Galaatiya 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Wihi an eldi, geeddi eti dahal leh weel yahe, usu ichoow bowꞌda ba yeerar mee. Eheetteey laka, walah tuumman a wihiissa on.

² Geeddi ibeenki aabbahiis igooche sooyateeh, weel ꞌdooꞌdi aabbahiis dahanohicho gesse ichoow ki wihiis yaakhicho iche ilicho kijira.

³ Inno laka a iꞌdaas on. Ichoowka maanti Kiriisto yimiy saggi nyaakhuti rurrucchule ijirre. Iꞌdi bowꞌdayyoot u miigti suujenye harratane iche inno anatte.

⁴ Iꞌdaasenyi maanti ibeenki Waakh gooche yitah ka, Waakh Weeliis sooerge. Iꞌdi weeli enenyet u arantoo desse, dakhi amurre Muusa goya kadesse,

⁵ ꞌdee ꞌdooꞌdi amurre anatti soogatta toro soofura, ꞌdee Waakh tuum inno khaatta nyaakhutiis nateeh.

⁶ Jeenteti atin nyaakhuti Waakh itahiin u la, Waakh Rubeyti Weeliissa rirriirto, “Aabba, Aabbahaaw,” elatti sooerge, rubeyoheen goya gesse.

⁷ Kola geeddi atin bowꞌda keeheet a massatte, atin a nyaakhuti Waakh. Jeenteti atin nyaakhuti Waakh itahiin u la, wihi Waakh nyaakhutiis ikhabo tuumman atin laka a muꞌdantahiin.

Baawulo urur Kiriistoki Galaatiya ichohi yeedi rummaat ꞌhelo ꞌdoona

⁸ Orey goorat atin Waakh ma garattaane, wahanyeyyohoo rumanka Waakh ieheynane bowꞌdaticho eheet.

⁹ Iꞌdaasenyi toolla atin Waakh abatteene, ommos Waakh atin garti la, a iꞌdoh toro miigti suujenye ꞌdaꞌddarane mammarahe harrata dakhatti ikanokhattaan? Bowꞌdatichooda toro itaahan ꞌdoontaan?

¹⁰ Atin daawohi Yaꞌhuude seerassoo ichoow hayohoo ichoow guꞌhassoo ka liinonnokhti lakhumummaacho raahtaan.

¹¹ An a atin ulooda, kolossoo hili goorat an atin ihile a ki ilmarhaatteet on.

¹² ꞌDooꞌd Kiriistokaaw a atin hawwaasdee, taba iꞌdeey u amurre Muusa iskafura. A mehe ani iꞌdi atinhi Yaꞌhuud ieheynan a itah. Atin walah khufenye atin iyeesseen mele.

¹³ Saggi atin igarattaan u, jeenteti an iꞌdarsade iche kolooraat Wori Haaggan atin icheeke.

¹⁴ Sarteeyti ꞌdaran kajmeti buurenye atin ititah. Eheetteey laka, atin ma iꞌdarraawin ommos ma iꞌdiiꞌdin. Saggi atin imartiisatteen, atte an a herti Waakh ommos a Yeesso Kiriisto rubeytiissa.

¹⁵ Hamaadi goorat maantaas atin khabteen toolla meeke? Garti an laabo, chiꞌ kootte iche tateeh, indohiin laka a soobukkhissaane isiissaan!

¹⁶ Toollaka runti an atin isoocheeko on ka chiiytankiin itah?

¹⁷ ꞌDooꞌdaas amurreti Yaꞌhuud atin ihosso weyti ichohi ankicho atin ilaabo ꞌdoonaane, iꞌdaasenyi wihi icho yeelin ꞌdoonaan ma haaggan. Wihi icho ꞌdoonaan tuumman a seleyhi icho inno bahchaane, ꞌdee atin laka icho weyti raahin ꞌdoontaan.

¹⁸ Weyti haaggantahe chirri wohoo laꞌdoono, chiꞌ wihi at ꞌdoonto on haagganyahiin. Toro la kol dakkhan waha a rum chaꞌan atin leejiro kalday on menye.

¹⁹ Nyaakhuteeyki an weyti ꞌdoono, bolokkhi iꞌdi ki aranti chiisenye toro atin ikhaba, ma ikabaho la ichoowka Kiriisto ka iiꞌdowtaan.

²⁰ Kootte incheenka toolla a atin leejira, ꞌdee hol ka ma atin leeyyeedo. A mehe an a atin kamalala.

Iyookko yeele Aburaaham

²¹ Atinhi amurre Muusati atin anatti ꞌdoontaan, bal isoocheeka, wihi amurre Muusa elatti ma dagansattaan a?

²² A mehe wihi chiiran, Aburaaham inam lamma khabe, koo a ki aranti bowꞌdee desse, koo la a ki aranti furan desse.

²³ Inankiiski aranti bowꞌdee desse, jiti weeli enenyete kadesse. Iꞌdaasenyi ki addan ayyinti Waakh usu igooche kadesse.

²⁴ Wahanyeyyoha iꞌdi iyookko liikhaata. Oboorriha a iyookkoti ayyinti lammeenye Waakh rubeytiis on weeli enenyet igooche. Haagar ayyinti Waakh Hali Sinnaay ka gooche itolossa. Nyaakhuti ayyintaas raaho iche desse la a iꞌdi bowꞌda.

²⁵ Haagar Hali Sinnaaye ili Araabo kijiro iche itolossa, toro la ilkerengeetti weene Yeerusaleeme weyꞌdane itolossa. A mehe nyaakhutiche khabtaayi iche a bowꞌda.

²⁶ Iꞌdaasenyi ilkerengeetti weene Yeerusaleeme saraate Waakh a iꞌdi makhaabassi furane, iche la a abarteenna.

²⁷ A mehe wihi chiiran, “Makhaabassa mahanenye nyaakhut idelin hamaad! Riire, hamaad ka ooy, atihi bolokkhi chiis igaran! A mehe makhaabassi lakaguure, dessi ittaawenye ꞌhessa, wihi makhaabassi makhaabaliche leetaal kussane ꞌhessa.”

²⁸ ꞌDooꞌd Kiriistokaaw, atin toollaka a iꞌdi Isakhi ínam Saaree. A mehe atin a nyaakhuti ayyinti Waakh gooche.

²⁹ Maantaas inanki jiti weeli enenyet kadesse, inanki miigti Rubeyti Waakh kadesse sina omhiche. Uliba laka a iꞌdaas on.

³⁰ Iꞌdaasenyi Chiirnaanneti Waakh mehe tadeeh? “Nyaam aranta bowꞌdee ichoow inankiche ba rih! A mehe inanki aranti furan ayyinti Waakh a muꞌdanyahe, inanki aranti bowꞌdee ayyintaas jirtuu ma kakhabo.”

³¹ Maantaka, ꞌdooꞌd Kiriistokaaw, inno nyaakhuti aranti bowꞌdee menye, a nyaakhuti aranti furan.