Bakkaahit 21 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Ilkerengeetti weene Yeerusaleeme husub

¹ ꞌDeerka sereyti daayane husub ichoow harrati husub arge. Iꞌdi tahe harrati oraat ichoow sereyti daayane oraat tuummamba a kuteen. Walah beyenye kola jiro mele.

² Anna Ilkerengeetti Weene Lagane Yeerusaleeme husube goobi Waakh ka sookhubatti arge. Ilkerengeetta a iꞌdi inanti ladiso tannabatte eti disti gaaddi haaggan igessatte.

³ Hooyi buurenye komborti antoot kasooyeedo daage, wihi us yidah, “Yeya, Waakh kola weeli enenyet goya furta. Ulla icho a leefiddiya, icho la ꞌdooꞌdiis yateehiin. Waakh rubeytiis la icho a leejira, ulla Waakkhichooda yateeh.

⁴ Waakh la indohicho ka ilmohicho tuumman a hiyyaaya. Kola omoote ma jirto, enenyet looyo mele, oytime ma jirto, bolokh laka ma jiro. Iꞌdi tahe wahanyeyyohi oraat a kuteen.”

⁵ Eti komborti antoot kafiddiyo la mehe yidah ya, “An walah dakkhan a husubnaacha!” ꞌDeerka wihi us ani iyidah, “Waha chiir, iꞌdi tahe yeedassa a wihi lakakhuufo, toro la a wihi rummaat.”

⁶ Ulla wihi us ani iyidah, “Walah dakkhan a layeele! Ani Uumaccheenye toro ani on ꞌDaꞌddabee. An walah tuumman orcho a jire, walah tuumman ꞌdubicho laka a jira. Eti subgaate, an iꞌdaanu bicchehi issi jiro kayamiit siicha.

⁷ Eti sooricho wihi tuummane usu muꞌdane ꞌhela, an Waakkhiissa ateehe, ulla weeleey yateeh.

⁸ Iꞌdaasenyi ꞌdooꞌdi burꞌdeyyee ichoow ki Kiriisto irummeysan ichoow ki wihi biꞌdire tuumman yeelo ichoow ki enenyet dubunuunu yagiis ichoow ki sohoꞌddarri kaassohti ichoow ki tibaato khabo ichoow ki iyookkoyyohi waakkhakh lakayeessi wahti ichoow ki beeno leh tuumman, meessicho a beyti ꞌdabe iꞌdi lahawti kibiriiꞌd ibolokhto. Waha a omootti lammaatteet.”

⁹ Herti Waakhe teebeenye baakhuulleti teebeenye sinayyohi yomboot buuhaan khabte kichekoo yimiyye ileeyeede wihi us iyidah, “Kaale, nyarnyaar a kituso, iche a makhaabassi Heleem.”

¹⁰ Herta Waakh la Rubeyti Waakh iwoytaayi haloo weyti deer isiꞌdde. Iche la Ilkerengeetti Weene Lagane Yeerusaleeme Waakh katamiite goobi Waakh kasookhubatti itusse.

¹¹ Banayhi ilkerengeetta ababnaanki Waakh rubeytiis kasooababo kayamiitiin. Ababnaankaas la a iꞌdi daakkoo gato miigenye ulhawe iꞌdi kiyoow u warraakhe.

¹² Ilkerengeetta la khaari daddaaboote serey ka weyti deere kamarsan. Toro ilkerengeetta arit tomon ichoow lamma khabta, arite ba la hertoo Waakhe tolossa. Arite ba magahoo yaafohi tomon ichoow lammeenye Issiraayele kachiiran.

¹³ Anki miigeet ka arit seyyahe khaba, anki gurro ka la arit seyyahe khaba, beri ka la arit seyyahe khaba, bahay ka la arit seyyahe khaba.

¹⁴ Khaara daddaaboote ilkerengeetta ween kamarsan, daddaabohoo ilaate tomon ichoow lammee iche kadisanyahe. Daddaabe ba la magahi ergaanoti Heleeme tomon ichoow lammee, iche kachiiran.

¹⁵ Herta Waakhe ileeyyeeddo, wussoo ꞌdahabe iche ilkerengeet ichoow arto ichoow khaari ilkerengeetta kamarsan tuumman karerreegto iche khabta.

¹⁶ Ilkerengeetta la ꞌdollohiche tuumman a ekka. Iche la wussa ilkerengeet karerreegte. Ballaaddihiche a kiilomitta alif lamma ichoow kud lamma, segdeerru ka laka a kiilomitta alif lamma ichoow kud lamma. Deeraantiche ichoow segdeerruhiche ichoow ballaaddihiche a ekka.

¹⁷ Herta Waakh toro khaari ilkerengeet kamarsan rerreegte, yobbo ka a mitta tomon lih ichoow lih. Herta Waakh la saggi enenyet walah irerreego on irerreegta.

¹⁸ Khaara ilkerengeetta kamarsan dagahtoo gato miigenye ulhawe lakadise. Ilkerengeet la ꞌdahabi massane iꞌdi kiyoowhi bildiikheenye kadisan.

¹⁹ Daddaabohi ilaate khaari ilkerengeetta kamarsan kadisanyahe la dagahti fil tuummanenye toro gato miigenye lakeeykode. Daddaabti ilaate oraat a too ulhawe, ti lammaatteet la a too daayane, ti seyyahnaatteet la a too duh ittaawenye, ti affarnaatteet laka a too ulhawe,

²⁰ ti channaatteet a too barlayenye, ti lihnaatteet a too guuꞌddane, ti teebannaatteet a too derle ichoow ulah iskawarsanyahiine, ti siyyeennaatteet a too iche laka ulhawe, ti saagaalnaatteet a too iche laka duh ittaawenye, ti tomonnaatteet a too iche laka ulhawe, ti tomon ichoow koownaatteet a too iche laka guuꞌddane, ti tomon ichoow lammaatteet a too muggee.

²¹ Artohi tomon ichoow lammee tooba daakkoo weyti gato miigenye lakahaaggiche. Jiti ilkerengeetta ween dah kagoocho la a ꞌdahabi massane iꞌdi kiyoowhi bildiikhee.

²² Ilkerengeet goyaka minki Waakhe buure ma argin, iꞌdi tahe Kamuri Waakhenye Miig Tuumman Leh ichoow Heleeme minki Waakhe buurenye ilkerengeetete.

²³ Ilkerengeete orrah ommos yeyyakki banay siicho ma ꞌdoonto. A mehe ababnaanki Waakhe ilkerengeet banay siicha, Heleem la a taahicheeda.

²⁴ Yaafo tuumman la banayhaase goya kaassohtaan. Karnatohi harra tuumman laka kamurroonkicho intane keenaan.

²⁵ Artohi ilkerengeetta maalim tuumman ma looto, a mehe intaas ibeen ma tateeh.

²⁶ Haaggi nool ichoow kamurroonki yaafo tuumman ilkerengeettane lakeena.

²⁷ Walah biꞌdirenye jirtuu ilkerengeet goya gelo mele. Toro la eti wihi lakhaanyee yeelo ommos eti been goocho goya ma gelo. ꞌDooꞌdi gelo, a ki magahenyeticho buuggi Heleeme ꞌdooꞌdi jiroti jirtuu imassan khabo lakachiire kaldach on.