Barnaba ichoow Saawulo wahe Yeedi Waakhe kadaagin ꞌdoonaa.

⁸ Iꞌdaasenyi Eelimaashi moree icho tirrime. Eta magahiis moro miinsanyahe. Usu etaas ween kakhuufnaanki us Yeesso kakhuufo kalaabine ꞌdoone.

⁹ Saawulohi magahoo ka Baawulo layadeehe Rubeyti Munyee buuhisse Eelimaas indo katoolliche wihi us iyidah,

¹⁰ “Weeli Seytaan! At a chiiytanki wihi haaggan tuumman ꞌdiiꞌdo. At a eti ekkeysi lehe, toro wihi suuje tuummane rubeytaah buuha. At la kol tuumman jiti Kamure fissane khollokkhissa.

¹¹ Toolla la dahanti Kamur a kiguꞌdubta, indo waayta, geeddoo banayhi orraheet argiwwaayta.” Chirraas on ꞌduubat ichoow mugꞌdi ba usu indo ankubeene, dahano ka il ꞌdaꞌddaarre eti angaamicho yowte.

¹² Etaas ween chirri us wihi yitah arge ka Kamur rummeeste, a mehe wori Kamur miinsane laabche a kagirmeeste.

Baawulo ichoow Barnaba ilkerengeetti Antiyookhiyati Bisiidiya kijirto ka Wori Haaggan cheekaan

¹³ Baawulo ichoow wahalhiis ba kooban ka ilkerengeetti Baabos kakaheene ilkerengeettoo Beerga layadeehe boroofenhi Bambiiliya kajirto irteen. Intaas ka Yoohanahi magahiiskoo Marko layadeeh icho kanokhte ilkerengeetti weene Yeerusaleem inokhte.

¹⁴ Ilkerengeetti Beerga kakaheene ilkerengeetti Antiyookhiya boroofenhi Bisiidiya kijirto irteen. Seeri Lanaso ka minki weysiite Yaꞌhuud geleene orronteen.

¹⁵ Inkoo Chiirnaanneti Amurre ichoow ti ꞌDooꞌdi Waákh Íyeyyeedo lasoome ka, ꞌdooꞌdi minki weysiit itoollo icho waheene wihi icho iyidaaheen, “Yaafeey, chirri atin yeedoo enenyet uur miigoocho khabtaan, kaaleya cheeka.”

¹⁶ Baawulo tolossate dahanti miigeet okkhiche leeyeede wihi us yidah, “ꞌDooꞌdi Issiraayeloow ichoow atinhi yaafti Issiraayel ieheynane Waakh karoortaane inta kajirtaan, idagansada.

¹⁷ Waakkhi ꞌdooꞌdi Issiraayel wahti goorat aacchinyeteen a soobahsate. Maanti iche ili Miissiri iche kayeelantahe kajirto ka yaafohi buure kayeele. Waakh la toro miigtiisti buure on ka icho ilaas kasoobahche.

¹⁸ Waakh geeddi guꞌh tomon affar icho hidaad ka a woywoye.

¹⁹ Yaaf teeba ili Kaanaan kajirte baabiiche, ꞌdooꞌdiis la ilaas dahal ka siiche.

²⁰ Waha tuumman la geeddi guꞌh kud affar ichoow guꞌh tomon chan iche khaateen. “Waha ꞌdubicho ka Waakh icho ꞌdooꞌdi dakhti siiche ichoowka eti Waákh íyeyyeedo Saamuwel layadeeh hiliis gele.

²¹ Saahka yaafti Issiraayel Waakh karnat daahte, Waakh la icho eti Saawulo layadeehe aabbahiis Kiich layadeehe, yaaftiis la Beenjameen tahe, siiche. Ulla guꞌh tomon affar ba karnat iyitah.

²² Inkoo Waakh Saawulo bahche ka, Dawuud karnati yaafohi Issiraayel kayeele. Wihi Waakh cheeke Dawuud miinsan kallaayo, ‘Inam Yeessehi Dawuud layadeeh a eti wihi uureey ꞌdoono raaho, wihi an usuhi yeelo ꞌdoono tuumman a yeela.’

²³ “Waakh la hiiy Dawuud ka, iꞌdi goorat us iayyichuu, Yeesso ꞌDoorribehi yaafohi Issiraayel kayeele.

²⁴ Geeddi Yeesso hiliis isookhaban, Yoohanahi Enenyet Baattissiyo iche yaafohi Issiraayel tuumman Yeedi Waakh icheeke, icho uskeeliin kasoonokhda toro a atin labaattissiyo iche idowe.

²⁵ Chirra Yoohana hiliis soomassicho ka wihi us yidah, ‘Kamalda bal, atin ayyo ikoogtahiin? An ki atin sugtaan mee. Yeya, eti ꞌdubeey ka yamiit, an falfihi kobtiissa an jalkhicho ma muꞌdan.’

²⁶ “Yaafeey, atinhi hiiy Aburaahame ichoow atinhi yaafohi addanenye Waakh karoortaan inno wori saggi Waakh inno iribo a inno liisooerge.

²⁷ ꞌDooꞌdi ilkerengeetti weene Yeerusaleem ichoow weynaanticho ba Yeesso eti us rumanka yahe ma kasin. Iꞌdaasenyi maanti icho omoot igoocheen, wihi goorat ꞌdooꞌdi Waákh íyeyyeedo chiire, Seeri Lanaso tuumman lasoomo buuhicheen.

²⁸ Chirri icho wihi rumanka Yeesso omoot liikagoocho ikhabin laka, Bilaato Yeessohi layagiise daaheen.

