2 Beetero 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooꞌdi wori beenaat enenyet abcho

¹ Yaafohi Issiraayel goyaka la, ꞌdooꞌdi beenaate ꞌdooꞌdi Waakh iyeyyeedee a jire. Saggaas on u ꞌdooꞌdi ꞌdooꞌdi Waákh íyeyyeedo iskaayyeelo laka goytiin a soogela dagsi ka yeedassi beenaate jit Kiriisto enenyet buucho enenyet abcha. ꞌDooꞌda la Kamuri gatte laka a ꞌdiiꞌda, baabakki Waakh baabiicho dowwa on isikeenaan.

² ꞌDooꞌdi buure la sohoꞌddarriti ꞌdooꞌda yeelo raaha, jiti rummaat igafa.

³ ꞌDamaankicho ka, yeedassi beenaate atin abchaane atin kakharaawaan. Waakh goorat archiiy on icho hukkume baabakki us icho baabiicho gooche. Waakh ma urꞌdo gone, wihi us igooche a soodowwaateen.

⁴ A mehe Waakh herti Waakhe goorat uskeel yeesse sina a omhiche, ankhari af laa goya kalugꞌde kaahhide. Intaase fiddiyaane ichoowka ibeenki Waakh enenyet hukkumo yateeh.

⁵ Toro la harrati ꞌdooꞌdi goorat archiiy uskeel yeele baabiiche, ꞌduley kakhaate. Iꞌdaasenyi us Noowahi ꞌdooꞌd jiti fissan icheeke ichoow ꞌdooꞌdoo addane teebeenye toorribe.

⁶ Toro la ilkerengeetti Soodom ichoow ti Goomorah baabakki us icho baabiicho igooche, ꞌdab kagube bombey kayeele. Iꞌda ka Waakh icho ꞌdooꞌdi berri jiti us ꞌdoono iraahin iyookko ikayeele.

⁷ Toro la Loothi fissane sohoꞌddarriti ꞌdooꞌd yeele bolkhisse ribe.

⁸ A mehe eta fissan kol dakkhan goychooda yiille, ulla chirri us kol dakkhan uskeeli ꞌdooꞌda yeele arge toro la daage rubeytiis ka weyti bolkhe.

⁹ Kamur ꞌdeerka saggi us ꞌdooꞌdi aytiis raaho sinayyohi kajo ikasoobahcho a garta. Toro la ꞌdooꞌdi uskeel yeelo saggi us sina iomhicho ichoowka ibeenki us ꞌdooꞌd hukkumo yateeh laka a garta.

¹⁰ Kach ka la a ꞌdooꞌdi wihi kheerenye uurassicho goya kijiro uskeel imoono raaho toro weynaan rannyo. Icho wihi icho yeelin ꞌdoonaan ka roorro ma khabaane, rannyaate leeyahiine, toro la wahanyeyyohi iꞌdi herti Waakhe anto khabo liiargine icho leeabaarramaan ma karooraan.

¹¹ Herti Waakh wahanyeyyoha weyti miig a kakhabta toro weynaan ꞌdirihicho laka khabta. Eheetteey laka, chiꞌiche wahanyeyyoha Kamur ortiis ka cheekatti ma abaarto.

¹² Iꞌdaasenyi ꞌdooꞌda saggi binahi yibaate mal ikhabine ladelo one ꞌdee lakhabti laabbakkicho iche ijira. Wahanyeyyohi icho foolicho ikhabine saggi suuje ileeabaarramaan. Saggi bina bar liitiro iche icho laka bar liitira.

¹³ Saggi icho ꞌdooꞌdi addan igaameeraan, saggaase icho laka liigaameera. ꞌDooꞌda wihi sarticho ꞌdoonto icho maalim laka yeelaan leelakhaanyo mee. Icho goytiin ka a iꞌdi wihi duksah ichoow el khabo. Geeddi icho atin leegolossataan la ekkeysihicho a kahamaadaan.

¹⁴ Koloo kalday laka uskeel ma ꞌdiichaane, indohicho oboorrihi icho leeurꞌdin ꞌdoonaan on menye, wohoo addan ma khabtaan. ꞌDooꞌdi yeed Yeesso goyaka jarakhe ekkeestaane uskeel kalugꞌdaan. ꞌDooꞌda ꞌdamaam on menye wohoo addan ma woyaan. Icho a ꞌdooꞌdi Waakh fale.

¹⁵ Jiti fissan a bujeene jiti suujenye goorat inam Beeyorki Baalam layadeeh tabe tabeen. Baalam la suujoonki us yeele, chilimmeti us kaꞌhele a ꞌdoone.

¹⁶ Iꞌdaasenyi Baalam jeenteti uskeeli us yeeluu, eheli us khabe hooyi weeli enenyet ka usu leejaakhe. ꞌDalanki etaas Waákh íyeyyeedo sooyeelo kasoojeyche.

¹⁷ ꞌDooꞌda a iꞌdi indohi bicche laa ichoow ꞌduubathi rug woyo. Inti ꞌdooꞌda liiabbire a inti mugꞌdihi reebe.

¹⁸ A mehe icho yeedi ilmarhaatteete kaayyeedaane isatahnoochaan. ꞌDooꞌdi yeed Yeesso ka jarakhenye, dowwanoha ka suujoonki us yeele kabahsati wihi uurassicho goya kijiro uskeel imoono ka sohoꞌddarri isoojiitaane angey gessaan.

¹⁹ Wihi icho enenyet iayyichaan a furnaane, iꞌdaasenyi icho rubeycho a bowꞌdayyohi uskeel. A mehe wihi kianti iche bowꞌdaticho tahe.

²⁰ A mehe chirri icho abannaanki Yeesso Kiriistohi Kamureenenye ꞌDoorribeheene abteen ka, wahanyeyyohi harratane sussuujenye enenyet biꞌdirroocho a kasoobahsateene toro la suujoonkaas icho khabte a kahataateene, icho kola jiroti icho jiraan ti oraat laka a kasuuj.

²¹ Ichohi goorat jiti fissan iabanne deefta ichohi abte toro amurreti Waakhe munyeenye lasiiche bujo ka.

²² Wihi icho kayitah a mammahti rummaate goorat, “Kar jilbiibotiissa inokhta,” liidahye, ommos, “Golchati ladikhe toro a nokhatta sub kafadda,” liidah.