Bakkaahit 18 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Waakh ilkerengeetti Baabiloon baabiicha

¹ Waha ꞌdubicho ka, hertoo Waakhe addan ichehi goobi Waakh kasookhubatti arge. Herta Waakh la antohi buurenye khabta, ababnaanki iche ababto la harra tuumman banaynoocheen.

² Herta Waakh hooyi buure ka riirte, wihi iche tidah, “A massatte! Ilkerengeetti Weene Baabiloon bar a waayte! Furi ginnayyoot ichoow furi meleykayyoote titahye, chimbirohi biꞌdirreenye toro weyti laꞌdiiꞌdo kola intaas igela.

³ Iꞌdi tahe yaafo tuumman, farsoticheti sabiibe sohoꞌddarriti holi Waakh keento iche dameen. Karnatohi harra tuumman la makhaabassaas sohoꞌddarri kaleessohteen. ꞌDooꞌdi bacchaara harra tuumman la jeenteti sohoꞌddarriticheeda ikamurrowe.”

⁴ Toro hooyoo goobi Waakh ka sooyeedo daage wihi us yidah, “ꞌDooꞌdaaw, kaaleya Baabiloon goya kasoobaha, ꞌdee uskeeli iche kajirto, aleegelina, ꞌdee sinati Waakh iche kawaaricho la aꞌhelina.

⁵ A mehe uskeeliche a iskore, ichoowka goobi Waakh eleele. Waakh la suujoonki ꞌdooꞌdi Baabiloon yeele ma kadabin.

⁶ Iꞌdi iche atin yeesse, atin laka iche iyeela. Suujoonki iche atin iyeesse, kol lammatiis iche iyeela. Farsoti uskule iche kokkoobiche atin ikawarasse, kol lammatiche ikawarsa.

⁷ Geeddi iche iskoolisse, iche kamurroonki sohoꞌddarri kijirte, iche geeddaas sina ichoow bolokh tusa. A mehe uuriche ka a eylajja, mehe elatta ya, ‘An saggi makhaabassi karnatenye ijira. An muunkho menye, jirtuu la ma ooyo.’

⁸ Maantaka ibeenkoo kaldach on sinayyohiche iche kahataataane, omoot ichoow oytim ichoow abaár ikeena. Iche ꞌdabe yaham, a mehe Kamuri Waakhenye ween iche a hukkuma.”

⁹ “Karnatohi harra goorat iche sohoꞌddarri kaleessohte, kamurronkiche leegisme maanti icho uunki ꞌdabi ilkerengeettaas yaham argaan a uuwwichaane iche ooyaan.

¹⁰ Jeenteti icho bolokkhi ilkerengeettaas weyti ikanahaan u, foga tolossataane riiraane wihi icho essaan, “Uuwwiy! Uuwwiy! Ilkerengeetta weenoow, Baabiloonoow, ilkerengeetti miig khabtooy! Sahaꞌddoo kalday on sinati Waakh kigooche kitimiy!”

¹¹ “ꞌDooꞌdi harra ka bacchaarti la a uuwwicha ilkerengeettane ooya, a mehe et kola meehicho gatti mele.

¹² Et kola meehichoki ꞌdahab ichoow ki lahaageet ichoow dagahti bibbildiikhto ichoow irtiyyohi gato miige gatti mele. Et darfohichoki fil ittaawenye gato miigenye iꞌdi maanta wihi daddakhan ichoow wihi muggeyyee ichoow wihi gugguuꞌddan kagatti mele. Et khoꞌdoommeti fil ittaawenye gato miige ichoow wahanyeyyohi ꞌhiir lakahaaggiche fil ittaawe gatti mele. Et meehichoki birtoo booran ichoow ki birtoo daayiti khaalkhee ichoow ki dagahti lasigo lakahaaggiche gatti mele.

