Bakkaahit 19 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jeenteti malaayati ween liihukkumuu ꞌdooꞌdi goobi Waakh a hamaada

¹ Waha ꞌdubicho ka goobi Waakh ka wihi iꞌdi kowdoti ururi ꞌdooꞌdi weyti ittaawee daage, wihi us yidah, “Okkhoow, weyti kikoolinna! Ribnaan ichoow weynaan ichoow miig ati leh!

² A mehe hukkunkaahki ittaawe a rume toro a fissanyahe. Ati malaayati weene, ꞌdooꞌdi harra tuumman sohoꞌddarri ka uskeel kaluguꞌdde, sina a igoosse. At la diiggi falfayyohaahki iche bakkisse, aál a kagutatte.”

³ ꞌDooꞌd toro riire wihi us yidah, “Okkhoow, weyti kikoolinna! Uunki ꞌdabi ilkerengeeteet jirtuu dakkhan serey on ikaha.”

⁴ Ewweenki tomon lamma ichoow affare ichoow wahanyeyyohi affarenye lasoouume rubey khabo ba jilbo il kaguꞌddeene, Waakkhi komborti antoot kafiddiyo wahteene, wihi icho yidaaheen, “Aamiin! Okkhoow, weyti kikoolinna!”

⁵ ꞌDeerka komborti antoot ka hooyoo sooyeede wihi us yidah, “Atinhi ilbooyyetiise tuumman, atinhi usu karoortaan, atinhi rurrucchul ichoow atinhi wewween, taba Waakkheen koolicha.”

Oroosi Heleem

⁶ ꞌDeerka toro hooyi iꞌdi ururi ꞌdooꞌdi buurenye kowdootee daage. Hooya la a iꞌdi bicchehi sookhubti, toro la iꞌdi karkaraho iyeeda. Icho la wihi icho yidaaheen, “Okkhoow weyti kikoolinna! Iꞌdi tahe Kamuri Waakhenye Miig Tuumman Leh, usu walah tuummamba anta.

⁷ Weyti hamaano, weynaantiis koolinno! Iꞌdi tahe oroosi Heleem a yitah. Inantiisti us disti la a istannabisse.

⁸ Iche la gaaddi hahhaaggane bibbildiikhto chaafotoo rucchul laka ikhabine, iche gessatti a lasiiche.” Gaadda la wihi fissane ꞌdooꞌdi Waakh yeele itolossa.

⁹ Herti Waakh ꞌdeerka wihi iche ani itidah, “Waha chiir, ‘ꞌDooꞌdi Waakh imaalo a ki Waakh oroosi Heleem iwahe.’ ” Herti Waakh kakhayte, wihi iche tidah, “Waha a yeedassi rummaate Waakh.”

¹⁰ An la hertaas Waakh orche ka jilbo il kaguꞌdde, wahan leheet. Iꞌdaasenyi wihi iche itidah “Tabe iꞌdaas ayeelin! Annaka iꞌdi ilbooyyeti wahalhaahenye toro wahalhi ꞌdooꞌdi Kiriisto rummeeste runti Yeesso babbakkaahiche raaho u, Waakh on ifala. Waakh kalday on waho! A mehe runti Yeesso soobabbakkaahiche, a miigti farniinki Waakh lakacheeko.”

Eti faraꞌdi dakhan fuulo

¹¹ Goobi Waakh usuhi fahan arge, faraꞌdoo dakhan arge. Eti faraꞌda fuulo la magahiis mehe layadeeh ya, Ki Lakakhuufo, Rum Leh. Usu jiti fissane enenyet kahukkuma, toro la diho irta.

¹² Indohiis la iꞌdi ꞌdab u a bildiikhaane, matakkiis ka la ꞌduubassi ittaawenye khaba. Sartiis magahoo kachiirane, iꞌdaasenyi usu on garta, et addane wihi magahaas tahe garti mele.

¹³ Ulla kabuuꞌdi diig lakalugꞌde khaba, magahiis la a Yeedi Waakh.

¹⁴ Kiyati ittaawenye goobi Waakhe faraꞌddi daddakhan fuusso la ꞌdubiissa raahta. Kiyata la darfohi hahhaaggane daddakhane chaafo laa iche khabta.

¹⁵ Afiis la birlabi af lehe us yaafo kabaabiicho kasoobaha. “Ulla wussi gaꞌdaar ka icho a dakhta.” Gurnaanki sabiibe inti gurnaan lakayabti kijiro a yabta. Waha la holi Waakkhi Miig Tuumman Lehe itoollaan.

¹⁶ Kabuuꞌdiis ichoow togooggiis magahane kachiiran, Karnati karnato kussan ichoow Kamuri kamurre kussan.

¹⁷ Ani la hertoo Waakhe orrah sarche katolosso arge. Iche la weyti riirte, wihi raꞌdenye serey kayariꞌd tuumman wihi iche itidah, “Kaaleya, sukuukuhi Waakhe buure isookulma,

¹⁸ ꞌdee sarti karnatoot ichoow ti ꞌdooꞌdi iskar iwewween ichoow ti iskarti mimmiige ichoow ti faraꞌdeet ichoow ti iskarti faráꞌd fuusso amha. Sarti bowꞌdayyoot ichoow ti ꞌdooꞌdi bowꞌdayyo ieheynan ichoow sarti ꞌdooꞌdi wewween ichoow ti ꞌdooꞌdi ꞌdaꞌddaran amha.”

¹⁹ ꞌDeerka binahi oraat ichoow karnatohi tomonenye harrata ichoow kiyaticho ba ichohi sookulme ꞌdee eti faraꞌd fuulo ichoow kiyatiis dihoti Harmageedo layadeeh kiirti arge.

²⁰ Iꞌdaasenyi binaha ichoow eti goorat eti Waákh íyeyyeedo iskaayyeelo binahaas ortiis ka girmohi miig tuso yeele ba islaleekhabte. Girmoha ka la ꞌdooꞌdi sumatti binahaas ꞌhele toro la iyookkoti binahaas wahte a leekkeeste. Icho lammacho rubey khabaani, beyti ꞌdabe iꞌdi lahawti kibiriiꞌd ibolokhto goya liiseye.

²¹ Karnatohicho ichoow kiyaticho tuumman la birlabi eti faraꞌd fuulo afiis kasoobahe bakkiche. Chimbiro tuumman la sarticho yumheene ichoowka dargeen.