1 Koriinto 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wori gololleti iyookkoyyohi waakkhakh lakayeessi liibahche miinsan

¹ An toolla wori gololi iyookkoyyohi waakkhakh lakayeessi liisoorriyooche miinsane kaayyeeda. Inno tuumman wihi wahaas miinsan a garanna. Kharateen rannyaate inno buuhissa, iꞌdaasenyi ꞌdooninti inno isꞌdoonno ꞌdooꞌdi addan a miigoossa.

² Chirri etoo kol us walah tuum garti iskoog, garanti rummaate usu lakaꞌdoono, a kaankhantahe.

³ Iꞌdaasenyi eti Waakh ꞌdoono, Waakh usu a garta.

⁴ Maantaka ayta gololi iyookkoyyohi waakkhakh lakayeessi liisoorriyooche layaham ka, saggi iyookkoyyoha harrata ka Waakh ieheynan a garanna. Saggi Waakkhi rummaate jiro la koo kalday on iyahe a garanna.

⁵ A mehe ꞌdooꞌd gaasoo mehe essa ya waakkhassi ittaawe ichoow kamurreti ittaawenye ꞌdooꞌd wahti a jiraan. Iꞌdaasenyi waakkhassa beenaat harrata ommos serey kijireeneey ka ba,

⁶ inno ka Waakkhoo kalday on jira, ulla a Aabbaheenna. Walah tuumman usu kayimaateene, inno la usu ijirra. Toro la Kamuroo kalday on jira, ulla a Yeesso Kiriisto. Usu on ka Waakh walah tuumman soouume, inno la usu on ka jiro ꞌhelle.

⁷ Iꞌdaasenyi ꞌdooꞌd tuumman mee runta garti. ꞌDooꞌd gaasoo iyookkoyyoha a bare. Chiꞌicho gololi iyookkoyyoha liisoorriyooche yamhiin ka, jeenteti rubeyohichoki haag ichoow suujoon seley saaho ꞌdabakh iyahiin u, rubeyohichokaas biꞌdirroochaan.

⁸ Iꞌdaasenyi golol koloo kalday laka Waakh ma inno idowwaacho. Chirri inno iumhan walah inno waayno mele, chirri inno nuhum laka walah inno ꞌhello ba mele.

⁹ Iꞌdaasenyi atinhi wihi atin tamhiin seley bihin tabuuꞌdiin, yuubsada giꞌde ꞌdooꞌdi ꞌdabakhe daakki tarraantarricho iitaahana.

¹⁰ Iyookkoka eemba etoo rubeytiisti haag ichoow suujoon seley saahto ꞌdabakh tahe atihi waha dakkhan garatti, gololi iyookkoyyo liibahche minki iyookkoyyo lakawahti ka taham kiagar? Eta a faajjiya ꞌdee ullaka gololi iyookkoyyohi waakkhakh lakayeessi liisoorriyooche yaham menya?

¹¹ ꞌDeerka eta ꞌdabakhenye Kiriisto rummeeste Kiriisto usu iyumuy wihi at garatti ka a baabiisse gon.

¹² Chirra at iꞌda ka etaahki Kiriisto rummeeste uskeel iyeesso, toro rubeyohichoki haag ichoow suujoon seley saaho ꞌdabakhe gaameerto, at Kiriisto uskeel iyeessa.

¹³ Maantaka chirri gololi an aham eteeykoo Kiriisto rummeeste uskeel kalugꞌdo, an yombuu toro jid ma aham uus an etaas koo Kiriistee kufinne.