¹³ Toro et geeyohi gololle lakachibo ꞌdee golol haaggicho ichoow miricchinye ichoow subahenyeti hahhaaggane sar lakadowti ichoow uyuuggeti lasaarti kagatti mele. Toro et farsoti sabiib ichoow subakki geeyi oolif ichoow ingangaano ichoow ꞌdargaayye ichoow looyyo ichoow iiy ichoow faráꞌd ichoow garrunyeti faraꞌde jiitto ichoow ꞌdooꞌdi loororicho kagatti mele.

¹⁴ “ꞌDooꞌdi iche bacchaara leehaagsati la wihi us yadeeh, ‘Baabiloonoow, wahanyeyyohi haaggane rubeytaah imoonte tuumman a lakaakhaate. Kamurroonkaah ichoow wihi kibildiikhicho tuumman a lakakhaate, yombuu la toro ma ꞌhesso!’ ”

¹⁵ ꞌDooꞌdi ꞌhor bacchaara haaggiche, meeha ororiche toro iche kakamurrowe foga tolossata, bolokkhiche weyti kanaha. Icho la a uuwwichaane toro ooyaane,

¹⁶ riiraane, wihi icho yadeehiin, “ ‘Uuwwiy! Uuwwiy! Ilkerengeetta weenoow, ati gaaddi hahhaaggane daddakhan ichoow ti muggeyyee ichoow ti gugguuꞌddan a gessatte, toro ꞌdahab ichoow dagahti bibbildiikhto ichoow irtiyyohi gato miige a lakeeykode.

¹⁷ Sahaꞌddoo kalday goya on ka kamurroonka tuumman bar latire.’ “ꞌDooꞌdi koobanohi burbuure itoollo ichoow ki koobano kasohti ichoow ki koobano hil kahaaggicho ichoow ki tuummane chilinkicho bacchaarati beyeet kayamiit foga tolossate.

¹⁸ Maanti icho uunki ꞌdabi ilkerengeettaas yaham kasoobaho argaan, a riiraane, wihi icho yadeehiin, ‘Injire ilkerengeettoo weene harra ka iꞌdi tane a jirte?’

¹⁹ Icho la a ooyaane uuwwichaane toro ebeer matah iskachibaane, wihi icho yadeehiin, “ ‘Uuwwiy! Uuwwiy! Ilkerengeetta weenoow, kamurroonkicheeda ꞌdooꞌdi koobano khabo, bey ka bacchaarti kamurrowe. Sahaꞌddoo kalday goya on ka walah dakkhan bar latire!

²⁰ Atinhi goobi Waakh kajirtaan, taba giꞌde ilkerengeetta weyti kahamaada! ꞌDooꞌdi Waakh ichoow ergaano ichoow ꞌdooꞌdi Waákh íyeyyeedo, taba hamaada. Jeenteti wihi iche atin yeessuu, Waakh iche sina a igooche.’ ”

²¹ ꞌDeerka hertoo Waakhe weyti miige daddaabtoo iꞌdi daddaabti buurenye gurnaan lakatumee okkhisse, bey goya isaate, wihi iche tidah, “Miigti buurenye iꞌdee ka, ilkerengeetti weene Baabiloon a lasoolugꞌda, yombuu la toro ma laꞌhelo.

²² Hooyi reenki ꞌhaab layadeeh ichoow indulle ichoow arab yombuu goytaah lakadaago mele. Tagaammeti fil ittaawe, yombuu toro goytaah ma lakeelo. Hooyi daddaabti buurenye gurnaan lakatumo, jirtuu goytaah ma lakadaago.

²³ Toro la jirtuu banayhi taa goytaah ma kabolkhaan. Hooyi eti min disti ommos inanti ladiso, jirtuu goytaah ma lakadaago. ꞌDooꞌdaahki bacchaara haaggiche ki harra ka lagarti eheet. Morotaah ka yaafo tuumman a leekkeeste.

²⁴ Diiggi ꞌdooꞌdi Waákh íyeyyeedo ichoow diiggi ꞌdooꞌdi Waakh ichoow ꞌdooꞌdi harra ka labakkiche tuumman goyticheeda lakeele.”