²⁹ Inkoo iche wihi goorat Chiirnaanneti Waakhe usu miinsan buuhisse ka, Yeesso massalaaba kasooyegisse khaatte, goꞌddoo kahawwaasse.

³⁰ Iꞌdaasenyi Waakh usu ꞌdooꞌdi tuume goyaka sookahche.

³¹ Ulla ꞌdooꞌdi goorat usú boroofenhi Gaalilaaya ka sooraahe ilkerengeetti weene Yeerusaleem leeyimiy geeddi buure a isoobabbahe. Icho la toolla ꞌdooꞌdeenki Issiraayel gartiis a ilaabaan.

³² “Nah Wori Haaggane atin icheekna. Wora la a ki Waakh aacchinyeteen iayyiche,

³³ innohi nyaakhutichee, Yeessohi us omoot kasookahche ka inno ibuuhiche. Iꞌdi aritti lammaatteete buuggi Sabuur ka liichiiruu, “ ‘At a Weelaaya, maalinka an Aabbahaahha itah.’

³⁴ Waakh rumanka Yeesso omoot a kasookahche toro jirtuu la ma ꞌdiicho sartiis ma suusahto, iꞌdi Yeedi Waakh liikachiiruu, “ ‘Buuhi munyeenye toro lakakhuufo an Dawuud iayyiche iche atin siicha.’

³⁵ ꞌDeerka intoo addan ka mehe chiiran ya, “ ‘Sarti Falfataahti Munyee ma ꞌdiisso ma suusahto.’

³⁶ “Iꞌdi tahe Dawuud kholotiis ka hili Waakh a kajire, yumuyye, aacchinyetiisti goorat orey bujje ikhaye, lahawwaale, sartiis la suusahte.

³⁷ Iꞌdaasenyi ki Waakh omoot kasookahche, sartiis ma suusahin.

³⁸ “Maantaka yaaftaay wihi an atinhi abattaan ꞌdoono, Yeesso ka, jiti uskeeliin atin liikakuto a atin liicheeke.

³⁹ Usu ka eti tuummane usu rummeeste, Waakh eti fissane iekkaacha. Iꞌdaasenyi amurre Muusati laraaho ka, Waakh etoo kalday laka eti fissan ma iekkaacho.

⁴⁰ Yuubsada giꞌde uus wihi goorat ꞌdooꞌdi Waákh íyeyyeedo yidah atin kiitaahane.

⁴¹ ‘Yeya, atinha wihi Waakh yidah suujoon kacheektaan. A girmeysattaane tuuntaan. A mehe wihi an ibeenneta atin jirtaan yeelo, chirri etoo atin isoocheeke laka ma rummeysattaan!’  ”

⁴² Chirra Barnaba ichoow Baawulo minki weysiite Yaꞌhuud kabahaan ka, ꞌdooꞌd icho wahe ꞌdee Seeri Lanaso soomaro ka wahanyeyyohoo addan a icheekeen.

⁴³ Inkoo ꞌdooꞌd minki weysiit kabahe ka, ꞌdooꞌdi Yaꞌhuude ittaawe ichoow ki wihi ꞌdooꞌdi Yaꞌhuud wahti rumanka iurgiye Barnaba ichoow Baawulo sooraahe. Baawulo ichoow Barnaba la leeyyeedeene, hawwaasteene, ꞌdee mujjum haaggi Waakhe buure a raaheen.

⁴⁴ Seeri Lanaso soomaro ka ꞌdooꞌdi ilkerengeettaas kajiro buurtiis yimiyye Yeedi Kamur dagansate.

⁴⁵ Chirri ꞌdooꞌdi Yaꞌhuud ururi buure arge ka, inaaf buuhiche, wihi Baawulo essi abaareen.

⁴⁶ Iꞌdaasenyi Baawulo ichoow Barnaba wihi icho roorro laan soolaabeen, “Wihi nah lakaꞌdoono, a nahi Yeedi Waakh kolooraat atin isoocheekno. Jeenteti atin iꞌdiiꞌddeene, saggi atin jiroti armaanjireen ikamalin isikeekkaasseen u la, kola yaafohi Yaꞌhuud ieheynane iiranna.

⁴⁷ A mehe amuri Kamur nah siiche a kan, “ ‘A kisoobahsade, banayhi yaafohi Waakh igaran kaayeele, ꞌdee Wori Haaggane ribnaan keeno harra tuumman eleelissa.’ ”

⁴⁸ ꞌDooꞌdi yaafohi Yaꞌhuud ieheynan chirri icho yeedaas daageen ka weyti hamaadeene, Yeedi Kamur inkaanyiteen. Eti tuummane Waakh soobahsate ꞌdee jiroti jirtuu imassan ꞌhelo la Yeesso rummeeste.

⁴⁹ Yeedi Kamur la ilaas tuumman kataaꞌhe.

⁵⁰ Iꞌdaasenyi ꞌdooꞌdoo Yaꞌhuud deyyehoti Waakh karoorto magah khabto ichoow mejeli ilkerengeet ka weynaan leh sootukkicheen. Baawulo ichoow Barnaba sina omhin sookhabteene ichoowka ilicho kariheen.

⁵¹ Ergaano ꞌdeerka ebeeri luhlohicho fuulo wihi iche ꞌdooꞌdaas kacheekatti tuso ijahte, ꞌdeerka ilkerengeetti Ikooniyo iratte.

⁵² Abatti la hamaad ichoow Rubeyti Munyee buuhicheen.