Efeesso 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti banayhi Waakh dakhtaan

¹ Atin a nyaakhuti Waakhe us weyti ꞌdoono gone, taba giꞌde, fataliis jira.

² Wihi atin haaggissaan tuumman ka, ꞌdooninti atin enenyet ꞌdoontaan a laargo, saggi Kiriisto inno iꞌdoone ichoowka us iroonoteen u jirotiis isoobahchuu. Ulla sadakha ichoow soorriyoti uyuugenye Waakh liibahche yitah.

³ Atin a ꞌdooꞌdi Waakhe munyee gone, uus goytiin ka wahanyeyyohi iꞌdee jirin, ꞌdooꞌdi isidisanne isleeurꞌdo ommos biꞌdiri nool ommos suujoonki uurassiin goya kasoobaho ommos ꞌdamaam.

⁴ Toro la ma haaggan chirri atin wihi lakhaanyee kaayyeeddaane, ommos atin yeedi indigir ikhabin kaayyeeddaane, ommos chuunki suuje ischuuntaan. Wahanyeyyohaas ma atin imalin. Atinhi wihi Waakh atin iyeele usu kalaꞌd ikalaabtaane haaggan.

⁵ Waha tissiba giꞌde, eti sohoꞌddarri kaassohti ommos eti biꞌdire ommos eti ꞌdamaame, eti iꞌdee wihi us ꞌdamaam iyahe waakkhakh kayeessa gone, koo kaldaye dakh Kiriisto ichoow dakhi Waakh muꞌdan mele.

⁶ Uus etoo kalday laka yeedi ilmarhaatteet ka atin ekkeysan. Iꞌdi tahe jeenteti wahanyeyyohi iꞌdee u, holi Waakh ꞌdooꞌdi usú iraahin a isoobaha.

⁷ Maantaka ꞌdooꞌdi uskeelaas yeelo awalhinna.

⁸ A mehe atin rubeytiin goorat ꞌhor mugꞌdi eheete, iꞌdaasenyi atin ichoow Kamur wohoo kalday a tahiin gone, banaye titaaheen. Maantaka fatali ꞌdooꞌdi banaye jira giꞌde.

⁹ A mehe banayha gurnaanki us delo a haag tuumman ichoow wihi fissan tuumman ichoow wihi rummaat tuumman.

¹⁰ Toro la wihi Kamur kahamaadicho ꞌdonꞌdoona.

¹¹ Taba wahanyeyyohi ꞌdooꞌdi mugꞌdi goya kijiro gurnaan idelin iꞌdaaru laka araahina, wihi icho yeelaan ꞌdow isoobahcha.

¹² Iꞌdi tahe a lakhaanyo laka chirri inno wihi icho dagsi ka yeelaan kaayyeeno.

¹³ Iꞌdaasenyi chirri banay wohoo katoollaan, wahaas wihi icho rumanka yahiin a laarga.

¹⁴ Iꞌdi tahe banay walah tuumman wihi icho yahiin a tusaan. Jeentetaase mehe liiessa ya, “Atiha uꞌdurto, sookahe, omoot kasookahe, Kiriisto la banayhiis a atin kiifchaa.”

¹⁵ ꞌDeerka saggi atin ijirtaan weyti yuubsada. Saggi ꞌdooꞌdi ꞌdalammee iijirina, iꞌdaasenyi saggi ꞌdooꞌdi kharayyee ijira.

¹⁶ Jeenteti waha ibeenneti enenyet uskeel yeelo iyahiin u, ibeenki Waakh atin siicho dakkhan mujjum khaadda, saggi rumanka Kiriisto liiraaho tusa.

¹⁷ Maantaka saggi ꞌdooꞌdi ꞌdalammee iijirina, iꞌdaasenyi wihi Kamur atinhi yeessaan ꞌdoono abda.

¹⁸ Taba, farsoti sabiib ka meleefu iitaahana, a mehe jiroti uskeeli buurenye iꞌdaanu layeelo keenaan. Iꞌdaasenyi Rubeyti Munyee a atin buuhisso.

¹⁹ Iꞌda ka Sabuuri Yeedi Waakh goya kayimiy ichoow geeyohi Waakh lakasaaꞌdo ichoow geeyohi Rubeyti Munyee atin siisso a iskaleeyyeeddaan. Uurassiin ka Kamur geeyo idowa.

²⁰ Toro la magah Yeesso Kiriistohi Kamureene ka, kol dakkhan Waakkhi Aabbaheene walah tuumman ka kalaꞌd ilaaba.

²¹ Wihi ꞌdaꞌddaboot, jeenteti atin Kiriisto iinkaanyittaan u, taba giꞌde, af iiskutina.

Mindischo a iꞌdi Kiriisto ichoow ururiissa

²² Deyyeho, taba makhaaballetiin aficho akutina, saggaas atin Kamur afiis ikutin u.

²³ A mehe makhaabal usu matakki makhaabassiise, saggi Kiriisto matakki ururiis iyahuu. Kiriisto la usu ururiiski iꞌdi sartiise ꞌDoorribehichee.

²⁴ Toolla saggi urur Kiriisto Kiriisto afiis ikutin u, arame laka walah tuumman ka iiche makhaabaliche afiis kutin.

²⁵ Makhaaballe taba, saggi Kiriisto ururiis iꞌdoone us jirotiis icho ikasoobahchuu, atin laka oboorrihiin ꞌdoona.

²⁶ Kiriisto la iꞌdane yeele, ꞌdee dikhnaanki us bicche ichoow Yeediis ka dikhe ka ururiis munyaacha.

²⁷ Toro la iꞌdane yeele, ꞌdee berri ururiis tuumman ankiis keena. Urura la a ki ababo, el ikhabine ommos ichamammowine ommos wohoo suuje fool ka ikhabin, iꞌdaasenyi a ki munyeenye toro la wohoo rucchul laka liikacheekan.

²⁸ Saggaas on u, makhaaballe laka saggaas maanta iche sartiche iꞌdoonto oboorrihiche a iꞌdoonto. Eti makhaabassiis ꞌdoono a isꞌdoona.

²⁹ A mehe a ꞌdowe et koloo kalday laka sartiis ꞌdiiꞌdo mele, iꞌdaasenyi ebba sartiis a goollicha toro la lagta. Kiriisto laka ururiis iꞌda on yeela.

³⁰ Iꞌdi tahe inno a iꞌdi miilassi sartiissa.

³¹ Saggi Chiirnaanneti Waakh ka liichiiruu, “Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine lammacho ba sartoo kalday yateehiin.”

³² Chiirnaankaas aytoo weyti weene dagsane kaayyeda. Iꞌdaasenyi yeedaas ka ani Kiriisto ichoow ururiissa kaayyeeda.

³³ Iꞌdaasenyi taba etiin ba saggi us isiꞌdoono makhaabassiis a iꞌdoono, makhaabál la makhaabaliche a inkaanyitto.