Bakkaahit 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooꞌdi Waakhe alif kudoo ichoow alif tomon affar ichoow alif affare sumatti Waakh lagessa

¹ Waha ꞌdubicho ka, herti Waakhe affarenye harra ꞌdollohiche affarcho tolosso arge. Herta Waakh la hafarreti affarenye harra iche harrati angagan ichoow beyohi burbuure ichoow wihi geeye kajeyissa.

² Hertoo Waakhe addan ichehi beri kasookorto arge. Iche la reenki ꞌdooꞌdi Waakkhi jiro lakasunto khabta. Herta Waakh la herti Waakhe affarenye harra ꞌdollohiche tolosso Waakh antohi iche harra ichoow beyohi burbuure weyti kagaameerto siiche hooyi buure ka kariirte, wihi iche icho itidah,

³ “Harra ommos beyohi burbuure ommos geeyo agaameerina, ichoowka falfayyohi Waakh tuumman sumatti Waakh miin a gelinno.”

⁴ Ani la tiri ꞌdooꞌdi sumat lagesse a daage, a et alif kudoo ichoow alif tomon affar ichoow alif affarenye yaafohi Issiraayel tuumman kayimiy.

⁵ Saggi yaafohi Issiraayel sumat liigesse a iꞌda. Yaaf Yuuda a et alif tomon ichoow alif lamma, yaaf Ruuben a et alif tomon ichoow alif lamma, yaaf Gaad a et alif tomon ichoow alif lamma,

⁶ yaaf Aacha a et alif tomon ichoow alif lamma, yaaf Naftaali a et alif tomon ichoow alif lamma, yaaf Manaasseh a et alif tomon ichoow alif lamma,

⁷ yaaf Siimiyon a et alif tomon ichoow alif lamma, yaaf Laawi et alif tomon ichoow alif lamma, yaaf Issakhar a et alif tomon ichoow alif lamma,

⁸ yaaf Seebulon a et alif tomon ichoow alif lamma, yaaf Yuussuf a et alif tomon ichoow alif lamma, yaaf Beenjameen la a et alif tomon ichoow alif lamma.

Ururi weyti buurenye goobi Waakh goyaka Waakh wahti

⁹ Waha ꞌdubicho ka an yeye, orteey ka ururi weyti buurenye ekkees liiubaaꞌdane ilal tuumman ichoow yaafo tuumman ichoow ꞌdooꞌdi fil tuummane ichoow afaf tuumman kayimiyye komborti Waakhe antoot ichoow Heleem ortiis ba toollo arge. Icho la kabuuꞌddeti daddakhane gessateene toro la seytohi geeyi baare dahanohicho ka khucchaan.

¹⁰ Icho la hooyi buure ka riireene, wihi icho yidaaheen, “Waakkheenki komborti antoot kafiddiyo ichoow Heleem, ribnaanki inno laribo icho on leh.”

¹¹ Herti Waakh tuumman komborti Waakhe antoot ichoow ewweenki tomon lamma ichoow affare ichoow wahanyeyyohi affarenye lasoouume rubey khabo khaaricheene, tolossateen. Komborti Waakhe antoot orche ka il guꞌddeene, Waakh wahteene,

¹² wihi icho yidaaheen, “Aamiin! Saaꞌdo ichoow weynaan ichoow khara ichoow kalaꞌd ichoow inkaanyit ichoow miig ichoow anto Waakkheenki jirtuu tuumman jiro a muꞌdanyahe. Aamiin!”

¹³ ꞌDeerka ewweenkaas kichokoo wihi us iworsate, “ꞌDooꞌda kabuuꞌddeta khabo a ayyo illeh? Toro la intoh kayimaateen?”

¹⁴ Wihi an ilaabe, “Eti ween, ati a garatta.” Ulla wihi us isoolaabe, “Waha a ꞌdooꞌdi sinati buure goya kasoobahe, a ꞌdooꞌdi kabuuꞌddeticho diiggi Heleem lakadikhe, ladakhnaache.

¹⁵ Maantaka, “icho komborti Waakhe antoote ortiis toollaane, maalim ichoow ibeen minkiiski buure ka usu ihilaan. Waakkhi kombor kafiddiyo la eematiis ka icho a ogooga.

¹⁶ Icho jirtuu toro ma ankayaane, jirtuu toro ma subgaataan. Orrah ommos kuleeli uskul, sarticho ma gubo.

¹⁷ A mehe Heleenki komborti antoot kafiddiyo ersinkichooda yateehe, ulla issi bicchehi jiro lakaꞌhelo icho iwoya. Waakh la ilmohicho tuumman indohicho a kahiyyaaya.”