Galaatiya 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooꞌd Kiriisto a furanyahe

¹ Kiriisto a inno soofure, maantaka uus inno bowꞌda itaahan. Mujjum tolola giꞌde, toro la huleesi bowꞌda uus atin lakorin.

² Waha abda! Anihi Baawulee wihi an atin isoocheeko, chaꞌatin lakhandiyo ꞌdee nane Waakh ꞌdooꞌdi fiffissan atin iekkaacho, Kiriisto gargaar us atin ikhabo mele gon.

³ Toro a katirriinsada adeehe, etiinki jeentetaas liikhandiyo, wihi lakaꞌdoono a usuhi wihi amurre Muusa ꞌdoonto tuumman raaho.

⁴ Atinhi amurre raahin ꞌdoontaane ꞌdee Waakh ꞌdooꞌdi fiffissan atin iekkaacho, Kiriisto a atin lakagooche, toro la haaggi Waakhe buure a rogteen.

⁵ Iꞌdaasenyi kakhuufnaanki inno Kiriisto kakhuufno ichoow Rubeyti Munyee ka, wihi inno khajjeello a Waakkhi ꞌdooꞌdi fiffissan inno iekkaacho.

⁶ A mehe jeenteti wihi Yeesso Kiriisto inno iyeeluu, khandi ommos khandiwaayyo indigir icho khabaan mele. Wohoo kaldaye khummane jira, a kakhuufnaanki inno Kiriisto kakhuufno, ꞌdooninti inno Waakh ichoow ꞌdooꞌdi addan ꞌdoonno lakaargo.

⁷ Atin orey saggi mujjumenye Kiriisto iraahteen. Ayyo runti Waakhe atin raahtaan atin kajeyche?

⁸ Ekkeysihi iꞌdaase, Waakkhi atin wahe ma kiimaatan.

⁹ Mammahe mehe tadeeh ya, “Booddati makaate fuurisso, wohoo weyti rucchul on makaateti buure tuumman fuuricha.”

¹⁰ Kamuri ani ichoow usu ba wohoo kalday nahe ka a tissiba, atin maleey on menye maloo addan ma raahtaan. Eta mal atin tiro la, ebbaaw uꞌ yahe ka, Waakh sina a igoocha

¹¹ ꞌDooꞌd Kiriistokaaw, chaꞌan uliba wori khandi miinsan cheeko, a iꞌdoh uliba ꞌdooꞌdi Yaꞌhuud ani sina iomhicha? Chaꞌan wahaas cheeko, wori massalaaba Kiriisto miinsane enenyet tarraantarricho a labaabiiche gon.

¹² ꞌDooꞌdaas mal atin tiro la kootte incheenka yeedichokaas orey a iwoyaane ichoowka issiibaan.

¹³ ꞌDooꞌd Kiriistokaaw, Waakh furnaanki us atin soofuro iche atin iwahe gone, atin bowꞌdayyohi amurre mee. Iꞌdaasenyi furnaankaas akagirꞌdaamina, wihi uurassiin goya kijiro uskeel imoono araahina, taba ꞌdooninti atin isikhabtaan ka isifala.

¹⁴ Amurre Muusa tuumman yeeda kalday on kakulanta, “Ollokkaah geeddi at isꞌdoonto ꞌdoon.”

¹⁵ Iꞌdaasenyi chaꞌatin kol dakkhan iꞌdi binaat u istamhiin, yuubsada a ismassissaanee.

Jiroti Rubeyti Munyee ka lajiro

¹⁶ Wihi an eldi kallaayo, taba jiroti Rubeyti Munyee woyto jira, iꞌda ka la wihi uurassiin goya kijiro uskeel imoono ma raahtaan.

¹⁷ A mehe wihi uuraas goya kijiro uskeel imoono, Rubeyti Munyee a tirrimaane, wihi Rubeyti Munyee ꞌdoonto la, wihi uuraas goya kijiro uskeel imoono a tirrimaan. Icho a istirrimaane, ꞌdeerka wihi haaggane atin yeelin ꞌdoontaan ma yeessaan.

¹⁸ Iꞌdaasenyi chiꞌ Rubeyti Munyee atin woyto, amurre Muusa ma atin anatti gon.

¹⁹ Wahanyeyyohi wihi uurasseen goya kijiro uskeel imoono yeelaan a ꞌdow on. Waha a iꞌdi maanta ꞌdooꞌdi isidisanne isleeurꞌdo, wihi biꞌdire, sohoꞌddarri,

²⁰ iyookkoyyohi waakkhakh lakayeessi, moroyyohi liirti, isꞌdiiꞌddo, isjihit, inaaf, dowwa hollowin, walah keley isiyowan, seley goggoonaan, rabitohi lakaaggowo,

²¹ kalꞌdarri, meleefu ichoow daawohi biꞌdire ichoow wihi iꞌdaase tuumman. Orey a atin tootooche, toro maanta a atin tootoocha, ꞌdooꞌdi jiroti iꞌdee jiro, dakhi Waakh ma gelo.

²² Iꞌdaasenyi Rubeyti Munyee jiroteen goyaka gurnaanki iche desso a wahanyeyyoha, ꞌdoonin, hamaad, nebey, garrahsi, uuri ꞌdabakhe, haag, kakhuufnaanki enenyet lakakhuufo,

²³ samacchaar ichoow isjeyin. Amur wahanyeyyoha ꞌdiiꞌddan mele.

²⁴ ꞌDooꞌdi koo Yeesso Kiriistee wihi uurassicho goya kijiro uskeel imoono ichoow uskeeli lamaanjeerti ba massalaaba a kasoorriyyoocheen.

²⁵ Jiroti inno jirro toolla Rubeyti Munyeenye kajirra gone, jiroteen ichoow Rubeyti Munyee a israaheen giꞌde.

²⁶ Uus inno eylaji beenaate ilmarhaatteet khabine ommos iskaahholloonne ommos isinaafin.