1 'Dessaloonika 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Hili Baawulo ꞌDessaloonika ka haaggiche

¹ ꞌDooꞌd Kiriistokaaw, atin rubeytiin a garattaane emeetti nah goytiin nimiy, ti ilmarhaatteet ma eheynan.

² Geeddi goorat nah atin ikiimaatan, saggi ilkerengeetti Fiiliffi ka sina nah liikawaariche ichoow saggi ꞌdooꞌdi wewween nah ileeabaarrame a garattaan. Iꞌdaasenyi jeenteti Waakh uur nah imiigooche u, Wori Haaggane Waakh a atin icheekne chirri ꞌdooꞌdi nah ꞌdiiꞌddan jire laka.

³ A mehe wori nah enenyet icheekne khollookh ma kijirine ommos mali suuje ma kasoobahine ommos ekkeysi ma eheynan.

⁴ Iꞌdaasenyi nah saggi ꞌdooꞌdi Waakh khaatte, hili Wori Haaggan lakorche iche iyeyyeena. Nah hol ma downo weeli enenyet ma kahamaadinno, Waakkhi uurasseen kajo kahamaadinna.

⁵ A mehe saggi atin igarattaan u, nah injire fool ma atin haagginne, ommos jeenteti ꞌdamaam u ma atin ekkeysan. Waakh la garteenyo a laaba.

⁶ Nah weeli enenyet, atin eheetteey ommos ꞌdooꞌdoo addan eheetteey ka ba, koolo ma kayowan. Nah a ergaano Kiriisto gone, a geeddi kootte nah walah atin leemaranno.

⁷ Iꞌdaasenyi nah iꞌdi abarti nyaakhutiche nuugisso toro woywoytuu, samacchaar on goytiin fiddiine.

⁸ Weyti atin ꞌdoonne ichoowka hamaad ka Wori Haaggane Waakh kalday menye, jiroteenyo laka a atin leegisanne. Weyti atin chinneysanna!

⁹ Rumanka ꞌdooꞌd Kiriistokaaw, atin hili miigenye nah haagginne a kasooꞌhessaan. Ibeen ichoow maalim ba hol a downe uus ꞌdee geedda nah Wori Haaggane Waakh atin icheekno etiinkoo kalday laka hulees korinne.

¹⁰ Atin ichoow Waakh laka saggi nah atinhi Kiriisto rummeysatteen goyaka jiroti munyeenye, fissane toro la eloo rucchul laka ikhabin ijirre ka garteenyo a laabtaan.

¹¹ A mehe saggi nah atin tuumman saggi ooyo nyaakhutiis iwoywoyo atin iwoywoyne a garattaan.

¹² Nah uur a atin miigoonne, uur atin khoboonne, atin hawwaassanne, ꞌdee jiroti Waakh kahamaado jirtaan. A mehe Waakh dakhiis ichoow weynaantiisti ababto a atin iwaha.

¹³ Maanti atin Yeedi Waakhe atin nah kadaagteen khaatatteen, atin saggi yeedi weeli enenyet menye, saggi us rumanka Yeedi Waakh iyahe on ikhaatatteen. Yeeda atin rummeysatteen la a atin urgiyicha. Jeentetuu laka kol dakkhan Waakh kalaꞌd a ilaabna.

¹⁴ ꞌDooꞌd Kiriistokaaw, atin laka dabati ururreti Waakhe ili Yaꞌhuudiya kijirto Yeesso Kiriisto kakhuufte on raahteen. Saggaas ꞌdooꞌdi Yaꞌhuud icho sina ikawaariche, iche atin laka ꞌdooꞌdiin sina atin ikawaariche.

¹⁵ ꞌDooꞌdi Yaꞌhuud Yeessohi Kamureene ichoow ꞌdooꞌdi Waákh íyeyyeedo a yigaaseene, nah laka a nah sooriheen. Icho la Waakh ma kahamaadichaane, toro la enenyet tuumman a tirrimeen.

¹⁶ Icho nahi Wori Haaggane yaafohi Yaꞌhuud ieheynan icheekno ꞌdee Waakh icho ribo laka jeyine ꞌdoonaan. Iꞌda ka la, kol dakkhan uskeelichooda on weyti isibuuraachaan. Kola holi Waakh icho a sooeleele.

Baawulo usuhi urur Kiriistoki ꞌDessaloonika goya ꞌdaaro ꞌdoona

¹⁷ ꞌDooꞌd Kiriistokaaw nah kol tuumman uur a atin kakhabne. Inkoo geeddoor seley inno labahche laka, weyti atin towne, fooli nah atin agarro imoonne.

¹⁸ A mehe atin sooꞌdaarin a ꞌdoonne. Ani, Baawulo kolassi ittaawenye inonnokhde kaje, iꞌdaasenyi Seytaan a nah tirte.

¹⁹ A mehe maanti Yeessohi Kamureene soonokhti ortiis ka khajjeel ommos hamaad ommos kalaꞌddi nah keeylajno a mehe? Atin menya?

²⁰ A mehe atin a ꞌdooꞌdi nah keeylajno toro nah kahamaano.