2 Beetero 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Beetero bariito erga

¹ Khadaaba eti atin isoochiiro a ani, Siimonhi Beetero layadeeh. Ani la a falfa ichoow ergaano Yeesso Kiriisto. ꞌDooꞌdi an isoochiiro la a ꞌdooꞌdi fissanoonki Waakh ichoow koo Yeesso Kiriistohi ꞌDoorribeheene ka iꞌdenyuu rumanka kakhuufnaanki Yeesso Kiriisto lakakhuufo ꞌhele.

² Waakh ichoow Yeessohi Kamureene ba garanti atin icho garattaan ka tuum atin imaalaane tuum nebey atin kakaalaan.

Fiddihi ꞌdooꞌdi Waakh wahe toro soobahsate imale

³ Miigti Waakh ka wihi tuummane jiro miinsane ꞌdee inno jiroti Waakh kahamaado jirro a inno siiche. Garanti inno Kiriisto garanni ka wahanyeyyohaas a khabna. Toro la weynaantiis ichoow haaggiiski weyti deefo ka a inno wahe.

⁴ Wahanyeyyohaas ka Waakh ayyinti weyti haaggane indigir inno ikhabto a inno igooche, ꞌdee ayyintaas ka Waakh uummankiis leegisanna toro suujoonki harratane wahanyeyyohi liimoono keenaan kabahsanna.

⁵ Jeentetuu la taba tirriinsada kakhuufnaanki atin Waakh kakhuuftaan haag kakhaya, haag la abannaanki atin Waakh abattaan kakhaya.

⁶ Abannaan la isjeyin kakhaya, isjeyin la garrahsi kakhaya, garrahsi la jiroti Waakh kahamaado kakhaya.

⁷ Jiroti Waakh kahamaado la uuri ꞌdabakhe kakhaya, uuri ꞌdabakhe la ꞌdoonin kakhaya.

⁸ Chirri wahaas tuumman wihiin yahiine toro la kakhaymaan, Yeesso Kiriistohi Kamureenenye atin abattaan ka, ꞌdooꞌdi ollommeenye gurnaan idelin ma tateehiin.

⁹ Iꞌdaasenyi eti wahanyeyyohaas laa a iꞌdi eti walah igaranne indo laaye, saggi uskeeliiski oraat liidikhe dabe.

¹⁰ Maantaka ꞌdooꞌd Kiriistokaaw a atin hawwaasde, tirriinsada wihi saggi Waakh atin iwahe toro us atin isoobahsate tuso yeela. A mehe chaꞌatin iꞌda yeesseen jirtuu ma tarraantarrattaan.

¹¹ Iꞌda ka goobi Waakhe jirtuu imassanne Yeesso Kiriistohi Kamureenenye ꞌDoorribeheene dakhti ka weyti atin lasoodowwaacha.

Chiirnaanneti Waakh mujjum nabah isuda

¹² Rumanka runti Chiirnaanneti Waakhe goorat atin laabche a garattaane toro la a raahtaan. Eheetteey laka, a inokhda one toro kol tuumman atin kasooꞌhelcha.

¹³ Ani ka kootte wihi mujjume, a anihi geeddi uliba an noolahe waha atin kasooꞌheꞌhhelcho.

¹⁴ A mehe a garda omootteey a soodowwaatte, saggi Yeesso Kiriistohi Kamureene itusuu.

¹⁵ Hol la a dowa saggi ꞌdee inkoo an umuy laka atin kol dakkhan waha ikasooꞌhessaan yeela.

Nah rubeyteenyo weynaan Yeesso a agarre

¹⁶ A mehe maanti nah miig Yeesso Kiriistohi Kamureene ichoow saggi us isoonokhti nah atin icheekne, wahaas hawweesseti beenaate nah kharateenyo ka soouunne nah raahne menye, nah indoheenyo ka weynaantiis a agarre.

¹⁷ A mehe chirraas us inkaanyit ichoow weynaan Waakkhi Aabbaheene kaꞌhele, hooyi Waakkhi Weyti Ween kayimiy mehe yidah ya, “Waha a Weeleeyki an weyti ꞌdoono, an weyti kahamaado.”

¹⁸ Nah rubeyteenyo la hooya goobi Waakh kasooyeede a daagne a mehe nah usu hali lagan ka a leejirree.

¹⁹ Inno la runti ꞌdooꞌdi goorat Waákh íyeyyeedo cheeke weyti tissibna. Yeeda weyti nabah isuda a mehe yeeda a iꞌdi taahi inti mugꞌdee kabolkho. Nabah isuda ichoowka ibeen a yimaate ki Kiriisto soobaho banayhiis la uurassiin goya kabolkhaan.

²⁰ Waha tuumman ꞌdirihicho la, saggi Chiirnaanneti Waakhe goorat ꞌdooꞌdi Waákh íyeyyeedo cheeke too kalday laka malicho ikiimaatan abda.

²¹ A mehe ꞌdooꞌda Waákh íyeyyeedo yeedicho ꞌdooninti weeli enenyet ma kasoouummamin. Iꞌdaasenyi yeedi icho cheekeen, a ki Waakh kayimiyye Rubeyti Munyee aficho leekeente.