Efeesso 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti husube inno Yeesso Kiriisto ka khabno

¹ Atin ꞌhor anki Waakh ka ꞌdooꞌdi tuume eheet, a mehe atin wahanyeyyohi Waakh a daagiwwaayteene, toro uskeele yeesseen.

² Maantaas la wahanyeyyohi harratane sussuuje ichoow karnati ginnayyohi saraat anti iche raahteen. Ulla a ki ꞌdooꞌdi Waakh daagiwwaayo woyo.

³ Inno tuumman laka ꞌhor iꞌdichooda eheete, wihi uurasseen goya kijiro uskeel imoono on iamuunne, uskeeli uurasseen ichoow malasseen ꞌdooneen on maanjeeranne. Inno iꞌdi ꞌdooꞌdi addan u wihi inno imale a holi Waakh.

⁴ Iꞌdaasenyi Waakh weyti uurnugulyahe. Jeenteti ꞌdooninti buurenye Waakh inno ꞌdoonuu,

⁵ inno ichoow Kiriisto wohoo kaldaye inno kayeele, jiro inno siiche. A mehe jeenteti inno Waakh idaagiwwaaynuu anki Waakh ka a tuunne, iꞌdaasenyi haaggiiski buurenye inno imunneynan ka us a inno ribe.

⁶ Toro la wohoo kaldaye Waakh inno ichoow Yeesso Kiriisto inno kayeele ka, Kiriisto omoot a inno kaleesookahche, goobi Waakh ka komborti antoot inno kaleeorrommiche.

⁷ Waakh iꞌdane yeele ꞌdee Yeesso Kiriisto ka haaggiiski buurenye inno imunneynane wohoo weyti buure laka liikookkaanne uuriiski ꞌdabakhenye us inno ikhabo lakaargo, inno tusa.

⁸ A mehe Waakh haaggiiski buurenye atin ikamalin ka a atin ribe. Ribnaanka la kakhuufnaanki atin usu kakhuuftaane kayamiit. Waha la wihi atin kayimiy menye, a siinti Waakh one,

⁹ toro la jeenteti atin wohoo iyeesseen mee, uus ꞌdee etoo kalday laka eylajine.

¹⁰ A mehe Waakhe wihi toolla inno nahe inno kayeele. Wohoo kaldaye inno ichoow Yeesso Kiriisto nahe ka a inno soouume ꞌdee hilassi hahhaaggane Waakh goorat inno itannabiche kaassahanna.

Kiriisto ka yaafohi Yaꞌhuud ichoow yaafohi addan ba a wohoo kalday

¹¹ Maantaka, atinhi yaafohi Yaꞌhuud ieheynan kadelatteen, bal wihi goorat atin ꞌhor eheet kasooꞌhela. Yaafohi Yaꞌhuud mehe atin yadeehiin ya, “ꞌDooꞌdi ikhandiineynan.” Icho la mehe isyadeehiin ya, “ꞌDooꞌdi khandiyan.” Iꞌdaasenyi, khandihaas a wihi enenyet on sar lagoggoocho, dahanti weeli enenyet on yeesso.

¹² Saggi goorat maantaas atin ichoow Kiriisto yeerar ieheneet kasooꞌhela. Atin yaafohi Issiraayele Waakh soobahsate goya ma kajirin. Ayyinti goorat Waakh yaaftaas igooche atin goya ma kajirin. Harrata uskeel kijiro ka la khajjeeloo rucchul laka ma khabine, Waakh laka ma khabin.

¹³ Iꞌdaasenyi atinhi goorat Waakh foga ileejirteene toolla atin ichoow Yeesso Kiriisto ba wohoo kalday titaaheen, diig Kiriisto ka, Waakh a atin liisoodowwaache.

¹⁴ A mehe Kiriisto rubeytiissa nahi yaafohi Yaꞌhuude ichoow atinhi yaafohi Yaꞌhuud ieheynan ba inno isineybiche yaaftoo kalday inno kayeele. Usú moosi goorat seley inno bahcho inno isichiiyoocho jejjebché.

¹⁵ Us Kiriisto ka iꞌdane yeele, amurre Muusati alohi ittaawe khabto omoottiis ka miig tire, ꞌdee yaafoha lammacho usu ka yaaftoo kaldaye husub kayeela. Iꞌda ka lammacho isineybicha.

¹⁶ Toro la omootti us massalaaba kayumuy ka, Kiriisto chiiyoonki yaafoha dahcho kijire a bahche isikeene, lammacho sartoo kaldache icho yahiin ka anki Waakh keene.

¹⁷ Kiriisto a yimiyye yaafohi Yaꞌhuude Waakh idow ichoow atinhi addane Waakh foga ileejirteen wori nebeyeet icheeke.

¹⁸ A mehe Kiriisto ka, innohi Yaꞌhuude ichoow yaafohi addan ba, Rubeyta Munyee ka, Waakkhi Aabbaheenenye inno leeyyeeno a muꞌdannahe.

¹⁹ Jeenteti waha u atinhi yaafohi Yaꞌhuud ieheynan kola ꞌdooꞌdi liigaran ichoow marti mee, iꞌdaasenyi atin ꞌdooꞌdi Waakh goya kijirtaane, toro la a ꞌdooꞌdi minki Waakh.

²⁰ Atin a iꞌdi daddaabohi ilaate minki ergaano ichoow ꞌdooꞌdi Waákh íyeyyeedo kadisanyahiin. Tirrinki dagaheete minka la, a Yeesso Kiriisto rubeytiissa.

²¹ Kiriisto ka min tuumman a iskhuccha, toro la buuraacha, ichoowka minki Waakhe buurenye lagane Kamur yateeh.

²² Atinhi Yaꞌhuud ieheynan ichoow Kiriisto a wohoo kalday gone, Kiriisto atin ichoow Yaꞌhuud ba a atin isikeena, ꞌdee minka Waakh Rubeytiis ka igelo atin tuumman tateehiin.