1 Koriinto 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Seley goggoonaanki urur Kiriisto

¹ ꞌDooꞌd Kiriistokaaw an saggi ꞌdooꞌdi Rubeyti Munyee woyto ma atin ileeyyeedine, iꞌdaasenyi iꞌdoo atin ꞌdabakkhi weeli enenyete harrata ikhabtaane atin ileeyyeede. Toro la kakhuufnaanki atin Kiriisto kakhuuftaan ka atin a iꞌdi nyaakhuti nahas nuugo.

² Chaꞌan wor Kiriisto atin abche, a iꞌdoo an iꞌdi nyaakhuti rurrucchul u an haanu on atin siiche. Iꞌdi tahe gololleti mimmiige ohom ma ubaaꞌdan gon. Uliba laka ma tabuuꞌdiin ba.

³ Iꞌdi tahe atin uliba a ꞌdooꞌdi ꞌdabakkhi weeli enenyete harrata khabo. A mehe chirri maanta atin isinaaftaane toro la isleejaakhtaan wahaas saggi atin ꞌdabakkhi weeli enenyet ikhabtaan ma tusaan a? Waha la saggi atin uliba jiroti ꞌdooꞌdi harrata ijirtaan ma tusaan a?

⁴ Chiꞌ gaasiinkoo “An a abatti Baawulo,” essi, gaasoo la, “An a abatti Aboollo,” essi, iꞌda ka atin saggi ꞌdooꞌdi harratane Waakh igaran ma ijirtaan a?

⁵ Kamalda bal, Aboollo a mehe, ommos Baawulo laka a mehe? Nah a ilbooyyeti Waakhe atin gargaarte atin la wori Kiriisto miinsan rummeysatteen on. Eteenyoba hili Kamur dahan gesse on haaggiche.

⁶ Ani ilmo il gesse Aboollo la ilmohaas bicche kachibe. Iꞌdaasenyi, Waakhe ilinta soobahche.

⁷ ꞌDeerka Waakkhi ilinta soobahcho usu khumman, eti ilim il gesso ichoow ki ilim bicche kachibo ba a walahba.

⁸ Eti ilim il gesso ichoow ki bicche kachibo ba malicho a koo one, Waakh la ebba geeddi us hil haaggiche on kalaꞌd guta.

⁹ Iꞌdi tahe nah a ꞌdooꞌdi Waakhe hil isleehaaggicho, atin la a iꞌdi gosi Waakh ichoow minki Waakh.

¹⁰ Haaggi Waakhe buurenye liisiiche ka, an a iꞌdi tagaanki minan diso, anna daddaabohi ilaat a dise. Etoo addan la daddaabohaas sarcheeda min kadisa. Iꞌdaasenyi ebba saggi us min idiso a yuubicho giꞌde.

¹¹ A mehe daddaaboha ilaate orey ladise Yeesso Kiriistee on menye, et daddaabohoo addan disin yabuuꞌd mele.

¹² Chirri etoo daddaaboha ilaat sarcho ꞌdahab ommos lahaag ommos dagahti gato miige, ommos khoꞌdoomme ommos hoos ommos meydah kadiso,

¹³ maanti Kiriisto soonokhti, hiliis iꞌdi us yahe a lasoobabbakkaahicha. Iꞌdi tahe ꞌdabe saggi hil liihaaggiche soobabbakkaahicha. ꞌDab ka hili ebba haaggiche usu mujjume ichoow usuhuus a latusa.

¹⁴ Chirri ebba wihi us dise sooꞌhadeen etaas kalaꞌd a laguta.

¹⁵ Chirri wihi us dise ꞌdab yuhum, kalaꞌd a waaya. Iꞌdaasenyi usu rubeytiis iꞌdi etoo ꞌdab goya lakasoobahchuu, a bahsata.

¹⁶ Saggi atin rubeytiin minki Waakhe buure itahiine Rubeyti Waakh rubeyohiin goya ifiddiito kasooꞌhela.

¹⁷ Chiꞌ etoo minki Waakhe buure uskulaacho Waakh usu a baabiicha. Iꞌdi tahe minki Waakh a lagayyahe, atin la a minkaas.

¹⁸ Iisekkeysanna giꞌde! Chirri etiinkoo saggi ꞌdooꞌdi harrata iekkaacho ka kol us khara yahe iskoogyahe, iꞌdi eti ꞌdooꞌdi harrata ꞌdalam iekkaacho a yitaahe, ꞌdee eti rumanka kharee a yitaahe.

¹⁹ Iꞌdi tahe kharati ꞌdooꞌdi harrata, Waakh ka a ꞌdalammoon. Iꞌdi liichiiruu, “Waakh ꞌdooꞌdi kharayyee kharatichotaas on kakhabta.”

²⁰ Toro la wihi addane chiiran, “Kamur mali ꞌdooꞌdi kharayyee a garta toro la saggi us ki ilmarhaatteet iyahe a garta.”

²¹ ꞌDeerka, “An a abatti ebel,” eelanna eeylajina. Iꞌdi tahe walah tuumman a wihiinna,

²² Baawulo ommos Aboollo ommos Keefas ommos harrata ommos jiro ommos omoot ommos wihi toolla jiro ommos wihi yombo soojiro tuumman eheetteey ka ba, a wihiinna.

²³ Atin la a koo Kiriisto, Kiriisto la a koo Waakh.