2 'Dessaloonika 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo Waakh nah isoowaha yadeeh

¹ Wihi ꞌdaꞌddaboot ꞌdooꞌd Kiriistokaaw, Waakh nah isoowaha, ꞌdee wor Kamureen dowwa a taaꞌho, inti us eleelo tuumman ka a liinkaanyito iꞌdi maanti goorat us atin sooeleele u.

² Toro la Waakh nah isoowaha, Waakh a nah gargaaro, ꞌdooꞌdi weyti sussuuje a nah karibo. A mehe ꞌdooꞌdi buure mee Yeesso kakhuufo.

³ Iꞌdaasenyi Kamureen a lakakhuufa. Us rubeyohiin a miigoocha, toro la Seytaanki uskeel leh atin kahossa.

⁴ Kamur a kakhuufna, atin amuri nah atin ibihinne mujjum a raahtaane, toro la orey a isohattaan one raahtaan.

⁵ Kamur ba uurassiin woya, ꞌdooninti Waakh atin ꞌdoono geeddiche ichoow garrahsihi Kiriisto lakeelo tuum abattaan.

Eti ollome kaseeha

⁶ ꞌDooꞌd Kiriistokaaw, anto Yeesso Kiriistohi Kamure ka amurane atin ibihinna, taba eti tuummane Kiriisto rummeeste ollomenye, jiroti wihi nah atin abinne miinsan ijirin kaseeha.

⁷ A mehe atin rubeytiin saggi kootte atin dabateenyo isooraahtaan a garattaan. Maanti nah atin leejirre, nah ollomme ma eheynan.

⁸ Ommos et iꞌdaanu nah goolliche mele, maalim ichoow ibeen ba hile haaggine, hol downe, saggoo ꞌdee nah etiinkoo kalday laka huleesoo addan ikorin yeelle.

⁹ Waha jeenteti icho munnaanteenyo ieheynan mee iyeeliwwaayne. Iꞌdaasenyi iꞌdoo ꞌdee atin laka dabateenyo isooraahtaane yeella.

¹⁰ A mehe maanti goorat nah atin leejirre laka, amurane atin siinne, “Eti hil ihaaggin agoollinna.”

¹¹ Mehe daagna ya goytiin ka ꞌdooꞌdi ollommeenye jira. Icho hilicho ma haaggichaane, toro hili ꞌdooꞌdi addane kaaddihaan.

¹² Magah Yeesso Kiriistohi Kamure ka, ꞌdooꞌdi jiroti iꞌdee jiro amuri nah ibihinno ichoow wihi nah daahno a waha, taba nebey kafiddiya, hil haaggicha, ꞌdee gololiin ꞌhela.

¹³ Iꞌdaasenyi ꞌdooꞌd Kiriistokaaw, atin la taba haaggi atin yeessaan akakurmina.

¹⁴ Chiꞌ etoo wihi nah khadaaba ka atin abinne iraahin, etaas isicheeka kaseeha, ꞌdee lakhaanyo a khaatatti.

¹⁵ Iꞌdaasenyi chiiy iekkaanna, iꞌdi walaal u tootoocha.

Yeedi ꞌdaꞌddaboot ichoow bariito

¹⁶ Maantaka Kamuri nebey leh rubeytiis ba walahbaaw atin isoobaho ka, kol dakkhan nebey atin kahida. Kamur ba atin tuumman atin leejira.

¹⁷ Eti bariitota dahantiis kasoochiiro a ani Baawulo. Wahaas a saggi an ichiiro, a sumatti an khadaabbeteey tuumman gesso, khadaabbeti ꞌdooꞌdi addan kayeerarroosso.

¹⁸ Yeesso Kiriistohi Kamureene ba atin tuumman atin imaala.