Bakkaahit 6 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Hanjati oraate khadaabi yuuban kadagsane labukkhicho eti sooricho miinsantahe

¹ Geedda an fiiricho, Heleem hanjati oraate khadaabi yuuban kadagsan bukkhiche. ꞌDeerka wahanyeyyohi lasoouume rubey khabo affare kichokoo, usuhi hooyi iꞌdi ki guugahe ka, “Kaale!” iyidah daage.

² Ani yeye, orteey ka faraꞌdoo dakhan arge. Eti faraꞌd fuulo la bihine khuccha, toro ꞌduubi antoote lasiiche. Ulla iꞌdi eti chiiytiis soorichuu, bahe ꞌdee chiiytiis sooricha.

Hanjati lammaatteete khadaabi yuuban kadagsane labukkhicho diho miinsantahe

³ Chirri Heleem hanjati lammaatteet bukkhiche ka, wihi lasoouume rubey khabo, ki lammaatteet usuhi, “Kaale!” iyidah daage.

⁴ ꞌDeerka faraꞌdoo addane guuꞌddane iꞌdi ꞌdabe soobahe. Waakh eti fuulo antohi us nebeyti harra kabaabiicho toro enenyet isbakkicho siiche. Birlaboo buure laka siiche.

Hanjati seyyahnaatteete khadaabi yuuban kadagsane labukkhicho raarahe miinsantahe

⁵ Chirri Heleem hanjati seyyahnaatteet bukkhiche ka, wihi lasoouume rubey khabo, ki seyyahnaatteet usuhi “Kaale,” iyidah daage. An yeye, orteey ka faraꞌdoo daayiti khaalkhee arge. Eti fuulo la rottole dahan kakhuccha.

⁶ Hooyoo iꞌdi ki enenyete la wihi rubey khabo affare dahcho kasooyeede daage, wihi us yidah, “Chilimmeti eti orrahtoo hil haaggiche laguto kiilotoo ꞌdargaayye on bahta. Kiilo seyyah nyumumma laka chilimmeti eti orrahtoo hil haaggiche laguto on bahta. Subakki geeyi oolif ichoow farsoti sabiib la akheeroon.”

Hanjati affarnaatteete khadaabi yuuban kadagsane labukkhicho omoote miinsantahe

⁷ Chirri Heleem hanjati affarnaatteet bukkhiche ka, an wihi rubey khabo affare, ki affarnaatteet usuhi, “Kaale,” yidah daage.

⁸ An yeye, orteey ka faraꞌdoo ulah dakhan arge. Eti fulo magahiis, Omoot iche layadeehe, ꞌdubiis la meessi omooteete sooraahta. Waakh antohi icho enenyeti harra kijiro et affar goyaka koo yagiisiin siiche. Antohaas ka la ꞌdooꞌdi harra kijiro diho ka ichoow nabhayye ka ichoow sugeerre ka ichoow binahi yibaat ka a bakkicha.

Hanjati channaatteete khadaabi yuuban kadagsane labukkhicho ꞌdooꞌdi jeente Kiriisto liibakkiche miinsantahe

⁹ Chirri Heleem hanjati channaatteet bukkhiche ka, koondihi gaꞌdaar iliis ka rubeyohi ꞌdooꞌdi jeenteti us Yeedi Waakh ichoow runti Yeesso miinsan icheeko liibakkiche arge.

¹⁰ Hooyi buure ka riireene, wihi icho yidaaheen, “Kamuri Miig Tuumman Leh, at a rume toro a munya. Ichoowka maantoh malmassa ꞌdooꞌdi harra kijiro hukkunta, ꞌdooꞌdi goorat diiggeenyo khube aal kagutatta?”

¹¹ Kooba ꞌdeerka kabuuꞌdoo dakhan lasiiche, iꞌdaaru nasa ichoowka tiri ilbooyyeti wahalhicheenye toro Kiriisto rummeysatte iꞌdichuu lasoobakkicho a labuuhicho liidah.

Hanjati lihnaatteete khadaabi yuuban kadagsane labukkhicho roorroti buurenye miinsantahe

¹² Ani Heleem usuhi hanjati lihnaatteet bukkhiche ꞌdeyꞌdooche. Harra weyti sesseehte. Orrahe urgiite iꞌdi sakkaassi kolleyteet u daayatte, yeyyah tuumman urgiye guꞌduuꞌddi diig bahche.

¹³ Yiyyihimohi serey kijiro la iꞌdi khoonati hafar sesseehiche sookhubatti u, harra kasoodiddiheen.

¹⁴ Sereyta daayan iꞌdi khadaabi layuubuu jibbaadnante, baabaate. Halal tuumman ichoow kurohi bey goya kijiro laka meessicho lakabahche.

¹⁵ ꞌDeerka karnatohi harrata ichoow ꞌdooꞌdi harra anti ichoow ꞌdooꞌdi iskar iwewween ichoow kamurre ichoow ꞌdooꞌdi wewween ichoow bowꞌdayyo tuumman ichoow ꞌdooꞌdi furan tuumman goꞌddaꞌd ichoow daddaabohi halal kijiro iskadagche.

¹⁶ ꞌDooꞌda la halal ichoow daddaabo kariireene wihi icho iyidaaheen, “Nah kasooreya, fooli eti komborti antoot kafiddiyo ichoow holi Heleem nah kadagcha.

¹⁷ A mehe ibeenki weene Waakh ichoow Heleem enenyet holicho tustaan a yitahye, ayyo ꞌdeerka bahsata?”