2 'Dessaloonika 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo bariito erga

¹ Khadaaba ꞌdooꞌdi atin isoochiiro a ani, Baawulo ichoow Silfaano ichoow Timooti. ꞌDooꞌdi nah isoochiirro la a atinhi urur Kiriisteenye ilkerengeetti weene ꞌDessaloonika taalliine, koo Waakkhi Aabbaheenenye toro la koo Yeesso Kiriistohi Kamure.

² Waakkhi Aabbaheene ichoow Yeesso Kiriistohi Kamure ba atin imaalaane, nebey atin kakaalaan.

Waakh maanti Kiriisto soonokhti ꞌdooꞌd a hukkuma

³ ꞌDooꞌd Kiriistokaaw, nah kol dakkhan jeentetiin u Waakh kalaꞌde ilaabna. Waha la a wihi mujjumenye kootte nah imale, jeenteti atin weyti ikakhayantaane, Waakh ikakhuuftaane, ꞌdooninti atin isikhabtaan la ikakhayantuu.

⁴ Maantaka ururreti Waakhe addan saggi nah atin ikeeylajno jeenteti atin sinayyohi atin loomhicho ichoow bolokkhi atin latuso atin kajo ka igarrahsattaane toro la Waakh ikakhuuftaan a icheekna.

⁵ Waha la mehe tusaan ya, Waakh saggi imasse enenyet ihukkuma, ꞌdee ꞌdooꞌdi dakhi Waakh muꞌdan atin liiekkaacha. Atin la jeenteti Waakh atin idakhti iche chiiytiin sina atin iomhissa.

⁶ Waakh saggi imasse enenyet ihukkuma gone, ꞌdooꞌdi sina atin omhicho, moge kagutta.

⁷ Toro la atinhi sina atin loomhicho ichoow nah ba sina a inno kabukkhicha. Waha la maanti icho yateehiin, a maanti Yeessohi Kamure iꞌdi ꞌdabi bolkhuu, herti Waakhe miig leh khabaayi goobi Waakh kayamiit.

⁸ Ulla eti tuummane Waakh igaranne toro la Wori Haaggane Yeessohi Kamureene miinsan daagin ꞌdiiꞌde, sirbi gessa.

⁹ Icho la sirbiti lagesso a ti icho jirtuu tuumman labaabiicho, toro la fooli Kamur ichoow miigti weynaantiis labuucho.

¹⁰ Waha la maanti icho yateehiin, a maanti us soonokhti, ꞌdooꞌdiiski munyeenye usu rummeeste tuumman usu saaꞌdo, toro la kagirmeesti. Waha atin laka goya a kijirtaan jeenteti atin wihi Waakh yeele nah agarre nah atin isoocheekne irummeysatteen u.

¹¹ Jeentetaase kol dakkhan Waakh atin isoowahna, ꞌdee Waakkheen ꞌdooꞌdi jiroti us iwahe imale jiro atin iekkaacha. Toro la Waakhe atin isoowahna, ꞌdee miigtiis ka haaggi atin yeelin ꞌdoontaan tuumman ichoow wihi atin yeessaan tuumman jeenteti atin usu ikakhuuftaan u massicha.

¹² Nah wahane iweysanna ꞌdee enenyet tuumman Yeessohi Kamureene saaꞌda jeenteti wihi us jirotiin ka yeeluu, toro la Kiriisto a atin saaꞌda. Waha dakkhan la haaggi Waakhe buure ichoow koo Yeesso Kiriistohi Kamurenye israaho on kayateehiin.