2 Koriinto 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Tootoonnaanki ꞌdaꞌddaboot

¹ Waha a koli seyyahnaatteete an atin iamiit. Iꞌdi Chiirnaanneti Waakh ka chiiran u, “Ayti etoo lakacheekti, garti et lamma ommos seyyah laabto ka a larummaacho.”

² Koli lammaatteete goorat an atin leejire a atin tootooche. Toolla an atin ileejirin la a inokhda. Maanti an soonokhdi ꞌdooꞌdi ꞌhor uskeel yeele ichoow ki addan tuumman sirbiti an gesso ka koo kaldaye an ꞌdiicho mele.

³ Iꞌdane yeela, a mehe atin runti saggi Kiriisto afeey ka atin ileeyyeedo tusso marantaan. Kiriisto wihi us atin iyeelo ka ma ꞌdarane, iꞌdaasenyi goytiin ka miig a khaba.

⁴ Iꞌdi tahe maanti usu lakaahe rumanka iꞌdi weeli enenyet u a ꞌdarneet. Iꞌdaasenyi us miigti Waakh ka a jira. Saggaas on u, nahi Kiriisto ka wohoo kaldaye ꞌdarritiis a leegisanna, iꞌdaasenyi miigti Waakh ka, usu a leejirra.

⁵ Mujjum isfiiricha usu atin rumanka kakhuufnaanki Kiriisto lakakhuufo khabtaan yeya. Ebba a iskajo. Saggi Yeesso Kiriisto goytiin ikajiro kasooꞌhela. Chiꞌiche iꞌdaas ieheynan, kajmeti atin lakajo ka a kufteen.

⁶ Genneyte atin saggi nah kajmeti nah lakajo ka ikunne kassaan.

⁷ Toolla la Waakhe wahanna uus ꞌdee atin suujoon yeeline. Jeenteti nah iwahanni, jeenteti nah ꞌdooꞌdi kajme ka kute iyoognahe menye, atinhi haag yeessaane ꞌdoonna, chiꞌ nah ꞌdooꞌdoo ka ꞌdooꞌdi kajme ka kufe iyoognahe laka.

⁸ A mehe nah wihi runti Wori Haaggan buusan yeelin ma nabuuꞌd, iꞌdaasenyi wihi runtaas orey iwoyto on yeella.

⁹ Chirbaaw nah ꞌdarannahe atin la miigtahiin, nah a hamaana. Weysiheenyo la a Waakkhi tuum atin isoobuuhicho.

¹⁰ Jeentetaas u geeddi an atin ileejirin khadaaba a atin isoochiira, ꞌdee chaꞌan imiy sag ani antoheeyki miige ka atin idakhdi mele. Antohaas an atin kadakhdi Kamure isiiche, ꞌdee ꞌdooꞌd Kiriisto ma jejjebcho, disa.

Bariitoti ꞌdaꞌddaboot

¹¹ ꞌDooꞌd Kiriistokaaw wihi yomboot, taba weyti hamaada, ꞌdooꞌdi buuho ateeha, uur ismiigoocha, maloo kalday khaba, nebey iskaleefiddiya. Iꞌda ka Waakkhi ꞌdoonin ichoow nebey tuumman leh a atin leejira.

¹² Taba ꞌdoonin Kiriisto iskabariiticha.

¹³ ꞌDooꞌdi Waakhe inta kajiro tuumman a atin soobariitiche.

¹⁴ Haag Yeesso Kiriistohi Kamure ichoow ꞌdooninti Waakh ichoow kulanki Rubeyti Munyee ba atin tuumman atin leejiraan.