2 Koriinto 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Maantaka aalasseeyki an weyti ꞌdoono, Waakh wahaas tuumman a inno iayyiche gone, wihi tuummane sarteen ichoow rubeyteen biꞌdirroocho iskadikhno. Jeenteti inno Waakh ikaroorruu la, orey isohda ꞌdooꞌdi tuum munyee ateeha.

Hamaad Baawulo

² Saggi atin nah iꞌdoontaan nah tusa giꞌde. Nah et nah ikhufne mele ommos et nah jiti us Waakh kakhuufo ka baabiinne mele ommos et nah kakharaawne mele.

³ Jeenteti an uskeel atin ikagoocho mee waha ieldi. A mehe ꞌhor a atin iidahye uur atin kakhabna, omoote jirteey ommos jiro jirteey ka ba a isleejirra.

⁴ An weyti roorro laan atin leeyyeeda, toro la jeentetiin u a eylaja. Weyti uur liimiigooche. Sinayyohi buurenye inno khabno ka laka, hamaadeey weyti buuryahe.

⁵ A mehe maanti nah boroofenhi Makedooniya nimiy sarteenyo ma nasin. Iꞌdaasenyi ꞌdolloheenyo tuumman sina kijirte. Khareenyo jaakhe kijire goyteenyo la roorro kijirte.

⁶ Iꞌdaasenyi Waakkhi ꞌdooꞌdi rubeye jebte uur khoboocho, emeet Tiito ka uur a nah khobooche.

⁷ Emeettiis kalday uur ma nah khoboonne, wihi uur nah khobooche a saggi atin usu uur ikhoboosseen. Us saggi atin iargin iꞌdoontaan ichoow saggi jeenteti atin ani sina itusseen u iooyteen ichoow saggi atin ani weyti aw ikakhabtaan laka a nah isoocheeke. Jeentetuu an weyti hamaade.

⁸ A mehe chiꞌ khadaabi an ꞌhor atin isoochiire oytim atin ikeene laka, jeenteti an isoochiiruu ejer ma istowo. Rumanka geeddoo rucchul on ka khadaabeeykaas ka ejer istowe.

⁹ Iꞌdaasenyi toolla an a hamaada. Jeenteti atin iooyteen menye, jeenteti atin oytintaas ka uskeel ikasoonokhatteene ihamaada. Iꞌdi tahe oytintaas a saggi Waakh iꞌdoone, ꞌdee wihi nah yeelle ka wohoo rucchule sina atin ikeeno ma jiraan.

¹⁰ A mehe oytinti enenyet saggi Waakh iꞌdoono iooyo wihi iche desso a uskeeli lakasoonokhti ribnaanki Waakh enenyet ribo iwoyo. Wahaas ka la et ejer istowo mele. Iꞌdaasenyi oytinti saggi ꞌdooꞌdi harrata liiooyo omoot on dessa.

¹¹ Bal wihi oytintaas saggi Waakh iꞌdoono liiooyo atin ikeento yeya. Saggi atin uskeel iyeeline tusseene, wihi yitah ka hollowteene, wihi soosohti ka la roorro atin gesse. Atinhi iagartaane ꞌdoonteen, atinhi ani igessaane etaas uskeel yeele hukkuntaan iche ꞌdoonteen. Wahaas tuumman ka saggi atin wihi yitah ka eloo rucchul laka ikhabine tusseen.

¹² ꞌDeerka chaꞌan khadaab atin isoochiire laka, jeenteti eti khuf yeele ommos eti liikhufe menye, a jeenteti Waakh ortiis ka saggi atin uur nah ikakhabtaan an atin ikasoobabbakkaahicho.

¹³ Maantaka waha weyti uur nah khoboocheen. Uur kalday ma nah khoboonne, wihi kach ka nah kahamaadiche a hamaadi Tiito khabe jeenteti atin tuumman waꞌdwaaꞌdi us khabe ibihisseen.

¹⁴ A mehe chaꞌan ortiis ka bihin atin kaguꞌdde laka, an lakhaanyo ma argo. Saggi nah walah tuumman rum ka atin isoocheeknuu, bihinti nah Tiito ortiis ka atin kaguꞌdubne laka runtiche a atin tusne.

¹⁵ Ulla ꞌdooninti us uuriis ka atin ꞌdoono weyti buuraatta, geeddi us saggi atin aytiis idaagteene toro atin usu roorro ichoow inkaanyit ka imartiisatteen kasooꞌhelo.

¹⁶ Maantaka an weyti hamaada a mehe walah tuumman ka a atin kakhuufaa.