2 Koriinto 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo bariito erga

¹ Khadaaba ꞌdooꞌdi atin isoochiiro a ani, Baawulohi jeenteti Waakh isoobahsatuu ergaano Yeesso Kiriistee ichoow eteenki ullaka koo Kiriisteenye Timooti layadeeh. ꞌDooꞌdi nah khadaaba ichiirro la, a ururi Waakhe ilkerengeetti weene Koriinto kijiro, ichoow ꞌdooꞌdi Waakhe boroofenhi Akhaaya kajiro tuumman.

² Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

Waakh enenyet sagag tuumman ka uure khoboocha

³ Waakh koolinno giꞌde. Us a Waakh ichoow Aabba Yeesso Kiriistohi Kamureene. Us a Aabbaheenki uur nugule toro la a Waakkhi kol dakkhan uur inno khoboocho.

⁴ Us sinayyo tuumman ka uur a nah khoboocha, ꞌdee nah laka ꞌdooꞌdi addan sinabaaw icho khabaan ka uur miigoonna. Khoboonnaanki Waakh uur nah khoboocho ka, nah laka ꞌdooꞌd uur khoboon a nabuuꞌd.

⁵ A mehe geeddi sina Kiriisto jiroteenyo ka weyti buuraatti, geeddaase Kiriisto ka laka khoboonnaanki uureenyo lakhoboocho weyti buuraata.

⁶ Chirri sina nah taham, a saggoo ꞌdee uur atin liikhoboocho toro la atin liiribo. Chiꞌ uur nah lakhooboche, a saggoo atin laka uur atin liikhoboocho. Iꞌda ka, chiꞌ sinayyohi iꞌdi weheenyee atin kawaaraan, a garrahsattaan.

⁷ Khajjeeli nah atin kakhabno la ma sesseeho. A mehe wihi nah tissibno saggaas atin sinayyo nah ileegisantaan u, khoboonnaanki Waakh uur nah khoboocho a nah leegisantaan.

Waakh sina a nah karibe

⁸ ꞌDooꞌd Kiriistokaaw, sinati buurenye nah boroofenhi Aassiya ka ꞌhelle, iche atinhi wihiche abattaan ꞌdoonna. Huleesi nah khabne weyti nah kabuurneete miigteenyo kute, ichoowka kol us nah khaato koognahe.

⁹ Rumanka uureenyo goyaka a iꞌdoo omoot nah liigooche, ꞌdee awteenyo menye Waakkhi ꞌdooꞌdi tuume omoot kasookahcho on kakhuufna.

¹⁰ Waakh wahanyeyyohi uskule omoot keeno a nah karibe, toro la a nah riba. Nah usu gon khajjeella, ꞌdee ulla orey isohta nah riba,

¹¹ geeddi atin laka weysi ka nah soogargaartaan. Iꞌda ka, ꞌdooꞌdi buure maanti Waakh weysihaas daage buuhi us iꞌdaanu inno siicho ka meesseenyo ka Waakh kalaꞌd a ilaaba.

Baawulo ururre Kiriistoti us iirti ka maliis uurgiyicha

¹² Maantaka wihi nah keeylajno a waha, wihi rubeyoheenyoki haag ichoow suujoon seley saaho rumanka cheekaan, a saggi nah munyati Waakh ka jiroti fissan harrata ka ijirre, kach ka la a saggi nah ortiin ka ijirre. Waha la kharati weeli enenyete harrata ka menye, haaggi Waakhe buure on kayeelle.

¹³ A mehe wihi nah atin isoochiirro, mali dagsan ma kijiro, a wihi atin soomin ichoow aban tabuuꞌdiin on. Wihi an khajjeelo la a mehe ya,

¹⁴ saggi atin geeddoo nah iabatteen u, tuume nah abattaane ꞌdee maanti Kamureenki Yeessee soonokhti ka nah keeylajjaan saggi nah laka atin ikeeylajnuu.

¹⁵ Jeenteti an saggi atin ikakhuuftaan itissibuu la, mehe kamalde ya, koloo a atin sooꞌdaara ꞌdee kol lamma atin liimaala.

¹⁶ Iꞌdi tahe anihi maanti an Boroofenhi Makedooniya isohdi atin leeamiite toro la maanti an Makedooniya kasoonokhdi laka atin leeamiit iche ꞌdoone. Atin la ꞌdee sohoteeyki an ili Yaꞌhuudiya isohdi ka luhlo iyeessaan.

¹⁷ Maanti an wahaas kamalde, jitoo ꞌdabakhenye kayeele? Ommos chaꞌan walah kamaldi, an saggi ꞌdooꞌdi harratane ikamalda, ꞌdee, “Aa, aa,” ichoow, “Mele, mele,” isleeadeeh?

¹⁸ Iꞌdaasenyi saggi Waakh liikakhuufuu, woreenyoki nah atin ikeenne laka koloo kalday, “Aa,” ichoow, “Mele,” ma isleeyadeeh.

¹⁹ A mehe Yeesso Kiriistohi Weeli Waakhenye ani ichoow Silfaano ichoow Timooti woriis atin icheekne, koloo kalday laka, “Aa,” ichoow, “Mele,” ma isleeyadeeh. Iꞌdaasenyi usu ka a, “Aa,” kalday on.

²⁰ A mehe Waakh ayyinti tuummane us ayyiche, Kiriisto ka a buuhiche. Maantaka kol dakkhan chiꞌinno Waakh koolinno Yeesso Kiriisto ka, “Aamiin,” iche nadeeh.

²¹ Waakh rubeytiissa nah ichoow atin ba Kiriisto ka wohoo kalday inno kayeela, mujjum inno toollicha. Toro la hiliis a inno isubhe,

²² sumattiis inno gesse toro la Rubeyti Munyee rubeyoheen goya gesse. Toolla Rubeyti Munyeenye inno siicha ꞌdee wihi us inno iayyicho us berri inno siicho rummaacha.

²³ Waakh a idaagaa, us garteey a laaba, anihi bolokh atin ikeeno an iꞌdoonine, jeentetaase ilkerengeetti Koriinto toro ikasoonokhawwaaye.

²⁴ Anki wihi atin kakhuuftaan ka ma atin dakhanni. Iꞌdaasenyi nah hile atin leehaagginna, ꞌdee atin laka hamaaddaan. A mehe kakhuufnaanki atin Waakh kakhuuftaan ka a chuukhantahiin.