Bakkaahit 14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Heleem ichoow ꞌdooꞌdiiski alif kudoo ichoow alif tomon affar ichoow alif affare

¹ An ꞌdeerka yeye, Heleem orteey ka Hali Saayone fuula. ꞌDooꞌdi alif kudoo, alif tomon affar ichoow alif affare usuhi Heleem leejiro laka arge. Waha a ꞌdooꞌdi magahi Heleem ichoow magah Aabbahiis ba miinassicho kachiiranyahiin.

² Hooyoo buurenye iꞌdi riiriti hawti ꞌdusseenye ommos iꞌdi karkaraheenye goobi Waakh kasooyeede daage. Hooya a iꞌdi ꞌdooꞌdi reemassichoki chiꞌ geeyo ladowo laguꞌddo ꞌhaab layadeeh yeedicho.

³ ꞌDooꞌda la komborti antoote Waakh ortiis ichoow wahanyeyyohi affarenye lasoouume rubey khabo orticho ka ichoow ewweenki tomon lamma ichoow affare orcho ka geeyoo husub doween. Geeya ꞌdooꞌdi alif kudoo ichoow alif tomon affar ichoow alif affarenye Waakh harrata ka soogatte on aban yabuuꞌde, et addane aban yabuuꞌd mele.

⁴ Waha a ꞌdooꞌdi isibiꞌdirroonne deyyeho ileeurꞌdin, a mehe icho miꞌdabe iskayeeleen. Icho la Heleem meelbaaw us irti a raahaan. Waakh icho ꞌdooꞌdi harrata goyaka a soogatte, toro iꞌdi gurnaanki oraat u, Waakh ichoow Heleeme ibahche.

⁵ Icho la injire been ma goonne, wohoo rucchul laka ma lakacheekan.

Herti Waakhe seyyahe ichoow farniinnetichooda

⁶ ꞌDeerka hertoo Waakhe addane serey katariꞌd arge. Iche la Wori Haaggane jirtuu imassanne khabte, ꞌdee weeli enenyete harra kijiro, ilal tuumman ichoow yaafo tuumman ichoow afaf tuumman ichoow fil tuummane icheekta.

⁷ Iche la hooyi buure ka wihi iche tidah, “Taba, Waakh karoora, toro la saaꞌda! Iꞌdi tahe ibeenki Waakh weeli enenyet hukkumo a yitah. Waakkhi serey ichoow harra ichoow bey ichoow indohi biccheet ba soouume, wahda.”

⁸ Hertoo Waakhe lammaatteet ꞌdubiche leetimiyye wihi iche tidah, “A massatte! Ilkerengeetti Weene Baabiloon bar a waayte. Ilkerengeetta yaafohi harra tuumman farsoti sabiibe sohoꞌddarriti iche kaassohatte damin a iholisse.”

⁹ Hertoo Waakhe seyyahnaatteet ꞌdubicho tabte, hooyi buure ka wihi iche tidah, “Eti tuummane binaha ichoow iyookkotiche wahti, sumatti binaha la miin ommos dahan ka ꞌhele,

¹⁰ ullaka farsoti sabiibe holi Waakh itolosso soodama. Hola la, farsoti sabiibe miigenye bicchehoo rucchul laka liikakhayine kokkoob lakachibo liiokkanaache. Waakh eta herti Waakhe munyee ichoow Heleem ortiis ka dagahti bolokhto ka weyti bolokh tusa.

¹¹ Uunki bolokkha ꞌdooꞌda latuse jirtuu tuumman sereye ikaha. ꞌDooꞌdi binaha ichoow iyookkotiche wahti ichoow eti tuummane sumatti magahiis ꞌhelo, ibeen ichoow maalim ba nasme ma ꞌhelo.”

¹² ꞌDooꞌdi Waakhe amurreti Waakh raaho toro Yeesso kakhuufo ichohi samacchaarenye garrahsati laꞌdoona.

¹³ Hooyoo toro goobi Waakh kayamiit daage, wihi us yidah, “Waha chiir, uus toolla kakhabatti, eti tuummane usu ichoow Kamur wohoo kalday yahiine yamuut a liimaala.” Rubeyti Waakh la wihi iche soolaabte, “Aa, a rum. Hili miigenye icho haaggicheen ka a nasaan. Icho a liimaala a mehe haaggi icho yeelaan ꞌdubichooda raaha.”

Fooltabchoti gurnaanki ꞌdooꞌdi harra tusso

¹⁴ Ani la yeye orteey ka mirisoo dakhan arge, toro la etoo Ínam Aadam iyoog usuhi mirisaas kafiddiyo arge. Ulla ꞌduubi ꞌdahabe matakkiis kakhaba, warhanti gurnaan lakagoocho la dahane kakhuccha.

¹⁵ Hertoo Waakhe addan ꞌdeerka minki Waakhe buure goya kasoobahte, weyti riirte, eti miris kafiddiyo wihi iche itidah, “Warhantaahti gurnaan lakagoocho khaate, gurnaan soogooy, iꞌdi tahe wihi harra ka lasoosuuno a bissateene, kola la sahaꞌddi lasoosuuno a titah.”

¹⁶ Eti miris kafiddiyo warhantiisti gurnaan lakagoocho harra sarche kamoroogiche, harra tuumman iꞌdi gurnaan u soosuune.

¹⁷ Hertoo Waakhe addan goobi Waakh ka minki Waakhe buure kasoobahte, iche laka warhanti af lehe gurnaan lakagoocho khabte.

¹⁸ Toro hertoo Waakhe addane antohi ꞌdab khabto koondihi gaꞌdaar kasoobahte. Hooyi buure ka herti warhanti af lehe gurnaan lakagoocho wihi iche itidah, “Warhantaahti af lehe gurnaan lakagoocho khaate, gurnaanki sabiibe harra kijiro soogur. Iꞌdi tahe gurnaanki sabiib a bissaate.”

¹⁹ Herti Waakh warhanticheti gurnaan lakagoocho harra kamoroogisse, gurnaanki sabiib soogurte, meessi buurenye gurnaanki sabiib lakayabti goya kachibte. Meessa la a iꞌdi sinati Waakh holiis ka ꞌdooꞌdi uskeel leh omhicho.

²⁰ Gurnaanka sabiib la ilkerengeetti ween kharicheeda lakayabte. Diig intaas gurnaan lakayabte ka ꞌdule, geeddi kiilomitta kud seyyah iꞌdule. Diig la hoggiis geeddi mittatoo ichoow nyuus iche eheet.