1 'Dessaloonika 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ ꞌDeerka inkoo nah laantiin fiddi agaafanne ka, wihi nah goonne nah leemujjume, a nahi ilkerengeetti Aaꞌden ka sooꞌhaano.

² Toro la Timooti atin isooeregne. Us a eteenki koo Kiriisteenye, hili Waakh ka a wahalhaanya, Wori Haaggane Kiriisto miinsane ꞌdooꞌd icheeka. Usu a sooeregne, ꞌdee kakhuufnaanki atin Yeesso Kiriisto kakhuuftaan ka atin miigoocha toro la atin faajjiya.

³ Iꞌdane yeella uus ꞌdee etiinkoo kalday laka, jeenteti sinayyohi kajo ka Kiriistohi us kakhuufo ka lasesseehin. Rumanka saggi atin igarattaan u, sinayyoha a wihi Waakh inno igooche.

⁴ Rumanka maanti nah atin leejirre laka, foga on sinati inno lasoomhicho atin isoocheekne. Saggi atin igarattaan u la, iꞌdaas on titah.

⁵ Maantaka inkoo an nabahtiin waaye ka fiddi agaafde, Timooti sooerge. A sooerge ꞌdee usu atin uliba Kiriisto mujjum kakhuuftaan abda. Mehe karoore ya, kolossoo Seytaanki ꞌDookkaje layadeeh jitoo ka kajmeti uskeel atin kaluguꞌddo a atin kakaje, hili miigenye nah haagginne ki ilmarhaatteet yitah.

Timooti wori ꞌdooꞌdi ꞌDessaloonika keena

⁶ Iꞌdaasenyi toolla Timooti a soonokhte. Wori haaggane us keene a atinhi uliba Kiriisto kakhuuftaane toro la uliba isꞌdoontaan. Wihi addane us yidah, a atinhi uliba hamaad ka nah kasooꞌhessaane, ichoow saggi atin argin nah iꞌdoontaan saggi nah laka toolla argin atin iꞌdoonnuu.

⁷ Maantaka ꞌdooꞌd Kiriistokaaw, chirri nah saggi atin mujjum Kiriisto ikakhuuftaan daagne, sina ichoow bolokkhi nah ꞌhelle ka uur a nah miigoosseen.

⁸ Atin Kamur ka mujjume tolossaan gone, toolla nah rumanka a jirra.

⁹ Geeddoo meheenye jeentetiin u Waakh kalaꞌd ilaabna jeenteti hamaadi buurenye atin Waakh ortiis ka nah ikeenteen u?

¹⁰ Ibeen ichoow maalim ba rumanka Waakh a wahanna, ꞌdee jiti nah toro atin kasooꞌdaarro fura, toro la wihi Kiriistohi atin kakhuuftaan ka laatahiin, atin siinna.

¹¹ Waakkheenki Aabbaheene rubeytiis ichoow Yeessohi Kamureene ba, jiti nah atin ikanamiit soofuraan.

¹² Kamur ba ꞌdooninti atin isꞌdoontaan ichoow ti atin ꞌdooꞌdi addan tuumman ꞌdoontaan atin ikakhakkhaya, weyti buuraacha saggi nah atin iꞌdoonnuu.

¹³ Kamur ba iꞌda ka uur a atin miigoocho, ꞌdee maanti Yeessohi Kamureene ꞌdooꞌdiis tuumman khabaayi soonokhti ka, Waakkhi Aabbaheene ortiis ka ꞌdooꞌdi munyeenye toro wohoo rucchul laka liikacheekan tateehiin.