1 Beetero 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Urur Kiriisto yaakhicha

¹ Maantaka, wihi an ewweenki urur Kiriisto woyo daaho a waha. Ani laka a ewweenkoo iꞌdiinenye, toro la garti saggi Kiriisto sina liiomhiche a laaba. Ani laka maanti us soonokhti weynaantiis a leegisma.

² Ururi Waakhe iꞌdi woyhi Waakhenye dahantiin lagesse ersinkicho ateeha, yaakhicha. Uus wohoo atin liihosso eheynane, iꞌdaasenyi wihi atin kasoouummame a eheetti. Jeenteti ꞌdamaanki lakhaanyee la menye, jeenteti atin weyti Waakh ikafalin ꞌdoontaan a eheetti giꞌde.

³ ꞌDooꞌdi dahantiin lagesse iꞌdi kamuri suuje u akaarriirina, iꞌdaasenyi ꞌdooꞌdi woyha iyookkoti haaggan iateeha.

⁴ Maanti Ersinki Ween soobaho la, ꞌduubi Waakh kayamiite jirtuu duh iurgiyine ꞌhessaan.

⁵ Saggaasu la atinhi nunnugul taba ayti ewween atin idowo akutina. Atin tuumman la tuum isnuglaacha a mehe, “Waakh eti eylajo a ꞌdiiꞌddanyahe, iꞌdaasenyi eti isnuglaacho haaggiiski buurenye siicha.”

⁶ Maantaka dahanti Waakkhi miig khabo orche ka isnuglaacha, ꞌdee maanti us ꞌdoono, a atin okkhicho.

⁷ Us aw atin ikhaba gone, waꞌdwaaꞌdiin tuumman usu dahan gessa giꞌde.

⁸ Taba isjeycha toro la mujjum toorribda! Seytaanki chiiytankiine iꞌdi bahassihi yeeduu a ismara, eti us bar tiro yowtaa.

⁹ Usu iskahossa mujjum Waakh kakhuufa, a garattaanee harra tuumman ka, ꞌdooꞌdiinki Kiriisto rummeeste tuumman sinata atin taham on taham.

¹⁰ Waakkhi haaggi buure leh, Yeesso Kiriisto ka weynaantiisti armaanjireen a atin iwahe. Inkoo geeddoor sina atin tuhum, usu rubeytiis a atin okkhicha, kakhuufnaanki atin usu kakhuuftaan miigoocha, atin toollicha toro inti wohoo atin ikaasseehin atin gessa.

¹¹ Jirtuu tuumman la miige a tiissa. Aamiin!

Bariitoti ꞌdaꞌddaboot

¹² Eti ullaka koo Kiriisteenye Silfaano layadeehe, an eti weyti lakakhuufo iekkaacho, iche khadaaba ileegargaare. Wihi an gaabi ka atin ikasoochiire la uure atin miigoocha, toro a saggi wihi khadaaba kachiiran haaggi Waakhe buure rum iyahe. Haagga akanokhanna giꞌde.

¹³ Urur Kiriistoki ilkerengeetti Baabiloon kajiro atin laleesoobahsate a atin soobariitiche. Markohi iꞌdi weeleeye laka a atin soobariitiche.

¹⁴ Bariitoti ꞌdooꞌd Kiriisto isbariiticho isbariiticha. Atinhi koo Kiriistee tuumman la Waakh ba nebey atin kakaala.