1 'Dessaloonika 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo bariito erga

¹ Khadaaba ꞌdooꞌdi atin isoochiiro a ani Baawulo ichoow Silfaano ichoow Timooti. ꞌDooꞌdi nah isoochiirro la a atinhi urur Kiriisteenye ilkerengeetti weene ꞌDessaloonika taalliine, koo Waakkhi Aabbaheene ichoow koo Yeesso Kiriistohi Kamure. Waakh ba atin imaala, nebey atin kakaala.

Kalaꞌddi lalaabo jeenteti ꞌdooꞌdi ꞌDessaloonika weyti Waakh ikakhuufuu

² Nah kol dakkhan jeenteti atin tuumman u Waakh kalaꞌd a ilaabna, geeddi nah weysanni la Waakh a atin isoowahna.

³ Kol dakkhan Waakkhi Aabbaheene ortiis ka saggi jeenteti atin Kiriisto ikakhuuftaan u hili haaggan ihaaggissaan ichoow jeenteti atin usu iꞌdoontaan u hol idowtaan ichoow jeenteti atin Yeesso Kiriistohi Kamureene khajjeel ikakhabtaan u igarrahsattaan, a kasooꞌhella.

⁴ ꞌDooꞌd Kiriistokaaw, nah saggi Waakh atin iꞌdoono toro la us atin isoobahsate a garanna.

⁵ Iꞌdi tahe maanti nah Wori Haaggan atin icheekne, woraas yeedi afoot kalday menye, miigti Rubeyti Munyee laka us a atin tuse. Wori Haaggane nah atin icheekne tuume rummeysanne. Toro la saggi fiddihi nah goytiin fiddiine iroonotiin ieheneet a garattaan.

⁶ Atin chirri sinayyo atin loomhiche laka, Wori Haaggan hamaadi buurenye Rubeyti Munyee atin siisse iche kakhaatatteen. Iꞌda ka la, atin dabateenyo ichoow koo Kamureen a raahteen.

⁷ Jeentetaas u ꞌdooꞌdi Kiriisto rummeeste boroofenhi Makedooniya kijiro ichoow ki boroofenhi Akhaaya kijiro ba iyookko a ititaaheen.

⁸ A mehe wori Kamur miinsane goytiin kasoobahe, ꞌdooꞌdi boroofenhi Makedooniya ichoow ki boroofenhi Akhaaya laka a khaatte. Toro la wori saggi atin Waakh ikakhuuftaan il tuumman a kataaꞌhe. Maantaka wohoo rucchule nah kakhayno laka ma jiraan.

⁹ Iꞌdi tahe icho rubeycho saggi atin goorat nah imartisatteen ichoow saggi atin iyookkoyyohi beenaate Waakh lakayeessi atin orey wahatteen ikasoonokhatteene, ꞌdee atin Waakkhi jiro toro rummaat ikafassaan a cheekaan.

¹⁰ Toro la saggi atin Weeli Waakhe goobi Waakh ka soonokhti isugtaan laka a cheekaan. Us a Yeessohi Waakh omoot ka sookahche, holi Waakhe soosohti inno karibo.