Bakkaahit 11 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Waakh et lamma runtiis soobabbakkaahisso erga

¹ Wussoo iꞌdi reenkoo walah lakarerreegee liisiiche, wihi liidah, “Nyaame, minki Waakhe buure ichoow koondihi gaꞌdaar rerreege, ꞌdooꞌdi intaakka Waakh wahti laka ekkaay.

² Iꞌdaasenyi uranti minki Waakhe buure khariis tuumman geeddiis arerreegin. Iꞌdi tahe ani intaas ꞌdooꞌdi Waakh igaranne siiche. Icho la hay tomon affar ichoow hay lamma tuumman, ilkerengeetti weene lagan a yabtaan.

³ Ani la ꞌdooꞌdeeyki lammeenye garti runteey laabo miig a siicha, icho la maan alifoo ichoow kud lamma ichoow lih Waákhe íyeyyeedaan. Icho la ingaꞌdaaꞌdiyyo gessataan.”

⁴ ꞌDooꞌda lammeenye runti Waakh babbakkaahicho a iꞌdi geeyohi lammeenye oolif ichoow reemassi lammeenye taa lakorcho Kamuri harra tuumman dakhti ortiis toollo.

⁵ Chiꞌ etoo icho gaameerin ꞌdoono, ꞌdab ꞌdooꞌda lammatiis afichooda kasoobaha, chiiyticho bakkicha. Eti tuummane icho gaameerin ꞌdoono saggane liiyagiis.

⁶ ꞌDooꞌda la miigti icho geedda icho Waakh iyeyyeedaan sereyta daayan kahidaane ꞌdee hir iꞌdeyin a khabaan. Icho la toro miigti icho bicche diig kayeelaan a khabaane, miigti icho ꞌdooꞌdi harra sinayyohi yeerare ikeenaan la a khabaan. Waha la maanti icho ꞌdoonaan tuumman a yeelaan.

ꞌDooꞌdi lammeenye runti Waakh babbakkaahicho layagiis

⁷ Inkoo icho farniinki Waakh cheekeene icho massicheen, binahi keleyenye ankhari dahane ieleelin kasoobaho ꞌdooꞌda lammee a diha, sooricha, bakkicha.

⁸ Sarticho la jiti ilkerengeetti weene Yeerusaleeme goorat Kamuricho laka massalaaba lakakaahe iche jiifta. Ilkerengeettaas wihi Waakh miinsan ka ilkerengeetti Soodom ichoow ili Miissiri liiokkanaache.

⁹ Maan seyyah ichoow nyuus ꞌdooꞌdi fil tuummane ichoow yaafo tuumman ichoow afaf tuumman ichoow ilal tuumman kayimiy la sarti ꞌdooꞌdane ꞌdeyꞌdoocha, ichohi il liilaabo ꞌdiiꞌdaan.

¹⁰ Weeli enenyete harra kijiro tuumman la omootti ꞌdooꞌda lammee weyti kahamaada, siimohi icho isiergaan ka sukuuku bahchaan. Iꞌdi tahe ꞌdooꞌda lammeenye Waákh íyeyyeedo ꞌdooꞌdi harra kijiro tuumman weyti bolokh ikeene.

Waakh ꞌdooꞌdi lammeenye runtiis babbakkaahicho omoot kasookahcha

¹¹ Iꞌdaasenyi inkoo ibeenneta seyyah ichoow nyuuse kuteen ka, Waakh ꞌdooꞌda lammee neebsihi jiro kaafuufe, icho la sootolossateene, eti tuummane icho arge la weyti nahe.

¹² ꞌDooꞌda lammee ꞌdeerka hooyoo buurenye goobi Waakh ka icho leeyyeedo, “Inta saraat amiita,” idowo daage. Icho la chiiyticho ꞌdeyꞌdoossaayi, mirisoo ka goobi Waakh ikoreen.

¹³ Sahaꞌddaas on harra weyti sesseehte, ilkerengeettaas ween goonan tomon goyaka goonankoo bar waaye. Harrataas sesseehte ka ꞌdooꞌdi elif teebee tuume, ki sooꞌhade la weyti nahe, Waakkhi goobi Waakh ka harra dakhti koolicheen.

¹⁴ Sinati lammaatteet a kutte, sinati seyyahnaatteet la dowwanoha ka a tamiit.

Herti Waakhe teebannaatteete arabiche afuufto dakhi Waakhe cheekta

¹⁵ Herti Waakhe teebannaatteet arabiche afuufte, hooyassi buure la goobi Waakh ka sooyeedeene, wihi icho yidaaheen, “Dakhi harra, dakh Kamureen ichoow koo Lasubhehiissa yitaaheen. Ulla jirtuu tuummane harra dakhta.”

¹⁶ Ewweenki tomon lamma ichoow affarenye Waakh ortiis ka komborohichoki antoot kafiddiyo la, jilbo il kaguꞌdde Waakh wahte,

¹⁷ wihi us yidah, “Kamuri Waakhenye Miig Tuumman Leh, ki toolla jiro goorat tuumman jire, jeenteti at miigtaahti buure ikhaatte, enenyet dakkhan isookhabattuu kalaꞌde kisoolaabna.

¹⁸ Yaafohi Waakh igaran a holloweene, holaah la a yimiy. Ibeenki at ꞌdooꞌdi tuume hukkunto, at ꞌdooꞌdi falfayyohaahenye kiyeyyeedo, ichoow ꞌdooꞌdi Waakh ichoow eti tuummane kaarooro, ki ween ichoow ki rucchul ba at kalaꞌd gutto a yitah. Toro la ibeenki at ꞌdooꞌdi harra ka enenyet bakkicho baabiisso a yitah.”

¹⁹ ꞌDeerka minki Waakhe buurenye goobi Waakh kijiro lafure, saanduukhi ayyinti Waakh gooche tuso, minki Waakhe buure goya kajiro laarge. Ankhad il guꞌddeene, borooꞌd ichoow karkaraho yeedeene, harra sesseehte, dagahti baraafo laka weyti serey kasookhubatte.