Bakkaahit 20 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Seytaan guꞌh alifoo lahida

¹ Ani la hertoo Waakh ichehi goobi Waakh kasookhubatti arge. Iche la furoti ankhari dahane ieleelin ichoow biingotoo miigenye khabta.

² Herta Waakh la khorojebsihi archiiy jire magahiis ki ꞌdooꞌd hanti ommos Seytaan layadeeh khabatte, guꞌh alifoo hidde.

³ Ankhari dahane ieleelin goya isaate, af hidde toro ꞌduuꞌdde, ꞌdee kola yaafohi harra ma ekkeesti ichoowka guꞌhassi alifoowe kutaan. Maanti guꞌhassaas kuteen, geeddoor toro a lasoofura.

⁴ ꞌDeerka komborohi antoot arge, ꞌdooꞌdi komboroha kafiddiyo la, antohi icho ꞌdooꞌd kahukkumaan a lasiiche. Toro ꞌdooꞌdi jeenteti us wori rummaate koo Yeessee ichoow Yeedi Waakh icheeko matahenye laaggooche arge. ꞌDooꞌda la a ki binahi oraat ommos iyookkoti binahaas iwahanne toro sumatti binahaas miinassicho ommos dahanohicho ka iꞌhelin. Icho la omoot a lakasookahche, guꞌh alifoo Kiriisto harra leedakhtaan.

⁵ Waha a koli oraate Waakh ꞌdooꞌd omoot kasookahche. Eheetteey laka, ꞌdooꞌdi addane tuume omoot ma kasookahine ichoowka guꞌhassa alifoowe kuteen.

⁶ ꞌDooꞌdi Waakh imaalo toro la munyee a ki ꞌdooꞌdi oraate Waakh omoot kasookahcho goya kijiro. Omootti lammaatteet icho anto ma kakhabto, iꞌdaasenyi Waakh ichoow Kiriisto ortiis ka kuhaaniyyohi hili Waakh haaggicho yateehiin. Icho la guꞌh alifoo Kiriisto harra leedakhtaan.

Seytaan ichoow chiiyti Waakh lasooricha

⁷ Inkoo guꞌhassa alifoowe kuteen, Seytaan inti goorat us kahidanyahe ka a lasoofura,

⁸ ulla baha yaafohi harra ꞌdollohiche affarcho kijiro Goog ichoow Magoog layadeeh ekkeesta, ꞌdee yaafoha diho iururicha. Icho la ittaaw ka a geeddi yoohti beyti buure afiche kijiro.

⁹ ꞌDooꞌda la harra kataaꞌhe, furi ꞌdooꞌdi Waakhe ilkerengeetti weene Waakh weyti ꞌdoono khaaricheen. Iꞌdaasenyi ꞌdaboo goobi Waakh on kasookhubte ꞌdooꞌda tuumman bar tire.

¹⁰ Seytaanki ꞌdooꞌda ekkeeste la beyti ꞌdabe iꞌdi lahawti kibiriiꞌd ibolokhto binahi oraat ichoow eti eti Waákh íyeyyeedo iskaayyeelo lakalugꞌde usu laka goya liiseye. Icho la jirtuu tuumman, maalim ichoow ibeen ba, bolokhe latusa.

Hukkunki ꞌdaꞌddaboote Waakh komborti antoote dakhan ka harra hukkumo

¹¹ ꞌDeerka kombortoo antoote buurenye dakhane etoo kafiddiyo arge. Harra ichoow sereye ba eta ortiis kafirdeene, iꞌdaasenyi meel icho isiꞌheleen mele.

¹² Anna ꞌdooꞌdi tuume, ki mimmiige ichoow ki ꞌdaꞌddaran ba usuhi komborta antoot ortiis toollo arge. Buuggag la laaffure. Buuggoo addane magahenyeti ꞌdooꞌdi jiroti imassan ꞌhelo kachiiranyahe lafure. ꞌDooꞌdi tuume ebba wihi us goorat yeele buuggag goya kachiiran ka lahukkume.

¹³ Beye ꞌdooꞌdi tuume goyahiche kijire sooꞌdiisse. Omoot ichoow meessi omooteet la ꞌdooꞌdi tuume goyahicho kijiro sooꞌdiicheene, Waakh la ebba hukkume. Hukkunka ichoow wihi goorat icho yeeleen ba a israahaan.

¹⁴ Waakh ꞌdeerka omoot ichoow meessi omooteet ba beyti ꞌdab goya iseye. Beyta ꞌdab a omootti lammaatteet.

¹⁵ Chiꞌ etoo magahiis buuggi ꞌdooꞌdi jiroti jirtuu imassan ꞌhelo goya liikaꞌhelin, beyti ꞌdabe goya liiseye.