Bakkaahit 12 - Wori Haaggane Yeesso Kiriisto Miinsan Ayyinti Husube Waakh Enenyet IgoocheYoohana makhaabassoo ichoow khorojebsi arga 1 Girmohoo buure sereyta daayan kasoobaheen. Makhaabassoo orrahe kaankubantahe soobahte. Iche la yeyyahe katolossa, ꞌduubi bakkaal tomon ichoow lamma khabo la matah kakhabta. 2 Iche huleese eheete, jeenteti iche ichiissuu bolokh ka ooyte. 3 ꞌDeerka girmohoo addan sereyta daayan ka soobaheen. Waha la a khorojebsihoo buurenye guuꞌddane, matah teeba ichoow gaas tomon khabo, matah ba la ꞌduuboo khabo. 4 ꞌDubiis ka, yiyyihimohi saraat goonan seyyah goyaka goonankoo soojiite, harra isookhube. Khorojebsiha weeli makhaabassi kootte soodesso orche tolossate, ꞌdee weel uus dessi yaham. 5 Inankoo desse. Inanka lab la usu dowwanoha ka yaafo tuumman wussi gaꞌdaar kadakhta. Inanka la uus desse on Waakh ichoow kombortiisti antoot liitogte. 6 Makhaabale hidaad ka inti goorat Waakh iyeele ifiridde, ꞌdee herti Waakh ibeen alifoo kud lamma ichoow ibeen tomon lih goollissa. Seytaan goobi Waakh lakasoolugꞌda 7 Goobi Waakh ka la diho a jirte. Herti Waakhe weene Miikayel layadeeh ichoow herticheti Waakhe addan khorojebsi isjaheen. Khorojebsi ichoow hertiis diho geleen. 8 Iꞌdaasenyi khorojebsi ichoow hertiis ba lasooriche. Goobi Waakh ka meessicho waayeen. 9 Khorojebsiha buure il liisooseye, ulla a ki goorat archiiy jire, magahiis la ki ꞌdooꞌd hanti ommos Seytaan iche layadeeh. Usu ꞌdooꞌdi harra tuummane jit buucha. Ulla hertiis khabaayi harra liisooseye. 10 An ꞌdeerka hooyoo buure goobi Waakh ka daage, wihi us yidah, “Toolla ribnaan ichoow miig ichoow dakhi Waakkheen, ichoow anto Lasubhehiis a yimaateen. Iꞌdi tahe ki ꞌdooꞌdeenki Kiriisto rummeeste cheekti, ibeen ichoow maalim ba Waakh ortiis ka cheekti goobi Waakh a lakasooseye. 11 ꞌDooꞌd Kiriisto diiggi Heleem ka ichoow wori rummaate icho cheekeen ka Seytaan a sooricheen. Toro la chirri icho layagiis laka, icho omoot ma karoorin. 12 Maantaka, goobassi Waakh ichoow atinhi kajirtaan ba, weyti hamaada! Iꞌdaasenyi atinhi harra ommos bey goya taalliin, sinati atin sugto eenna a buure! Iꞌdi tahe Seytaan a atin isookhubte. Ulla holi buurenye khaba, a mehe us saggi ibeennetiis igaabatte a garta.” Khorojebsi makhaabál sina kawaaricha 13 Khorojebsi inkoo us saggi harra liikasoolugꞌde kase ka, makhaabassi kootte inankoo desse kalooꞌde. 14 Makhaabál barbarretoo lammeenye gabadeet lasiiche, ꞌdee serey ka inti hidaad ka liiyeele, guꞌh seyyah ichoow hay lih lakagoollicho, khorojebsi la ikasooeleelin inyaanta. 15 Khorojebsi ꞌdeerka bicchehi buurenye ꞌdulo ꞌdee makhaabál haro af kasoobahche, ꞌdubiche gate. 16 Iꞌdaasenyi harra makhaabál gargaarte, aficheki furname ka bicchehaas khorojebsi af kasoobahche khorkhisse. 17 Khorojebsi ꞌdeerka makhaabál ihollowe, nyaakhuticheki addan diho kiirte. Waha la a ꞌdooꞌdi amurreti Waakh raaho, toro la runti Yeesso soobabbakkaahiche kakhuufo. |
© 2018, Wycliffe Bible Translators, Inc. All rights reserved.
Bible Translation and Literacy