Bakkaahit 17 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Malaaya ichoow binahi keleye

¹ Herti Waakhe teebeenye baakhuulle khabto goyaka, too itimiyye wihi iche ani itidah, “Kaale, hukkunki Waakh malaayata weene bicchehi ittaawe kafiddiito igoocho a kituso.

² Karnatohi harrata malaayata sohoꞌddarri kaleessohteen. Toro la ꞌdooꞌdi harrata farsoti sabiibe sohoꞌddarritichee ka meleefu yitah.”

³ ꞌDeerka herta Waakh isiꞌdde, Rubeyti Waakh iwoyte hidaaddoo igeesse. Intaakka makhaabassoo binahoo guuꞌddan sarche fuusso arge. Binaha sar tuumman ka magahenyeti Waakh iskeekkaasso kachiirane, toro matah teeba ichoow gaas tomone khabaan.

⁴ Makhaabale gaaddoo muggee ichoow guꞌduuꞌd khabto iche khabta. Sar la ꞌdahab ichoow dagahtoo gato miige ichoow irtiyyohoo gato miige, iche lakeeykode. Iche la kokkooboo ꞌdahabe wahanyeyyohi weyti lakhaanyee ichoow duksakki sohoꞌdarritiche buuhto iche khucchisse.

⁵ Miintiche la magaha wohoo dagsan itoollo iche kachiiran, Ilkerengeetti Weene Baabiloon, a Abarti Malaayayyoot ichoow Lakhaanyoyyohi Harra.

⁶ Anna makhaabassa diiggi ꞌdooꞌdi Waakh ichoow diiggi ꞌdooꞌdi gar Yeesso laabo tubhubye ichoowka meleefu titah arge. Uus an iche arge ka weyti girmeesde.

⁷ ꞌDeerka herti Waakh wihi iche ani itidah, “A iꞌdoh igirmeysatta? Wihi dagsane makhaabassa ichoow binahi iche koorromatte matah teeba ichoow gaas tomon khabo miinsan, a kisoobabbakkaahicha.

⁸ Binahaas at agarte goorat a jireene toolla ma jiraane berri la ankhari dahane ieleelin goya kasoobahaane labaabiicha. ꞌDooꞌdi harra yaalle, uuꞌ harra lasoouume magahenyeticho buuggi ꞌdooꞌdi jiroti imassan liikachiirin la, maanti icho binaha argaan, weyti girmeestaan. A mehe binahaas maantoo a jireene, toolla ma jiraane toro berri a yamiitiin.

⁹ “Ayta khara ꞌdoonta. Matahenyeti teebeenye binahaas khabaan, kurohi teebeenye makhaabale kafiddiito itoollaan.

¹⁰ Matahenyeta teebee toro karnat teeba itoollaan. Karnatoha teebee, chane a tuunte, koo uliba a karnate, ki addan uliba ma imaatan. Iꞌdaasenyi maanti us yamiit, geeddoo rucchul on karnat yateeh.

¹¹ Binaha goorat jire toolla la ijirin, a karnati siyyeennaatteet. Ullaka karnatohi teebee a kichokoowe, toro la a labaabiicha.

¹² “Gaasohi tomonenye at agarte, karnatohi tomonenye uliba ilassi icho dakhtaan iꞌheline itoollaan. Iꞌdaasenyi karnatoha antohi icho sahaꞌddoo kalday binahaas harra leedakhtaan a ꞌhelaan.

¹³ Icho la maloo kaldaye khabaane, antohicho ichoow miigticho binahi oraate siichaan.

¹⁴ Binaha ichoow karnatoha ba Heleeme diho kiirtaane, iꞌdaasenyi Heleem ichoow ꞌdooꞌdiis ba icho kahataataan. A mehe us a Kamuri kamurre kussan, toro a Karnati karnato kussan. Toro la ꞌdooꞌdi usu leejiro a ꞌdooꞌdi Waakh wahe, Waakh soobahsate toro Waakh a kakhuufaan.”

¹⁵ Herta Waakh ꞌdeerka wihi iche ani itidah, “Bicchehi kootte at agarte malaaya kafiddiito, ꞌdooꞌdi yeerare ichoow ururreti ittaawe ichoow yaafohi ittaawe ichoow afassi ittaawenye itoollaan.

¹⁶ Binaha at agarte ichoow gaasohi tomone la malaaya a nibhaataan. Icho la wihi iche khabto tuumman a kakhaataane, murukh katabaane, jidiche yamhiine, toro la iche ꞌdab ka gubaan.

¹⁷ A mehe Waakh karnatoha maliissa uurassicho gesse, ꞌdee malaas ka wihi us ꞌdoono yeelaan. Karnatoha a isleegoochaane, antohichoki icho yaafo kadakhtaan binahi oraat siichaane, ichoowka yeedassi Waakh labuuhicha.

¹⁸ Makhaabassi at agarte, ilkerengeetti weene karnatohi harra tuumman dakhtaane itolossa.”