Galaatiya 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Ergaano saggi Waakh Baawulo ergaano ikayeele khaatatta

¹ Inkoo guꞌh tomon ichoow affare kutte, Barnaba khabaayi, ilkerengeetti weene Yeerusaleem toro inokhde. Tiito laka a khaadde.

² An jeenteti wihi Waakh isoobabbakkaahiche iirde. Reeri ꞌdooꞌd Kiriisto woyo magah khabo kalday on Wori Haaggane an yaafohi Yaꞌhuud ieheynan icheeko, woriis icheeke. An mehe karoore ya, hili an orey haaggiche ichoow ki toolla an haaggicho, usuhi ki ilmarhaatteet yateeh ma ꞌdoono.

³ Tiitohi wahalheeye, chuꞌus Giriig eheet laka, khandihi Yaꞌhuud khandiiti ma liiholin.

⁴ Aytaas khandi miinsan jeenteti ꞌdooꞌdoo ꞌdooꞌd Kiriisto iskaayyeelo dagsi ka goyteen isoogeluu a soobahte. ꞌDooꞌda la furnaanki Yeesso Kiriisto inno soofure, iche ꞌdegey kayimiyye, ꞌdee bowꞌdayyohi hugummeti Yaꞌhuud inno kayeelaan.

⁵ Nah la yeedicho nabah ma isudin iꞌdaaru laka. A mehe runti Wori Haaggane atin ikaaynaa.

⁶ ꞌDooꞌda urur ꞌdooꞌdi wewween ikhaato laka Wori Haaggane an enenyet abche walah icho kakhayeen mele. Wihi ꞌdooꞌda eheet, ani ka a walahba. A mehe Waakh enenyet fool mee yeyo.

⁷ Mehe argeen ya, saggaas Waakh Beetero hili us Wori Haaggan ꞌdooꞌdi Yaꞌhuud icheeko ikorche, iche Waakh ani laka hili an Wori Haaggan yaafohi Yaꞌhuud ieheynan icheeko ikorche.

⁸ A mehe Waakkhi hili Waakh liihilo ka Beetero ergaanoti ꞌdooꞌdi Yaꞌhuud kayeele, ani laka hili Waakh liihilo ka ergaanoti yaafohi Yaꞌhuud ieheynan a ikayeele.

⁹ Yaakoobo ichoow Beetero ichoow Yoohana, iche tirrinki urur Kiriisto liiekkaacha. Icho la saggi an haaggi Waakhe buure ka hila liisiiche a abteen. Toro ani ichoow Barnaba kulanki urur Kiriisto ka nah khaatteen. Wihi nah iskadaagne a mehe ya, icho yaafohi Yaꞌhuude iirtaane, nah la yaafohi Yaꞌhuud ieheynane iiranna.

¹⁰ Wihi kaldache icho nah daaheen a mehe ya, ꞌdooꞌdichoki miskiinee a lakasooꞌhelo. Anna wahaas a wihi an uureey kakhabo on.

Baawulo ilkerengeetti Antiyookhiya ka Beetero fool kakhabta

¹¹ Maanti Beetero ilkerengeetti Antiyookhiya yimiy, wihi us kijire a khufé, anna fool kakhabde, tirrime.

¹² Iꞌdi eheneet, ꞌdooꞌdoo Yaꞌhuude Yaakoobo kayimiy a jire. Geeddi ꞌdooꞌda iimaatan, Beetero ꞌdooꞌdi yaafohi Yaꞌhuud ieheynan a leegolossata. Iꞌdaasenyi inkoo ꞌdooꞌdaas Yaꞌhuud yimiy, Beetero yombo inokhte, ꞌdooꞌdi us leegolossati kagowe. Waha a jeenteti us ꞌdooꞌda Yaꞌhuude, yaafohi addane lakhandiyo ꞌdoono ikarooro.

¹³ ꞌDooꞌdi addane Yaꞌhuud laka usuhaas iskaayyeelo ikhaye, iskaayyeelnaankaas ka, Barnaba laka labaabiiche.

¹⁴ Iꞌdaasenyi wihi an arge, fiddihicho ichoow runti Wori Haaggan ma israahaan. Maantaka Beetero ꞌdooꞌd tuumman ortiis ka mehe iidah ya, “At a Yaꞌhuude, eheetteey laka, jiroti Yaꞌhuud menye jiroti yaafohi Yaꞌhuud ieheynane jirta. Saggoh yaafoha Yaꞌhuud ieheynan hugummeti Yaꞌhuud ikaholissa?

¹⁵ “Nah delmaat ka a Yaꞌhuud. Nah yaafohi Yaꞌhuud ieheynane innohi Yaꞌhuud uskeele kaassohtaan elanni mee.

¹⁶ Iꞌdaasenyi wihi nah garanni, eti Waakh ortiis ka eti fissan iekkaacho ki amurre Muusa raaho menye, a ki Yeesso Kiriisto kakhuufo on. ꞌDeerka nah laka Yeesso Kiriisto kakhuufna, ꞌdee amurre Muusati nah raahno ka menye, kakhuufnaanki nah Kiriisto kakhuufno ka, Waakh nah laka ꞌdooꞌdi ortiis ka fiffissan nah iekkaacha. A mehe etoo kaldaye amurre Muusati us raaho ka, Waakh eti ortiis ka fissan iekkaacho mele.

¹⁷ “Toollaka nahi Yaꞌhuud Kiriisto a kakhuufne ꞌdee Waakh ꞌdooꞌdi ortiis ka fiffissan nah iekkaacha. ꞌDooꞌdoo Yaꞌhuud ka la, ꞌdooꞌdi uskeel lehe nah liiekkaacha. Kiriisto uskeelaas nah kalugꞌde? Waakh meesseen bujiiy!

¹⁸ Chaꞌan jiti amurre Muusati laraaho an ꞌhor jire an ꞌdiiꞌde toro toolla kanoolahe, iꞌdaas ka saggi rumanka an uskeel iyeele tusa.

¹⁹ A mehe amurre Muusati an raahe ka, woynaanki amurretaas iwoyte a massate, ꞌdee Waakh ijira.

²⁰ Saggi Kiriisto iyumuy u, a iꞌdoo ani laka umuyye, kola jiroti an jiro teey menye, iꞌdaasenyi Kiriisto jiroteey dakhta. Kola sarteey ka jiroti an jiro, kakhuufnaanki an Weeli Waakh kakhuufo iche kajira. Ulla a iꞌdoona, toro la ani a iyumuy.

²¹ An haaggi Waakhe buurenye an ribnaan kaꞌhele sag an ꞌdol iassil mele. Iꞌdi tahe chirri amurre Muusati laraaho ka Waakh ꞌdooꞌdi ortiis ka fiffissan nah iekkaacho, Kiriisto walah us iyumuy mele gon!”