2 'Dessaloonika 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wahanyeyyohi geeddi Kamur isoonokhan yateeh

¹ ꞌDooꞌd Kiriistokaaw, alleya bal wihi emeetti Yeesso Kiriistohi Kamureene ichoow kulanki inno ichoow usu ba kulanno miinsan, a atin isoocheekno.

² Uus ꞌdooꞌdi, “Ibeenki Kamur soonokhti a kute,” atin idowo dowwa on atin malalinne, ommos atin kanahin. Chirri icho, “Rubeyti Munyee a nah tusse,” ommos, “Farniin a ꞌhelle,” essaane ommos nane khadaabeenyo a ꞌheleen, essaan laka, yeedicho araahina.

³ Uus etoo jitoo kalday ka laka atin ekkeysan. A mehe ibeenkaas ma yateehe ichoowka ꞌdooꞌdi buure Waakh ꞌdiiꞌda, toro la ki hugunꞌdarri kaassohti Waakh baabiicho soobaha.

⁴ Eta wihi tuummane Waakh layadeeh ommos wihi lawahti tuummane tirrima toro la ꞌdirihicho isweynaacha, ꞌdee minki Waakhe buure goya orronta, nane Waakh iskayeela.

⁵ Maanti an atin leejire, an waha a atin isoocheeke. Ma kasooꞌhessaan a?

⁶ Atin la wihi toolla usu jeycho a garattaane, ꞌdee maanti ibeenki goorat liigooche yitah ka soobaha.

⁷ A mehe miigti dagsane hugunꞌdarri toolla laka hole dowta. Iꞌdaasenyi eti toolla waha ichohi yateeh jeycho, a jeycha ichoowka Waakh usu meel kabahcha.

⁸ Chirraase ꞌdeerka eti amurre tuumman ꞌdiiꞌdo soobaha, Yeessohi Kamure la usu yeedi afiis kasoobaho ka yagiise, toro la ababnaanki maanti us soonokhti us ababo ka bar tira.

⁹ Emeetti eta amurre tuumman ꞌdiiꞌddan ichoow hili Seytaan haaggicho a israahaan. Wihi beenaate us enenyet tuso a waha, wihi ittaawenye weeli enenyet yeelin iubaaꞌdan ichoow wahanyeyyohi miigti Waakh tuso ichoow girmo.

¹⁰ Toro la suujoon tuumman ka ꞌdooꞌdi ki labaabiichee ekkeesta. ꞌDooꞌda jeenteti icho wori rummaat ꞌdoonin iꞌdiiꞌdeene liibaabiicha, ꞌdeerka ribnaan laka waayaan.

¹¹ Jeentetaas u Waakh ekkeysihi miigenye malicho gessa, ꞌdee wihi beenaat rummeestaan.

¹² Iꞌdane yeela ꞌdee jeenteti icho runti icho ribto irummeysanne, iꞌdaasenyi icho suujoonki icho yeelaan ikahamaadaan u, icho tuumman berri sina igoocha.

Baawulo ꞌdooꞌd Kiriisto mujjum tolola iyadeeh

¹³ ꞌDooꞌd Kiriistokaaw, Kamur weyti atin ꞌdoona. Nah jeenteti Waakh orey on atin isoobahsate toro la atin iribuu, Waakkhi nah kalaꞌd ilaabno a imasse. A mehe Waakh hili Rubeyti Munyee munya inno kayeesso ichoow runti Waakhe inno rummeysanni ka a atin riba.

¹⁴ Waakh jirota husub Wori Haaggane nah atin isoocheekne ka a atin wahe, ꞌdee Yeesso Kiriistohi Kamureene weynaantiisti ababto leegisantaan.

¹⁵ Maantaka ꞌdooꞌd Kiriistokaaw, taba, mujjum tolossada, wihi nah atin abinne, wihi nah af ka atin isoocheekne ommos khadaab ka nah atin isoochiirre tuumman eheetteey ka ba, mujjum khuccha.

¹⁶ Yeesso Kiriistohi Kamureene rubeytiis ichoow Waakkhi Aabbaheenenye inno ꞌdoone, haaggiiski buurenye inno imunneynan ka armaanjireen tuumman uur inno miigooche toro la khajjeeli haaggan inno siiche ba,

¹⁷ wihi haaggane atin yeessaan ichoow wihi atin tadeehiin tuumman ka atin faajjiya, toro atin miigoocha.