2 Timooti 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Ibeenneti ꞌdaꞌddaboot enenyet Waakh a kaseeha

¹ Iꞌdaasenyi waha abda, ibeenneti ꞌdaꞌddaboot il weyti ꞌhowlowa.

² Ebba awtiissa on ꞌdoona, chilim ꞌdoona, serey isgeecha, eylaja, enenyet meꞌdeꞌddeela, ꞌdooꞌdi dele ma daago, kalaꞌd mele, Waakh ma inkaanyito.

³ Toro la ꞌdoonin ma khabo, uskeel ma isikakuto, ꞌdooꞌdi addan meꞌdeꞌddeela, ma isjeycho, binaawa, wihi haaggan aw ma ikhabo.

⁴ Toro la aalassiis ꞌdub goocha, walah tuumman ka walah ma ibaalaane, weyti serey isgeechaane, wihi harrata Waakh ꞌdirihiis ꞌdoonaan.

⁵ ꞌDooꞌdi Waakh tuum raaho iskaayyeela, iꞌdaasenyi miigti Wori Haaggan jiroticho ka a ꞌdiiꞌdaan. ꞌDooꞌdi iꞌdee buj.

⁶ ꞌDooꞌda gaasiiskoo goobab goya isgessa, deyyehoti ꞌdaꞌddaran booliya. Deyyehota uskeel a ꞌharche, suujoonki fil ittaawenye liimoono iche icho anta.

⁷ Icho kol dakkhan wori Waakh a laabcha, iꞌdaasenyi jirtuu rum aban ma yabuuꞌdiin.

⁸ ꞌDooꞌda iꞌdi goorat Yaanes ichoow Yaameres ba Muusa tirrimeen u runti Waakhe tirrima. Mali kheerenye khabaane, kakhuufnaanki icho Kiriisto kakhuufaan ka la a sookufeen.

⁹ Iꞌdaasenyi tirrinnaankichoka foga ma leeleelaan. A mehe iꞌdi goorat Yaanes ichoow Yaameres u, enenyet tuumman iꞌdaanu ꞌdalankicho arga.

Baawulo Timooti waansihi ꞌdaꞌddaboot siicha toro uur miigoocha

¹⁰ Iꞌdaasenyi at rumanka wihi an ꞌdooꞌd abche ichoow dabateey ichoow mali an khabe a raahte. Iꞌdeey u Waakh a kakhuufte, samacchaare eheete enenyet tuumman a ꞌdoonte, a garrahsatte,

¹¹ sina a lakoomhiche bolokh goya tabte. At sinayyohi ilkerengeetti Antiyookhiya ichoow Ikooniyo ichoow Luussira ka liiomhiche an garrahsade a garatta. Iꞌdaasenyi Waakh sinayyohaas tuumman a ikaribe.

¹² Rumanka la eti tuummane jeenteti usu ichoow Yeesso Kiriisto ba wohoo kalday yahiin u jiroti Waakh ꞌdoono jirin ꞌdoono sina a loomhicha.

¹³ ꞌDooꞌdi uskeel kaassohti ichoow ki enenyet ekkeesti la weyti suujowaane, ꞌdooꞌd ekkeestaane icho la leekkeesta.

¹⁴ Iꞌdaasenyi at orey on isoho, wihi goorat lakaabche at rummeysatti mujjum jurkhi. A mehe ꞌdooꞌdi at runta kaabatte a garatta,

¹⁵ toro la saggi uus at weel keeheet Chiirnaanneti munyee lakaabche a garatta. Chiirnaanneta la kikharaan a tabuuꞌde, ꞌdee ribnaan kiwoyta. Ribnaanka la kakhuufnaanki Yeesso Kiriisto lakakhuufo iche lakeela.

¹⁶ Chiirnaanneti Waakh tuumman a ti neebsihi Waakh kasoouummante. Chiirnaanneta enenyet a iroontahe, a mehe enenyet walahe abissa, enenyet uskeeliis icheekta, enenyet khumissa, saggi enenyet jiroti fissan ijiro la abissa.

¹⁷ Iꞌda ka eti Waakh hili haaggan tuumman tuume haaggin yabuuꞌde, toro liitannabicha.