1 Koriinto 13 - Wori Haaggane Yeesso Kiriisto Miinsan Ayyinti Husube Waakh Enenyet Igooche

ꞌDooninti enenyet laꞌdoono

¹ Chirri an afassi weeli enenyet ommos afassi herti Waakh kaayyeedo, iꞌdaasenyi an enenyet iꞌdoonin, an a iꞌdi gaꞌdaari ballaaddane hafane weyti riiro, ꞌdollo lajaho on. Ommos an a iꞌdi ꞌdaanki buurenye immarah yeedo on.

² Chirri an siinti Waakh liiyeyyeedo khabo, chirri an wihi dagsan tuumman gardi, chirri an walah tuumman gardi, chirri an kakhuufnaanki Waakh weyti lakakhuufo khabo an halal laka guuricho, iꞌdaasenyi an enenyet iꞌdoonin, walah an ahe mele.

³ Toro la chirri an wihi an khabo tuumman miskiino siicho, an sarteey laka an bahcho lagubo, iꞌdaasenyi an enenyet iꞌdoonin, waha haag icho ibahaan mele.

⁴ Eti enenyet ꞌdoono, a eti garrahsi lehe, uure nugulyahe, inaaf ma khabo, ma isatahnoocho, ma eylajo.

⁵ Fiddihi lakhaanyo keeno ma fiddiyo, awtiis kalday ma yeyo, dowwa ma hollowo, suujoonki liiyeele ma ekkaacho.

⁶ Uskeel ma kahamaado, iꞌdaasenyi wihi rummaat on kahamaada.

⁷ Us walah tuumman a siꞌda, walah tuumman kakhuufa, walah tuumman ka khajjeel a khaba, kol dakkhan la a garrahsata.

⁸ ꞌDoonine koloo kalday laka ma massatti. Iꞌdaasenyi farniinki ꞌdooꞌdi Waákh íyeyyeedo a massata, afassi Rubeyti Munyee kayamiit a gammadichaane, wihi lagarti tuumman la a kutaan.

⁹ Iꞌdi tahe wihi inno garanni geeddoo on garanna, wori Waakhe inno kaayyeeno la geeddoo on kaayyeena.

¹⁰ Iꞌdaasenyi chirri wihi buuho yimaateen, wihi ibuuhin tuumman a baabaan.

¹¹ Maanti an weel eheet, yeedi an kaayyeedo a yeedi nyaakhute, saggi an walah iabde la a saggi nyaakhute, maleey tuumman, a ki weeli rucchul on gon. Inkoo an weynaade la, wihi nyaakhunnoon tuumman a ꞌdiiche.

¹² Wihi toolla inno agarro tuumman, a iꞌdi oosinti mujjum liiargine, kitaab goya kajirto on. Berri la waha rumanka mujjum a agarra. Toolla walah tuumman geeddoo on garda, berri la Waakh saggi us tuum ani igartuu an laka usu tuume abda.

¹³ Maantaka, waha seyyahcho a sooꞌhadaan, kakhuufnaanki inno Waakh kakhuufno ichoow khajjeeli inno Kiriisto khajjeello ichoow ꞌdooninti inno enenyet ꞌdoonno, iꞌdaasenyi ti weyti kutto, a ꞌdoonin.