Bakkaahit 10 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yoohana hertoo Waakhe khadaaboo rucchule yuuban khabto arga

¹ Toro hertoo addane Waakhe miige ichehi goobi Waakh kasookhubatti arge. Iche la mirisoo dakhane kaankubane matakkiche la moose kamarsan. Fooliche la iꞌdi orraheet u a ababa, luhlohiche la a iꞌdi tirrimmeti ꞌdabi buure.

² Herta Waakh la khadaaboo rucchule yuubane furane dahan kakhabta. ꞌDaꞌddabicheki miigeet beytoo buure katoollisse, ꞌdaꞌddabicheki gurro la harrati angagan katoollisse.

³ Iche la hooyi buurenye iꞌdi ki bahassee bihisse. Chiꞌiche riirte ka, guugah kol teeba yeedeen.

⁴ Chirraas guugah kol teeba yeedeen ani la wahanyeyyohaas chiirin leheet. Iꞌdaasenyi hooyi goobi Waakh ka ileeyyeedo daage, “Wihi guugakkaas teebee yidaaheen achiirine dagi,” iyidah.

⁵ ꞌDeerka hertaas Waakhe an arge bey ichoow harrati angagan katolosso dahanticheti miigeet goobi Waakh iokkhisse.

⁶ Magahi Waakkhi jirtuu tuumman jiro, sereyta daayan ichoow harra ichoow bey ichoow wihi tuummane goya kijiro soouume kadaatatte, mehe tidah ya, “Waakh kola wihi goorat us yeelin gooche ka ma malmalo.

⁷ Maanti herti Waakhe teebannaatteet arab sooafuufto, wihi dagsane Waakh isoobabbakkaahin, saggi us ꞌdooꞌdi Waákh íyeyyeedo falfayyohiise icheeke on u, Waakh a buuhicha.”

⁸ ꞌDeerka hooyi kootte an goobi Waakh ka daage toro ileeyeede, wihi us yidah, “Nyaame, khadaabaas yuubane furane dahanti Hertaas Waakhe bey ichoow harrati angagan katolosso kajiro kakhaat.”

⁹ Anna ꞌdeerka irde, hertaas Waakh khadaabaas rucchule yuuban daahe, iche la wihi iche itidah, “Khadaab khaate, aham. Khadaab af ka iꞌdi malab u a chinni, iꞌdaasenyi uur goyaka birrakhe yateeh.”

¹⁰ Anna khadaabi rucchule yuuban dahanti herti Waakh kakhaate uhum. Khadaab la af ka iꞌdi malab u a chinni. Iꞌdaasenyi inkoo an khorkhiche ka, uur goyaka birrakhnowe.

¹¹ ꞌDeerka wihi ani liidah, “Nyaam toro wori Waakhe ꞌdooꞌdi fil ittaawe ichoow ilassi ittaawe ichoow afassi ittaawe ichoow karnatohi ittaawe miinsan cheek.”